Volkswagen Passat 280 TSI ACT Business Line踏上行政級

近年SUV車型大熱，傳統Sedan在全球的市場佔有率都有下降趨勢，中型行政房車的競爭尤其激烈，歐日品牌都各出奇招，你一拳、我一腳，鬥得難分難解。最近，Volkswagen為Passat 280 TSI ACT帶來了Business Line，擺明車馬主打商務實用客，刪減部分非必要的豪華設備後，車價低於$30萬，大大降低了Executive Sedan的門檻。

Volkswagen Passat 280 TSI ACT Business Line<br>售價：$299,980

Volkswagen Passat 280 TSI ACT Business Line
售價：$299,980

瘦身版親民價

今代Passat比過往歷代都要豪，望落仲多咗幾分貴氣，最正的地方莫過於售價依然親民，並未因升級而開天索價，售$299,980的Passat 280 TSI ACT Business Line，個價同日本車絕對有得Fight，話晒Passat係德國車，去年仲要係「歐洲年度最佳汽車」得主，咁已經係信心保證啦。呢部Business Line賣平咗幾萬，咁少咗啲咩呢？主要都係LED頭燈、天窗、三區恒溫等，自問唔一定需要呢啲設備，只求慳油實用的話，呢部「瘦身」版Passat其實幾抵用，當「腳車」就一流。

前排座椅以全電動調校，並附設按摩功能。

全車座椅皆用上Vienna皮革包裹，帶來優質乘坐感。

後排設有冷氣送風口，但沒有獨立冷暖調校。

汽缸管理助省油

或者你會懷疑，一部超過4.76m長、可輸出扭力250Nm的Passat，慳油極都有個譜，但別忘記Volkswagen的1.4公升TSI引擎出晒名慳油，再結合七前速雙離合器波箱的動力總承，早已建構出節能的先決條件。值得留意是呢部Passat加入了一個名為「ACT」的引擎汽缸管理系統，當汽車在巡航、落斜時，對動力沒有高需求的情況下，引擎會暫停其中兩個汽缸的點火程序，省卻無謂的燃油消耗，廠方公布的油耗數據為5.1L/100km，雖然在本港路面要好「就住腳」先可去到呢個水平，但一般返放工要做到每百公里6至7L，難度卻不大。ACT是全自動進行，駕駛者毋須操心，幾時用四缸或兩缸全由電腦控制，轉換過程非常Smooth，基本上是完全感覺不到，不會影響舒適性。

車尾用上LED燈，顯得更時尚。

尾箱空間極為闊落，可輕鬆擺放大型行李篋。

引擎導入了ACT技術，每百公里油耗可進一步減少0.4公升。

高水準設備

今代Passat建基於MQB底盤平台製造，車重較上代減輕多達85kg，其好處不但可節省油耗，對提升性能及操控都有幫助，開去郊區彎路走轉，感覺輕盈兼少了累贅感，賦予更大的駕駛樂趣。儘管Passat 280 TSI ACT Business Line只是車系的入門版，其動力輸出及設備都有番咁上下水準，既具備8.4秒完成0~100km/h加速的能力，還標配了車尾LED燈、Vienna皮籠、Composition Colour觸控屏幕、駕駛席按摩功能、KESSY等設備，逐Part攞出來秤都唔驚你。揸厭日本車想轉吓口味，呢部Passat啱唔啱你心水？

車廂雖刪減了部分設備，依然不失豪華感。	中控台設有Composition Colour觸控面板，而且連接了8個喇叭。	Park Distance Control屬標準配備，車身前後與阻礙物距離一目了然。
放大圖片	加$1萬可升級至18吋Dartford輪圈，輪胎尺碼為235/45 R18。