Xplorer Mini塗鴉摺機體感升空

無人機愈出愈細部，現時玩航拍唔需要再勞師動眾，又要駕車又要孭背囊，好似Xiro全新Xplorer Mini四軸無人機，不僅採用時下流行嘅摺疊式設計，單手都拎得起，最特別係外殼加入塗鴉風格，預計11月11日正式賣街，一於搵航拍專家Lock Sir帶大家到下城門水塘試飛。

售價：$3,499<br>Xplorer Mini採用四軸設計，機身備有塗鴉之餘，螺旋槳還有不同顏色。

售價：$3,499
Xplorer Mini採用四軸設計，機身備有塗鴉之餘，螺旋槳還有不同顏色。

更換外殼維港主題

外形有啲似FPV穿越機嘅Xplorer Mini，摺疊方式跟早前介紹過的DJI Mavic Pro、Yuneec Breeze不同，只要按下軸臂中間嘅按鈕即可開合，螺旋槳更毋須摺疊或拆下，收納後嘅Size同隻手掌差唔多大，隨身攜帶更方便。Lock Sir指出：「Xplorer Mini嘅特色係加入塗鴉外殼設計，遲啲仲會出以維港景色為主題嘅『維港版』外殼，以及其他款式畀玩家替換。」航拍機都可以玩塗鴉和換殼，難怪佢成功拎到Red Dot Award 2016大獎！

於下城門水塘附近試飛，雖然戶外風勢較大，但航拍時依然穩定，操控自如。

按下軸臂中間嘅按鈕，就能夠將軸臂打開或收納。

機身不設雲台，改用190°魚眼鏡頭，而防震系統主要靠裁剪畫面。

防震系統裁剪畫面

新機冇用常見嘅三軸雲台，改以190O視角嘅魚眼鏡頭，所以拍出嚟嘅畫面會稍稍變形之餘仲相當搖晃。Lock Sir強調：「若然要保持畫面穩定，必須啟動內置防震系統，其原理是藉着裁剪畫面來提升穩定性，同時可減少變形情況。雖然無人機能夠拍攝1,080p畫質，但經過裁剪後解像度會大打折扣。」畫質唔算出眾，幸好機身內建雙GPS定位系統，搜尋和定位速度都幾快，而且底部設有超聲波和影像定位系統，以便在室內環境操作。

底部加入超聲波和影像定位系統，就算在室內飛行都可做到懸停動作。

智拍模式能夠鎖定主體（綠框），做到自動跟隨拍攝。

從畫面可見未開啟防震功能時，邊線嚴重變形，一旦開啟防震後就能修正。

手機App 智能操控

由於Xplorer Mini跟機沒有遙控器，主要經Wi-Fi連接《Xiro Xplore》手機App操控，所以接收範圍最多只有100米，而飛行高度上限是50米。App內不僅提供虛擬操控桿，亦鮮有地支援體感操控，實測時只要擺動手機，即可控制無人機飛行方向，Lock Sir表示：「體感操控嘅反應都幾快，而且手機App內建多種智能功能，如自拍模式可令無人機環繞或跟隨玩家。至於智拍模式就能夠在畫面框出指定主體，例如人或汽車等作自動追拍，啱晒新手玩。」

App提供多種操作方式，當中體感操控能夠透過擺動手機去控制方向。	跟機附有4個螺旋槳保護罩，勝在易裝又易拆。	加入香港特色靚景嘅「維港版」塗鴉外殼現正製作中，推出日期待定。
Big Head創作總監兼航拍達人Lock Sir指新機穩定性和操控性都算高，惟畫質有待改善。	1,650mAh電池能夠連續飛行約15分鐘，以摺疊機來說都算襟玩。	摺疊後嘅Xplorer Mini，面積同部4.7吋iPhone差唔多大，方便隨身攜帶。