鬧市BBQ招積新食法

大肚時要戒口，以為BB出世後可以安安樂樂食餐好，點知忙到一日就算有48小時也不夠用，哪有閒情去BBQ？媽媽們毋須絕望，今日為大家介紹新的燒烤體驗，不但有名廚親自主理的到會服務，也有凍肉店將高級食材送上門，最重要是不用長途跋涉帶BB去燒烤場，身處鬧市一樣享受到BBQ的樂趣。

星級大廚幫你燒

以為帶住BB去燒嘢食會好狼狽，採訪當日卻見一班爸爸、媽媽、嫲嫲好輕鬆，原來是因為Invisible Kitchen的老闆兼大廚Tom Burney幫他們安排好一切食物。媽媽們有讚無彈，皆因名廚Chef Tom出品必屬佳品。來自英國曼徹斯特的他曾在英國米芝蓮3星餐廳The Fat Duck與2星餐廳The Square掌廚，數年前定居香港，並在工廈內開設了Invisible Kitchen，專門供應到會餐單，同時亦上門做私人廚師，奇洛李維斯、「雷神」基斯漢斯禾夫、Lady GaGa、Kylie Minogue等國際巨星訪港都指定由他照顧膳食。

奇洛李維斯、「雷神」、Lady GaGa來港時都指定要由Chef Tom主理膳食，這幾百蚊絕對畀得過。	嚴選6安士安格斯牛肉製作芝士漢堡，肉汁豐盈，配搭略略燒過的芝麻包、新鮮洋葱及車打芝士，邊個話BBQ一定要食超韌牛扒？	堅持以優質進口食材製作美食，所有自家醃製的食物都健康無添加，難怪大受媽媽們歡迎。

非一般到會服務

享用國際巨星的星級服務絕非天價，燒烤到會餐單主要分為Classic及Deluxe兩種，Classic每位收費$360，食物包括3盤沙律、燒粟米、安格斯牛肉芝士漢堡、英式熱狗配坎伯蘭香腸、烤五花肉配三文魚、虎蝦串燒、牙買加燒雞、美國有機雞髀、新西蘭羊肉，以及地中海蔬菜串燒。至於Deluxe則每位收費$540，除了沙律增至4盤之外，漢堡包亦改用和牛製作，而最大賣點是包辦廚師與侍應服務，連清理工作也有專人負責，坐定定就可以食餐好。

Invisible Kitchen

網址：www.invisiblekitchen.com（需3天前預訂）

價錢：Classic每位$360、Deluxe每位$540（15位起）

其他好選擇

望住維港燒嘢食

灣仔王子酒店頂樓的King's BBQ地點就腳，每晚6點半至深夜12點半都會開放燒烤場地，由專人幫你透好爐，鍾意自攜食物又得，亦歡迎大家兩手空空上來任飲任食，食物種類算多但較大路，如金菇、腸仔、牛丸、多款口味雞翼、香茅豬扒、黑椒牛扒等選擇，還有秋刀魚、多春魚、魷魚等海鮮。燒烤場賣點是對正維港，論靚景無得輸，國慶、大年初二放煙花更要提早兩個月訂位。

食物不是頂級貨色，但種類尚算多元化，加上地點就腳又有一望無際的維港景色，在鬧市燒烤別有一番風味。	毋須同人逼，遇上國慶、新年，還可以一邊食雞翼一邊居高臨下欣賞煙花，不過就要趁早訂位。	燒烤食品源源不絕供應，保證食得飽，汽水果汁任飲，Asahi或1664 Blanc啤酒則$100/2杯。

查詢電話：6313 2928（需3天前預訂）

價錢：周一至四$368/位、周五至日$398/位、3歲至10歲半價（6位起）

明星及闊太之選

主打頂級外國凍肉的Bandone Premium Food，扒類、海鮮、醬料全部都由3位老闆精心挑選，不但吸引到一班家住大埔半山的闊太幫襯，連謝安琪、胡杏兒、田蕊妮等也是熟客仔。由於不少客人都喜歡呼朋喚友到家中燒烤，因此小店特別推出6至8人及10至12人兩款燒烤包，以後者為例，有齊安格斯肉眼扒、安格斯西冷扒、安格斯牛仔骨、新西蘭羊骨扒、美國穀飼豬扒、美國穀飼雞中翼及西班牙黑毛豬BB骨，還有挪威三文魚、越南虎蝦、美式熱狗腸、日本一口番薯仔及韓國芝士獅子狗卷，以及Jamie Oliver即磨燒烤調味料。小店還設免費送貨服務，直送燒烤場地都無問題，到時一定恨死隔籬。

10至12人套餐盛惠$1,680，除開每人只需$140就可以食到超大塊的安格斯牛肉、新西蘭羊扒、西班牙黑毛豬BB骨、穀飼雞翼、三文魚扒等，抵食。

扒類都由店主自家醃製，經常推出新口味，泰式風味與迷迭香就最受歡迎。

查詢電話：2638 2777（需3天前預訂）

價錢：6至8人BBQ套餐$980、10至12人BBQ套餐$1,680

撰文：楊雅菁

部分攝影：郭凱敏、陳世昌