金黃芒草5招必攝技

第1招：背光凸顯意境

影芒草若果要展現出意境，就要注意採光和環境，Kelvin指：「最理想就係使用背光嘅採光方法，然後相機再加一至兩級曝光，咁影出嚟嘅畫面會比較柔和，而且會有金黃色嘅光邊凸顯一條條嘅芒草。若果使用正光拍攝，雖然能夠展現出芒草的層次感，但由於光線比較均勻，沒有太大的變化，因此在構圖上要有鋪排。」

第2招：人像拍攝 善用色彩對比

唔少人去影芒草都會三五知己一齊上山，假如要配合人像拍攝，就要從服飾方面着手，Kelvin稱：「始終芒草嘅色調都係一片金黃，假如想突出人物主體的話，就建議穿着紅、綠呢類鮮色嘅衫，透過顏色嘅強烈對比，讓焦點集中在主體身上。若然要表現出環境嘅和諧性，主體則可穿上灰、白淺色衫，令人物融入芒草嘅環境之中，冇任何違和感。」

使用背光嘅採光方法，能夠透過光邊勾畫出芒草嘅輪廓，而且光線亦比較柔和。	以正光拍攝嘅芒草受光均勻，所以要從構圖着手，不妨以小路和山景襯托。	利用色彩對比的方法拍攝人像，只要主體穿上鮮色衣服，就能夠在芒草中凸顯出來。

第3招：長焦距呈現密集性

既然要行上山影芒草，就唔會出動所有鏡頭，必定要審慎選取器材，Kelvin強調：「其實每支鏡頭都有唔同特性，我自己就會帶50mm F1.8大光圈鏡頭和70~200mm長焦鏡頭，前者能營造淺景深效果，從而突出主體；至於後者可表現出強烈嘅壓縮感，就算山上芒草稀疏，用長焦鏡影出嚟感覺會變得好密集。另外我亦都會用16~35mm廣角鏡影，利用透視感記錄廣闊嘅環境。」

除了拍攝大環境外，亦可以特寫芒草，透過大光圈鏡頭營造淺景深效果，從而凸顯拍攝主體。	70~200mm長焦鏡頭擁有壓縮嘅特性，令前後景物嘅距離感覺拉近，令芒草會顯得好密集。	50mm F1.8大光圈鏡頭主要影人和芒草特寫，加上重量輕巧，方便帶上山。

第4招：留意天氣條件

事實上影芒草都要夾天氣和時間，皆因若然濕度太高，芒草就會聚集在一團，Kelvin解釋：「適逢呢幾日冷鋒殺到，相對濕度會較高，等冷鋒過後天氣會變得乾燥，芒草就會自然散開，影出嚟嘅畫面會靚好多。至於拍攝時間最好喺日落時間，太陽光照射出金黃色光線，不過建議在日落前一個鐘到達目的地，以便準備位置、構圖、方向，咁就唔會手忙腳亂。」

日出和日落係最佳嘅拍攝時間，光線柔和之餘又呈橙黃色，建議提早到達目的地準備。	拍攝時應盡量使用RAW格式，以便後期調校白平衡，冷色調有着柔和效果，而暖色調則感覺溫暖，視乎個人喜好調校。	大東山幾乎成個山頭都係芒草，加上有爛頭營襯托，畫面夠唯美，但係交通相當不便，要靠雙腳行大約兩個鐘先上到山。

第5招：慎選地點 量力而為

芒草並唔係咩稀有植物，香港唔少地方睇得到，例如飛鵝山、大東山、大帽山、馬鞍山等，分別在於芒草嘅密集程度，以及地點便利性，Kelvin表示：「要數交通最方便肯定係飛鵝山，自駕沿飛鵝山道就到達東面，再行5分鐘就會抵達目的地。但係芒草最密集非大東山莫屬，而且有獨特嘅爛頭營襯托，但無論邊條路線上山都有一定難度，要量力而為。」

Kelvin Yuen小檔案

經常到訪香港大大小小山頭拍攝不一樣的香港，早前憑藉於飛鵝山拍攝的相片，於「2015國家地理攝影大賽」中獲得了青年組冠軍及佳作獎項，現在更擔任香港旅遊發展局「Great Outdoors Hong Kong 2016-2017」攝影顧問。另外，亦有跟德國國家旅遊局、National Geographic及不同大型品牌合作。

撰文：黎子豪

相片：由受訪者提供