船P新玩意3 2 1水上飛馳

3人齊玩：太空船

太空船可供3人一齊玩，玩緊嘅時候可以兩人企喺度一人趴喺度，又或者全部趴喺度都得，總之攞到平衡就唔會翻船，尤其是掟彎時嘅離心力十足衝咗上太空，揸唔實隻船隨時被拋落水。模特兒Seacole和Josslyn玩後表示：「玩太空船時3個人要合作將重心靠後，前面先至唔會入水，有時掟彎會令到太空船喺水面彈彈吓，要成個身傾側方可平衡。最重要係太空船唔似Wakeboard等水上活動，毋須任何技巧，就算冇運動細胞都玩得到。」

全程由快艇拖住玩，掟彎時嘅離心力都幾勁，夠晒刺激。	現場會提供救生衣畀玩家，確保安全。	Holimood創辦人Theo（左）和Bruce（右）表示，現提供多款遊艇套餐供預約，假日或旺季時最好預早一至兩個月Book。

2人Fun享：360飛船

玩完太空船之後，輪到外形好似艇仔嘅360飛船，叫得「360」係因為佢冇分前後左右，任何一面都可以向前，所以玩嘅時候會周圍轉。佢可以畀兩個人坐上去，又或者一個人趴喺度玩，試玩時兩個模特兒都捉到好實，行直線慢慢加速冇咩問題，不過一轉彎就成隻360飛船翻轉，結果梗係成身濕晒。模特兒表示：「兩個人玩好難夾到平衡，所以一坐上去就好易翻船，相反一個人玩時就定好多，玩落好似揸水上電單車咁，不過啲水會迎面衝埋嚟，建議將重心移後少少。」

360飛船可以一個人玩，有啲似水上電單車。	放大圖片	360飛船能夠畀兩個人對住坐或前後坐，掟彎時要轉動保持平衡。

1人快感：火箭

另一推介遊戲雖然叫做火箭，充氣後玩家需要穿上身，外形似足小露寶咁款，好處係就算入面着住救生衣都可笠上去，浮水力十足。另外玩家雙手要捉實塊浮板，畀快艇喺水面拖行。Seacole玩後覺得：「火箭喺3款水上遊戲中最好玩，玩緊嘅時候自己好似水上飄，高速飛馳時營造到滑翔效果，再加上快艇不停濺起浪花，甚至會將成個人拋起，爽呀！」

穿上火箭時外形似足小露寶，仲可以連救生衣一齊笠住。	玩火箭時需要捉實塊浮板，畀快艇拖住走。	3款水上遊戲都需要充氣，大約數分鐘就能完成。

網上預訂詳情

雖然Holimood備有多款遊艇套餐可揀，但夏天嘅船期經常爆滿，建議假日預早一至兩個月預約，而閒日嘅船期會比較鬆動，有期即可預約。如今次介紹嘅超激玩水遊艇套餐（WT01D），20人以下費用由$6,800（星期一至五）起，當中已包括快艇、滑水、香蕉船、獨木舟、飛碟、三角形充氣滑梯等，想玩火箭（+$500）、360飛船（+$500）、太空船（+$800）則需額外收費。而玩家可選擇於西貢碼頭或早禾坑碼頭出發。

放大圖片	三角形充氣滑梯 成層樓咁高嘅三角形充氣滑梯，可以畀幾個人齊齊瀡落水，中間位置仲可充當彈床。	特色充氣水泡 想浸吓水曬吓太陽，套餐亦包埋呢幾款充氣水泡，造型夠獨特，包括獨角獸、紅鶴等，坐上去影相一流。

WT01D超激玩水遊艇套餐

20人或以下：$6,800，之後每位+$200（逢星期一至五）

25人或以下：$11,000，之後每位+$350（逢星期六）

25人或以下：$12,000，之後每位+$350（逢星期日及公眾假期）

額外收費活動：火箭+$500、360飛船+$500、太空船+$800

撰文：黎子豪

攝影：盧展程

模特兒：Josslyn（Inflate）、Seacole

網址：yacht.holimood.com/property/28/