催旺文昌 讀書醒搵食勁

人人都要文昌

林師傅表示玄空風水學上以四祿為文昌星，主思維敏捷及領悟力高。相傳玉皇大帝令文昌帝君到凡間掌管讀書人嘅科舉考試，以及在職人士嘅職位升遷。古往今來，唔少讀書人或從事文職人士都會拜祭文昌帝君，祈求考試獲得優異成績或職位高陞。

風水學上，善用文昌氣場能使人頭腦靈活，領悟力強並專注於學業及工作上，因此，無論係白領或藍領，文職定武職，都要頭腦清晰同敏捷思考，先至能達致理想成果，故各行各業都需要獲文昌幫助。

催動個人文昌位

今年文昌星降臨東北方，於屋宅只要喺呢個方位擺放催動文昌嘅風水物品，就可以達到催旺效果。另外，亦可以按出生年份尾數搵出個人文昌旺位，基本上個人文昌位，係以出生年份嘅立春日起，至翌年立春前一日嘅天干計算。至於選擇催動個人文昌位定流年文昌位，悉隨尊便，只要喺方便又合適嘅方位布置風水擺設，加上自己嘅努力，便能收到事半功倍嘅效果。

出生年份／文昌位

1970、1980、1990、2000 西北方

1971、1981、1991、2001 正北方

1972、1982、1992、2002 東北方

1973、1983、1993、2003 正東方

1974、1984、1994、2004 東南方

1975、1985、1995、2005 正南方

1976、1986、1996、2006 西南方

1977、1987、1997、2007 正西方

1978、1988、1998、2008 西南方

1979、1989、1999、2009 正西方

掛起4支毛筆

至於家居風水布局方面，將書枱或書架放喺東北位，或個人文昌位，而書枱或書架上擺放4支已用墨汁開筆嘅毛筆，並以筆架掛起。4數為文昌，用墨汁開筆嘅毛筆，寓意文昌開運及文筆生輝。亦可擺放文昌塔，除吸納文昌之氣，同時具化煞作用。或擺設4支水種富貴竹，有文昌運氣生生不息之意。又可在牆掛上勵志書畫，以堅定學習意志。

另外，今年五黃煞星於正南方，建議喺呢個方位擺放用金屬製嘅文昌塔，一可化去煞氣，二可加強文昌運勢。

水種植物放枱頭

打工仔想工作順利兼且思考靈敏嘅話，就要催動辦公室嘅文昌位，方法係先按出生年份搵出個人文昌位，或喺東北方位文昌位置擺設水種植物，而植物大細可因應辦公室空間大小來配合。此外，用植物圖案或具有勵志意思嘅字畫、枱頭日曆等嚟催旺文昌星。另外，亦可以用長方形或圓形綠粉晶，放置工作枱或書架以增強思考力。如果向資深道行法師求取文昌符，並將符放於辦公枱上，亦有意想不到嘅功效。

咪亂堆雜物

由於文昌星宜靜關係，故此布局應以寧靜優雅為主，座椅要靠牆，有依靠之意，否則座椅後空曠以致背後冇靠山，則會令人欠缺安全感，從而亦令運勢減弱。而書枱可放置於窗旁，令光線充足，並且空氣流通，但要注意唔好向窗，避免因此而分心。文昌位置切勿堆放雜物，最忌陰暗又潮濕或有異味，會減弱文昌運氣氣場之餘，亦有損健康及導致精神不振。

十二生肖強運飾物

林師傅表示透過佩帶合適嘅飾物亦可以增強文昌運，飾物形狀以長方形、塔形或圓形為佳，如水晶、曜石等，必須色澤鮮明，以綠色為主調，並可根據十二生肖所屬五行嚟配顏色，自然讀書同工作都咁醒神啦！

十二生肖增運顏色

雞：粉黃 兔：粉藍

狗：粉紫 龍：粉紅

豬：金色 蛇：粉綠

鼠：金色 馬：粉綠

牛：粉紅 羊：粉紅

虎：粉藍 猴：粉黃

揀啱溫習好時辰

溫習時間每個人都唔同，如果搵啱個人溫習吉時，讀起書嚟自然會事半功倍。唔知大家所屬生肖嘅最佳溫習時間係幾時呢？不過林師傅指某啲時段喺日常生活中難以利用，但可作為參考之用。

十二生肖溫習吉時

雞 子時（11:00pm~1:00am）

狗 申時（3:00pm~5:00pm）

豬 寅時（3:00am~5:00am）

鼠 卯時（5:00am~7:00am）

牛 酉時（5:00pm~7:00pm）

虎 巳時（9:00am~11:00am）

兔 午時（11:00am~1:00pm）

龍 申時（3:00pm~5:00pm）

蛇 申時（3:00pm~5:00pm）

馬 酉時（5:00pm~7:00pm）

羊 酉時（5:00pm~7:00pm）

猴 亥時（9:00pm~11:00pm）

拜文昌帝君有步驟

拜祀時，用香燭衣紙及供品祭祀，供品可素可葷，但按習例一定要帶備葱同芹菜，取其諧音「聰聰明明」及「勤勤力力」。上香後，將葱同芹菜喺香爐上順時針轉3個圈，取其神力加持，然後帶返屋企掛喺房中，分幾日煮餸食用。此外，如果已買文昌風水擺設，例如毛筆或文昌塔，亦可帶同到文昌廟，喺香爐上轉三圈，以神力加持。在職人士除準備香燭衣紙及供品外，可帶備文具喺香爐上順時鐘轉3圈，然後隨身攜帶自用。如果唔想去文昌廟同人逼，可於家中設一香爐，做法跟喺文昌廟拜祀一樣便可。

撰文：林國豪

攝影：陳世昌

模特兒：Yui@Moguls、Ahyana@Moguls

鳴謝：玄學家林惠江