PandaCute電競少女賀年 旗開得勝
雖然一連四天紅假經已放完，但好多學生哥都未返學，各人嘅Holiday Mood猶在，相信呢幾日會繼續拜年歡聚。香港電競戰隊PandaCute嘅5位少女，就趁住新春期間打機聯誼，大玩PS VR虛擬實境遊戲和懷舊迷你紅白機，仲推介近期熱爆嘅電競手遊，一於睇吓佢哋嘅賀年打機推介！
英雄聯盟電競知多啲
《英雄聯盟》（League of Legends）是由Riot Games開發的多人線上競技場遊戲（MOBA），玩法以即時動作戰略為主，由於遊玩打法基本完全免費，主要營收來自玩家購買遊戲虛擬物品及英雄外觀等，所以廣受Gamers歡迎。廠方表示全球玩家人數近一億人，而且每個賽季均舉辦世界電競大賽，以去年10月於美國舉行的大賽為例，冠軍隊伍韓國SK Telecom T1便贏得200萬美元獎金。
手遊篇 Deer：《傳說對決》爽快推塔
PandaCute去年尾遠赴台灣跟周杰倫電競隊J Team集訓一個月，5個女仔每天苦練《英雄聯盟》（簡稱LoL）10小時以上，所以返到嚟香港過年，隊長Deer想玩手遊輕鬆一下，她推介線上推塔玩法的《傳說對決》，一大班Friend熱鬧團戰。Deer解釋：「《傳說對決》以5 Vs 5團戰形式，由於玩法有點似《LoL》，都是分上、中、下路三線推塔打法，所以好易上手。而且角色有啲似《LoL》，出招又華麗，最鍾意隨機『黯影夜崗』模式，平均5至10分鐘打一場夠爽快。」
夢兒：《獵神》20人大戰
隊員夢兒則鍾意玩同屬MOBA類型的《獵神》推塔手遊，貪佢戰術玩法、防禦分布等似足《LoL》，連坦克、法師、弓箭手等英雄職業也雷同，而角色造型帶有港漫感覺，最特別是支援10 Vs 10「命運之地」大混戰，20分鐘內鬥搶資源點取勝。夢兒補充：「好少手遊可以做到20人連線對戰，而且地圖範圍夠廣，好多《LoL》戰術都可以在此Game用得到，最近官方仲搞埋電競比賽，吸引不少年輕人玩！」
主機篇 Lily：《The Playroom VR》合家歡對決
虛擬實境遊戲熱爆Game界，PS VR更被人搶到斷市，Lily就話今個周末會去朋友屋企玩：「之前喺活動試玩PS VR，以《Driveclub VR》飆車都唔會暈，反而玩《生化危機7》就有少少驚，不過新年梗係玩合家歡嘅《The Playroom VR》！」遊戲支援共享屏幕功能，就算其中1人戴住PS VR眼罩，其他人都可以手掣操控，她續說：「《The Playroom VR》內含5款小遊戲，推介《怪獸大逃亡》，戴住PS VR眼罩嘅玩家負責扮怪獸，其他玩家用手掣進行對戰。」
Mo：迷你紅白機 經典重溫
任天堂新主機Switch要等到3月3日才上市，幸好有迷你紅白機（Nintendo Classic Mini Family Computer）讓玩家頂癮。Mo表示：「主機收錄30款遊戲，女仔可以玩《孖寶兄弟》系列、《孖寶醫生》等，男仔可以玩《雙截龍II》、《惡魔城》等，雖然操作唔算難，但易學難精，勁佩服當年可以輕鬆爆機嘅高手。」她大讚遊戲畫面可選擇「CRT Filter」模式，模擬番當年電視機橫紋的懷舊感覺，仲提供4個儲存空間可以隨時Save遊戲進度。
電玩篇 Lau：《Overwatch》暢玩遊樂場
PandaCute平日狂練《LoL》，成員之間各自會玩其他Game消磨時間，Lau可說是《Overwatch》（鬥陣特攻）粉絲，最近遊戲更新了「遊樂場」功能，是她每晚暢玩嘅好地方。「平時玩《鬥陣特攻》都係6 Vs 6以第一身射擊競技，可以揀護送目標、鬥搶控制點或者鬥快佔領陣地。新增的Arcade遊樂場模式則容許1 Vs 1或3 Vs 3對戰，每場打得更爽快。另加入限制重複英雄條件，咁就唔怕對手全部揀晒『肉盾型』溫斯頓屈機。再者每逢節日例必有新亂鬥模式，可以免費試新角色造型，所以新年上網勁熱鬧！」
打機配件 「紅」運當頭
中國人過年最緊要講意頭，雞年想打機旗開得勝，不妨買番款紅噹噹嘅打機周邊配件，一定鴻運當頭！
撰文：廖俊斌
部分攝影：陳世昌
查詢：
（a）2341 2356
（b）2359 7998
（c）3188 5208
（d）www.microsoftstore.com.hk