伍家謙×Keyman同聲同氣踢Winning

兩星期配萬條對白

想當年有機迷將阿叔嘅講波對白Key落《Winning Eleven》，喺網上成為熱話，足以證明足球Game加廣東話旁述有一定市場，估唔到《PES 2017》將此變成真。對於首次擔任足球Game旁述嘅Keyman和伍家謙來說，呢個經驗相當有趣，Keyman表示：「旁述嘅前奏由伍家謙負責，並且以不同語氣讀出球員名稱，而我就負責深入兼抵死的分析部分。」為了豐富對白，讓玩家於任何操作都有合適嘅旁述效果，他們用了兩星期灌錄上萬條對白。伍家謙解釋：「例如當玩家傳波畀美斯埋門，你就會聽到我緊張呼叫美斯名字，十足現場Live講波咁肉緊。」

伍家謙（左）和Keyman（右）試玩過新作後，異口同聲讚球員動作更逼真自然。	新作忠實收錄各隊球衣，造型一絲不苟。	強化系統AI後，玩家用同一招數屈機嘅成功率大減。

動作操控更逼真

遊戲性方面，新作基於Control Reality概念，改良接球和傳球等操控性，不同球員的控球觸感都有啲分別，唔係清一色「一腳到位」咁簡單。此外，Concept Arrange追加了緊逼防守、快速前場壓制等戰術，攻守布置等比上集更逼真。電腦AI亦變得聰明，如隊友撞牆接應、敵人搶波攔截等反應更快，令以往如兩翼沉底傳中等屈機招數變得難以奏效。難怪連玩開《Winning》嘅Keyman都話遊戲雖然易上手，但整體難玩咗，更具鑽研性。

遊戲另提供普通話旁述，由內地著名評述員王濤（左）和苗錕（右）負責。	以3D技術製作球員的人臉模型，美斯在遊戲中似足真人。	優化了球員的射門姿勢，唔似以前咁生硬。

巴塞隆拿強勢加盟

不僅操作逼真，藉着Fox Engine圖像引擎加持，球員和球賽視覺效果亦更震撼。伍家謙玩落最鍾意遊戲的天氣物理變化：「下雨天時足球會水花四濺，踢甩草皮時泥土有飛揚情況，冬天作賽時球員更會呼出霧氣，相當抵讚！」最吸引是新作加入巴塞隆拿、多蒙特以及利物浦3支勁旅，除了以最新3D技術製作球員人臉表情，令美斯、尼馬等球星如實呈現外，還收錄官方球場和球衣，未來更會推出球會的傳奇球員和歷代球衣等，令人期待。

遊戲收錄了效力德甲多蒙特的香川真司。

巴塞隆拿主場的魯營球場十足實景一樣。

DETAILS

類型：足球

發行：Konami

人數：1~2人（支援連線）

平台：PS3、PS4、Xbox One

推出日期：9月15日

售價： $318（PS3）、$428（PS4）、$398（Xbox One）

撰文：廖俊斌　

部分攝影：蔡浩文