旗艦親生仔！ Pixel XL攝力最強

提起Google手機，很多人會諗起Nexus系列，皆因廠方幾乎每年都會推出以Nexus命名嘅「親生仔」手機。不過今年終於打破慣例發布全新Pixel系列，當中大芒版Pixel XL近日火速到港，唔單止外形靚仔，最估唔到嘅係拍攝質素極佳，即使貨源短缺炒至近$8,000，一樣大把人入手！

售價：$7,880

機背鴛鴦配色

Pixel系列手機其實分為Pixel及Pixel XL，兩機同樣由台廠HTC代工製造，採用圓角全金屬機身，配以2.5D弧形機面玻璃，當中前者採用5吋全高清芒，後者改用5.5吋2,560×1,440解像度AMOLED屏幕，今次到手實測的Pixel XL，機背破格加入鴛鴦色調，上1/3位置用上白色玻璃物料，下2/3位置則以銀色金屬物料，外觀辨識度幾高。小記認為扣分位係機面不設任何實體按鍵，且屏幕下方嘅白位嫌略太多，如果屏幕佔機面比例再大啲，又或加番Home鍵會更好。

頂級硬件規格

作為旗艦親生仔，硬件當然有番咁上下，Qualcomm Snapdragon 821處理器加4GB RAM，配以Android 7.1系統屬頂級規格。雖然機身不設記憶卡槽，但廠方為用家提供Google Photos無限空間，可儲存相片、影片等檔案。機背仲加設Pixel Imprint指紋辨識器，最多可加入5組指紋提升保安程度。要留意的是，未設定指紋前，指紋辨識器唔可以當作屏幕開關鍵使用，但設定指紋後，指頭一印即可為手機解鎖兼着芒。

1,230萬像素主鏡頭，提供雙LED閃光燈。

改用USB Type-C介面，兼容快速充電功能，充電15分鐘即可使用7小時。

不設記憶卡槽，僅備有一個nanoSIM卡槽。

影相力壓對手

影相質素可以話係Pixel XL嘅最大賣點，新機搭載1,230萬像素F2.0大光圈鏡頭，小記試拍時發現其拍攝新介面相當易用，取景時可於畫面上下掃動來調校曝光補償，更內置自動HDR+功能。即場以出名影相靚嘅iPhone 7和Galaxy S7 Edge比併，發覺日光下成像質素分別不大；但影夜景時Pixel XL就明顯佔優，無論雜訊控制、暗位細節以至色彩呈現都較佳，難怪外國傳媒測試完都大讚佢嘅拍攝質素，更於DxOMark Mobile評測網站獲得同級最高嘅89分，表現力壓一眾對手。

內置夜燈模式，將畫面轉成Warm色調，夜晚睇得更舒服。

拍攝介面簡單，上下掃動畫面即可調校曝光補償。

測試區<br>於低光環境下以Pixel XL、Galaxy S7 Edge及iPhone 7（上至下）拍攝，發覺Pixel XL嘅雜訊控制能力最強，街燈下嘅樹葉及遠景嘅大廈放大後依舊細緻清晰，亦沒有出現偏色問題。

測試區
於低光環境下以Pixel XL、Galaxy S7 Edge及iPhone 7（上至下）拍攝，發覺Pixel XL嘅雜訊控制能力最強，街燈下嘅樹葉及遠景嘅大廈放大後依舊細緻清晰，亦沒有出現偏色問題。

語音操控功能

軟件方面亦有驚喜，全新Android 7.1介面有新鮮感之餘，亦換咗功能表嘅使用方式，排列得更整齊貼心。最實用係加入畫面分割功能，長按Recent Apps鍵可將畫面分割同時開啟兩個Apps。另一新功能Google Assistant（個人助理），當用家長按虛擬Home鍵或講「OK Google」即可啟動語音操作功能，例如查詢並顯示天氣預報、開啟指定Apps、開關Wi-Fi及藍芽等，用法有啲似Apple嘅 Siri；不過想玩語音功能就一定要將系統語言切換至英文，希望日後可支援廣東話啦！