達人漫談 iPhone十周年
第一代iPhone由「教主」Steve Jobs於2007年1月9日發表，它是全球第一部Multi-touch手機，打破了手機只能講電話、玩貪食蛇等傳統思維，還記得教主用雙指示範放大縮小相片，全場掌場雷動，呼歡聲不絕，小記在家中更叫了出聲！歲月如梭、光陰似箭，輾轉十年，iPhone影響了人類歷史、業界生態，影響了你同我，更影響了唔少人。以下幾位由生活到生計已離不開iPhone，即睇吓佢哋點講！
第一代最難忘
「最難忘梗係第一代啦！當時有SIM Lock，打唔到電話兼只能用Wi-Fi上網。我是全港第一個用到Turbo SIM解鎖，嗰陣時一部機從美國買回來約HK$6,000左右，但解鎖後可轉賣HK$16,800，扣埋各樣成本每部利潤差不多有5,000蚊！iPhone代代都有得炒，記憶中4同4s最瘋狂，因為內地無得賣所以炒得最耐，嗰時條Bumper係免費送，但連盒放都賺到兩百幾蚊，所以好多人拎嚟放！當然收iPhone唔係穩賺，好似5s時就曾收過泥膠機，重量跟新機一樣，但打開包裝後入面全是泥膠，蝕咗唔少錢呀！踏入新一年，我就想iPhone變化多啲，多些噱頭，始終無進步即係退步，用家悶就點都炒唔起啦！」
G-World負責人 劉志剛 Lo哥（先達首席分析員）
帶領科技發展
「我由iPhone 3G開始用，記得嗰時大家仍然關心語音功能，好似Visual Voicemail咁，但時至今日無人再理，反而更注重影相同拍片『分唇』，由此可見佢真係帶領住科技發展。Apple宣傳手法不嬲勁，好似當年iPod熱賣，廠方就把iPhone包裝成「篤到芒嘅iPod」，但諷刺是iPod最後卻被iPhone打死！最絕還是4s，那時新機剛剛發表，教主第二天便離世！iPhone亦衍生出好多學習班，我都教過，總算精彩過！至於未來，我預測iPhone終有一日會被智能手錶取代，但與其畀對手打死，不如畀自己打死，官方近年落力推Apple Watch，或許就是原因之一。」
大蘋果眾MACitizen會長 魏志豪 Derek
App概念擴展功能
「iPhone有好多個第一，佢係第一部手機讓用戶流動得到資訊，令人生活更精彩，但同時令大家變得愈來愈忙。佢亦係第一部手機引入App概念，令手機唔再局限於通話，功能無限擴展，亦衍生出好多寫App公司，令唔少人發達！過往十年，我曾經擔心過iPhone會否如當年Macintosh般被淘汰，因為同樣是封閉系統，對手Android又愈出愈平，但事實證明擔心是多餘，無論是Steve Jobs年代，還是現在Tim Cook主政，iPhone聲勢始終無弱過！新功能方面，我期待有朝一日可無線充電，因為現在有AirPods了，若做到無線充電，它便成為一部真.無線電話，咩都唔使插你話幾方便！」
Mactivity負責人 陳俊明 Johnny
撰文：陳志滔