Porsche 911 Turbo S爆速驚人
跑車究竟要幾快先叫堅呢？有能力3.2秒「破百」？3.1定3秒？毫無疑問，3秒頭已是Supercar級數，但科技不會停下來，高端買家所追求的速度亦是無止境，咁點先夠吸引力？突破3秒都走唔甩了吧！最近，保時捷（Porsche）引進了全新的911 Turbo S，原來的3.8公升Bi-Turbo引擎搭配更大的渦輪增壓器，馬力進一步提升至580hp，0~100km/h加速只需要2.9秒，加速力猛到令人窒息！
0~100km/h僅2.9秒
2.9秒的確夠堅，但售價同樣唔講得笑，乜Option都唔加已經要$3,829,000，再加個天窗、換套靚音響等，埋單已經要「四球」。要衡量值唔值，你首先要問自己係咪一定要追求破3秒呢個關口，是的話，咁呢「四球」又真係唔貴，試想同樣2.9秒的林寶堅尼Aventador LP700-4，身價就要「六球」以上，兩部車跑0~100km/h不分高下，911 Turbo S的車價卻平一大截，咁值唔值先？唔好同我講「大牛」有350km/h的極速、「波子」得330km/h呀，喺香港用得着先講啦！不過咁，揸Aventador出街又真係吸睛好多嘅，唔識車都知道是Supercar，又要型、又要威威，「大牛」喺呢方面真係贏晒；相反，「波子」就相對低調，賣相雖冇咁招搖，但戰鬥力同屬超強嗰派。點揀？睇自己鍾意咩囉，相信花得起「四球」買部車的人，都有實力使多「兩球半」，對不？
Sport Response加速癲狂
911唔止快，亦兼顧到日常駕駛的舒適性，除咗車廂隔音好之外，在「Normal」行車模式下更有着非常出色的濾震效能，於滿布坑洞的起伏路面行駛都唔會話好「戥」，起碼不會有「硬食」的感覺，連猛獸都有如此的一面，實屬難得！同時，原廠已將Sport Chrono組件列為911 Turbo S的標準配備，行車模式除有「Normal」、「Sport」、「Sport Plus」及「Individual」外，另外再多一個「Sport Response」按鍵，報稱啟動後可獲得最快的瞬間加速。實際係點？按下「Sport Response」後，錶板會有數字顯示20秒倒數，在這20秒內，波箱通常會選用較低的波檔，將引擎轉速保持在3,000~6,000rpm內，油門及波箱反應都會變得更敏銳，若是狠狠地一腳把油門踩到底，部車所有潛力會一次過爆晒出來，猶如為引擎注入腎上腺素，動力輸出如江河決堤，加速力可用「癲狂」來形容。
9.1L/100km兼顧低油耗
全新911 Turbo S沿用3.8公升水平對向六汽缸引擎，同時導入乾式油池潤滑及電控機油泵等技術，燃油噴射壓力由從前的140 bar提升至200 bar，更能滿足引擎的燃油需求。原廠指，使用可變幾何雙渦輪增壓器的全新911 Turbo S，最大馬力達到580hp，雖然數字上只多了20hp，但0~100km/h卻快了6.5%，只需極短的2.9秒，而且擁有330km/h的極速，踩半油門已強力推背，背脊黐到椅背實一實。新911 Turbo S的油耗亦得到進一步降低，配合引擎怠速自動熄火系統，9.1公升油便可行駛100公里。擔心Auto Start/Stop影響起步反應？別愁，將行車模式調校至「Sport」或「Sport Plus」就得，引擎在這情況下會持續運作，不管汽車是否已停定，總之任何時候都不會熄火，那就不用擔心了吧！之但係買得911 Turbo S冇理由「就住腳」揸呀？一上車就「Sport」啦，仲使諗？要慳油就咪鬼揀呢部啦！
山路快跑安全穩定
911 Turbo S的操控並無想像中咁難，標配的動態底盤控制（PDCC）系統已大大減少了車身的重心轉移，還有四轉四驅功能，在山路疾走依然有超強穩定性，感覺就如身處貼地飛行器，就算以較粗暴的方式畀油或急轉向，車身都是四平八穩的，快得到又十分安全。
是次小改款不僅有動力提升，外觀及內飾都有不少改動，譬如泵把、排氣尾管、燈組等都是新設計，還有大型升降尾翼及單孔式輪圈，看上去更有賽車風格。至於全新的保時捷通訊管理系統（PCM）更整合了導航及資訊娛樂系統，而且支援Apple CarPlay功能，車主另可選配Burmester環迴音響，要幾高享受都有，只怕你冇錢。
Porsche 911 Turbo S SPECIFICATION
車型：雙門2+2座位跑車
引擎：水平對向六汽缸Bi-Turbo
容積：3.8公升
最大馬力：580hp/6,750rpm
最大扭力：750Nm/2,250~4,000rpm（Overboost）
傳動：七前速PDK自動波
驅動：後置引擎、四輪驅動
0~100km/h：2.9秒
車身體積：4,507×1,880×1,297mm（長×闊×高）
售價：$3,829,000