Galaxy C系雙雄金屬玩味

三色金屬機身

今次兩款C系新機均提供金、粉紅金及灰3色選擇，金屬機身加上圓角機側，配以機背上下天線位，整體都算靚仔，而且罕有地在中階機款加入4GB RAM，咁就唔怕多工作業時Lag機。兩機最大分別是C5採用5.2吋屏幕，C7則改用5.7吋大芒，前者搭載Snapdragon 617處理器，後者則用上Snapdragon 625處理器，配合Android 6.0作業系統，操作順暢兼穩定。小記測試時仲發覺兩機嘅電量表現唔錯，相信可以滿足大部分用家。

金屬機背摸上手涼浸浸，提供金、粉紅金及灰色選擇。	支援雙卡雙待，可惜其中一個卡槽要與microSD卡共用。	機底設有microUSB及耳機插口。
可自設個人化音效，因應不同用家來調校音色。	啟動UHQA高清音質技術後能提升音色，不過僅支援耳機。	以《AnTuTu》跑分獲逾60,000分，中階機嚟講表現不俗。

移植旗艦功能

其他規格方面，C5和C7均備有800萬像素前置鏡頭及1,600萬像素後置鏡頭，前者支援美白、瘦面及大眼效果，後者提供專業、美肌、連續快門、食物等模式，加上雙LED閃光燈，用嚟Snapshot一流。另一驚喜位係兩機加入大量旗艦機功能，包括機面下方嘅指紋辨識器、加強私隱及保安性嘅《My KNOX》等。還支援UHQA高清音質技術，開啟相關設定再插入耳機，無論播歌抑或睇片時，音質都會顯著提升。值得一提，兩機同樣支援雙卡雙待，並兼容GSM、CDMA、WCDMA、TD-SCDMA、FDD-LTE、TDD-LTE網絡制式，全球大部分電訊商都用到，簡直係旅遊恩物。

將遊戲Apps拉至「遊戲啟動器」內，打機期間可暫停提示訊息。	主頁向右一掃，即會轉到Flipboard頁面，睇新聞更輕鬆。	支援指紋辨識功能，最多可記錄3組指紋。
拍攝介面簡單易用，連按兩下Home鍵可快速啟動相機。	規格表

同場加映：Note 7定價$6,198　9月2日開售

Samsung機王Galaxy Note 7正式登陸香港，新機採用雙曲面玻璃設計，圓滑而不失手感；兩邊側屏微微彎曲玩盡Edge Panel功能，一按便能開Apps、睇新聞或觀看資訊。屏幕沿用5.7吋2K Super AMOLED，首度對應HDR串流電影，有助提升畫面細緻度。港版有鉑金、瑪瑙黑及珊瑚藍3色，惟早前公布的鉑銀色暫時未有推出時間。

心穎BB最鍾意Note 7嘅畫畫功能，好心急換機咁話！ 售價︰$6,198	S Pen壓力感應提升一倍，濕水畫圖都冇問題。	虹膜技術下，登記及解鎖速度都好快，惟留意建議使用距離為10吋內。

新機最突破是加入虹膜識別技術，用家望實機面的虹膜感應器一秒便能解鎖！叫得做Note，招牌S Pen當然唔少得，今代筆尖由1.6mm縮細至0.7mm，落筆時線條更精細，並加入更多懸浮指令，例如用筆指着詞彙就會彈出翻譯。其他規格包括2.15GHz雙核＋1.6GHz雙核處理器、4GB RAM及64GB ROM等，並提供microSD卡槽及IP68防水功能。新機將於9月2日在香港上市，建議零售價為$6,198，即日起至8月25日可經官網（www.samsung.com/hk/preordernote7）率先預購，名額5,000部。成功登記者最快可於8月26日領取，並免費獲贈價值$598之鏡頭組合連背蓋Lens Cover乙個。

撰文：林子聰、陳志滔

攝影：郭凱敏、張錦昌

查詢電話：3698 4698