星戰瀛Phone 觸控原力

《星球大戰》一句「May the Force be with you」講足40年，不過原力無色無形，唔靠裝扮和特技又點分Light Side和Dark Side？新鮮抵港的SoftBank星戰手機就幫到大家，皆因它備有純白及紅黑兩色選擇，分別代表光明及黑暗兩大勢力，加埋專屬牆紙、音效同Figure，放低$6,980就可與原力同在！

STAR WARS mobile賣$6,980，星戰粉絲唔係唔搶呀？

兩大陣營

去年底《俠盜一號：星球大戰外傳》上映，日本SoftBank特登整咗部「STAR WARS mobile」配合宣傳，估唔到咁快就有水貨抵港，但由於貨量不多，炒上$6,980也無可厚非。手機以Sharp AQUOS Xx3為原型，不過由內到外都完全「覺醒」，首先是包裝變成禮盒裝，盒面大大個盪金「STAR WARS」字樣，顏色則按陣營分為純白及紅黑兩色，分別印有反抗軍及帝國軍標誌，信號燈亦按原力分成藍色及紅色兩種，維持正義定墮入魔道就睇各位喜好。

戰機介面

貴為別注手機，星戰元素當然少不了。甫開機激光劍啟動聲隨即播放，鎖機時則變成收納聲，單係呢點已令人感動。睇埋介面，有得揀用U-wing Fighter或帝國軍TIE Fighter駕駛艙，撥頁時視點仲會隨之轉動，配以樹林與太空景色，讓人恍如置身戰鬥機機艙一樣。專屬牆紙亦包羅萬有，由天行者父子對決到外傳女主角Jyn Erso都有，滿足晒新舊擁躉要求。手機亦收錄了多首經典配樂，例如開場字幕必用的《Main Title》、黑武士登場的《The Imperial March》等，加埋共有十多首咁多。

Light Side用上純白色，並印有「STAR WARS」及反抗軍標誌。

機側設有信號燈，顏色根據陣營而定，如Light Side為藍色。

用上microSIM卡，並可插入記憶卡擴充容量。

5個迷你Figures

跟很多日系別注機得個樣不同，新機走高檔路線，內置Snapdragon 820處理器及3GB RAM，配以5.3吋全高清IGZO屏幕，並支援IPX5/8防水，操作流暢顏色自然。叫人心心眼的還有附送5個TAKARA TOMY星戰迷你Figures，包括黑武士、Death Trooper、Scarif Stormtrooper、K-2SO及U-wing Fighter，全部加入合金成分，當中黑武士更是限定配色，有儲開玩具的粉絲定要入手。美中不足是由於水貨關係，預載的《STAR WARS Force Collection》遊戲及電影片段統統開唔到呢！

附送5個TAKARA TOMY星戰迷你Figures，當中黑武士用上限定配色。	Dark Side採用紅黑配色，機背換上帝國軍標誌。	可選U-wing Fighter或帝國軍TIE Fighter駕駛艙作介面。
天氣、日曆、鬧鐘、功能介面統統換上星戰主題。	設有多款星戰牆紙，涵蓋新舊電影及外傳。	鏡頭對焦相當快，並提供不同濾鏡效果選擇。