把握財運贏到荷包脹

今年丁酉雞年個個都想有咁大發咁大！想發達，最緊要知道今年嘅財位，實行將正財同偏財統統袋落袋。我哋請嚟梅花易數專家常歡師傅為大家教路，睇吓點樣可以吸盡所有財氣。

雞年財星方位

2017年丁酉雞年嘅正財位喺正東方，而偏財位則喺正北方。常師傅表示如果喺正東方位擺放紅色或紫色嘅物件，好似如意結咁，就能夠催動正財運。另外，喺正北方擺放黃色或啡色嘅石頭或水晶，自然可以令橫財運得到提升。

對做生意或食八方飯嘅朋友嚟講，人緣絕對重要，今年嘅桃花位坐落於東南方，喺呢個方位擺放風車或風車形擺設嘅話，不但有風生水起嘅寓意，仲可以提升人緣運。另外，今年嘅文昌位喺東北方，喺呢個方位擺放水種植物，例如富貴竹，有助提升學習能力及增進靈感。

12生肖流年財運

自己所屬生肖嘅流年財運如何？常師傅認為各生肖流年財運各有唔同，只要搵啱催財顏色嘅話，財運順利者固然財運更暢旺，稍為失色者亦可減輕受影響嘅程度。

梅花易數專家常歡教大家吸盡財氣。

鼠（1960年、1972年、1984年、1996年、2008年）

肖鼠嘅朋友財運相當唔錯，獲得吉星「太陰」嘅照臨，主貴人幫助。想喺今年創業，或者謀求新發展，容易得到貴人嘅幫助而變得順利。不過，力不到不為財，凡事親力親為，多勞先至可以多得。想提升財運嘅話，多穿戴金色服裝或飾物。

紅色心形水晶有助肖牛朋友增強財氣。

牛（1961年、1973年、1985年、1997年、2009年）

恭喜肖牛嘅朋友，獲「金匱」照臨嘅得利之下，不但正財有相當好嘅收穫，偏財更係旺勢強不可當。對於有意創業嘅朋友嚟講，有大展鴻圖嘅勢頭，打工仔亦獲得上佳嘅收入，至於投資界或想投資嘅朋友，更係相當順利！配以紅色衣飾，財氣更勁。

黑曜石可為肖虎朋友減少受到「小耗」嘅影響。

虎（1962年、1974年、1986年、1998年、2010年）

肖虎嘅朋友由於獲得「月德」拱照，正財有所增加，記得要做好財政預算，最好預備一定嘅資金儲備，皆因受到「小耗」嘅影響，支出亦會有所增加。不過又唔使咁擔心，多穿着或佩戴黑色衣服及飾物，可減少受影響嘅情況。

兔（1963年、1975年、1987年、1999年、2011年）

肖兔今年沖太歲，正財同偏財都較為不利，尤其係對投資嘅朋友嚟講，下每個決定之前都要小心，做好計劃先至出手。至於有博彩習慣嘅朋友，抱住少注怡情嘅心態，唔好因為意氣而妄動。穿戴藍色衣服或飾物，有助提升財運。

龍（1964年、1976年、1988年、2000年、2012年）

肖龍嘅朋友有「紫微」星，收入會穩定發展，不論正財定係橫財都有滿意嘅收穫。要留意，千祈唔好因為咁而大膽投資或創業，應該謹慎行事，凡事都要小心計劃先至最為恰當。穿着紫色服裝，有助增強財運。

綠幽靈可以改善肖蛇朋友嘅財運。

蛇（1965年、1977年、1989年、2001年、2013年）

肖蛇則要小心自己個荷包，受「空亡」星影響，代表破財同受騙，宜守不宜攻。對於計劃轉工、創業或想投資嘅朋友嚟講，更尤為小心。凡事避免過於相信他人，應自行分析事情利弊至作出決定。不妨多穿戴綠色衣服或飾物，有助改善財運。

馬（1966年、1978年、1990年、2002年、2014年）

肖馬嘅朋友獲得福星「天德」照耀，有云有福自然有祿，打工仔有升職兼加人工嘅機會，不但財運上有所增加，地位亦獲得提升！至於經商嘅朋友，亦係財來自有方。大利顏色為青色，不妨多穿着呢種顏色嘅衣飾，財運更為有利。

羊（1967年、1979年、1991年、2003年、2015年）

肖羊者不論喺投資、創業或事業上都要相當小心，非但冇吉星照臨，反而有唔少凶星。投資同創業上所面臨嘅阻礙相當多，打工仔亦會遇到唔少困難，凡事謹慎而行，避免喺投資同工作上有大動作。想減低凶星嘅影響，多穿戴紅色嘅衣物或飾物。

肖猴朋友大利啡色，擺放木製相架財運更旺。

猴（1968年、1980年、1992年、2004年、2016年）

肖猴嘅朋友財運相當旺盛，獲「金輿」相助，聽個名都知道唔使為財而煩惱，不論任何投資都能獲得超出預期嘅收穫，而打工仔嚟講，亦有相當好嘅財勢，不乏加人工嘅機會。想財運更旺，多穿啡色衣飾。

雞（1957年、1969年、1981年、1993年、2005年）

由於犯太歲，肖雞嘅朋友宜守不宜攻，不論喺投資定投注上，唔好太過衝動。打工仔嚟講亦唔好諗住有太大嘅發展，反而應多加留意自己嘅工作。今年嘅大利顏色為黃色，可減輕財運受影響嘅情況。

狗（1958年、1970年、1982年、1994年、2006年）

肖狗嘅朋友終於撥開雲霧見青天！獲吉星「太陽」照耀，財運亨通，發展更係相當順利。對於經商或有投資計劃嘅朋友嚟講，今年更係大利，回報相當可觀。今年大旺紫色，多穿這種顏色嘅衣飾有助催谷財運。

肖豬朋友想運勢更加旺，就要佩帶金色飾物。

豬（1959年、1971年、1983年、1995年、2007年）

如果想轉工、創業、投資或投注，仍未有頭緒嘅話，唔使擔心，肖豬嘅朋友今年有吉星「天乙」扶持，凡事都能得心應手，任何計劃同決定都會獲得貴人嘅幫助，正財同偏財自然獲利唔少！單身人士遇到心儀對象嘅機會亦大增。想運勢更加旺，多穿金色衣飾。

辦公枱風水陣

辦公枱係好多打工仔嘅搵食地盤，既然咁重要梗係要擺個納財風水陣。常師傅表示枱頭近中央位置，擺放魚缸或有流動水嘅擺設，有助催動工作運，升職易啲嘅同時亦可化減是非。唔想工作上孭鑊，喺辦公枱嘅西位擺放紅色嘅擺設，減低出錯嘅機會。

橫財六合常中

大年初五係新春金多寶開彩嘅日子，頭獎估計可達8,000萬元，一注獨中絕對係每個人嘅夢想。常師傅表示今年嘅六合彩利藍色，同埋帶有「1」字嘅號碼，咁大家知道點揀冧巴啦？此外，位於香港北方嘅投注站落飛，更為有利。

股市預測

常師傅以大年初五巳時開市日期及時間卜卦，正月為1數，初五為5數，巳時為6數，用梅花易數卜卦後得出「天風姤」、「變」、「澤風大過」，預測年初股市會比較淡靜，各樣事情都喺準備狀態，應小心謹慎及持觀望態度。到年中，重磅股及中資股將有大量利好消息，市場氣氛極好。年尾出現回落之勢，所以最佳入市時間應於夏天至初秋。