首爾萬千呃Like賀潮店

「呃Like」這個詞彙，3年前才出現，如今已成為一眾網絡奴隸的膜拜之物。曾有研究指出，如閣下在社交網絡放了相片、文字或片段等，有人讚好的話，猶如吃了朱古力或贏了錢般振奮人心，心情會脫離谷底咁話。去首爾旅行，呃Like奴隸們的任務如常，在7月開張的Kakao Friends旗艦店，邊掃貨邊同8位搞鬼角色合照，轉頭到弘大的Florte Flower Cafe，戴上花花頭飾同閨密一齊打卡。親身經驗，Upload完照片不出15分鐘，已有過百人讚好，積累下來成千上萬也不足為奇，計落呢趟旅行真係去得好有「價值」呢！

新成員Ryan公仔，個樣好似啤啤熊，實情是沒有毛髮的小獅子，唔好搞錯呀。

任影唔嬲旗艦店

韓國通訊軟件當中，如果你只認識LINE，證明你Out喇，依家最紅的是Kakao Talk！而這個軟件同樣推出了一批萌爆角色Kakao Friends，雖然比LINE的一班卡通人物遲了1年登場，但這個後起之秀依然成功俘虜不少年輕人歡心，當中更包括了「少女時代」的泰妍及BTS的Jimin等K-Pop星級粉絲，可見其人氣！而首爾地區一早已有十多個售賣Kakao Friends相關產品的專櫃同專店，不過旗艦店剛於7月2日才正式登陸江南區。該店樓高3層，底層售賣毛公仔、文具同雜貨，2樓為運動用品、時裝及首飾部，當中以限定的陶瓷杯、穿上Hoodie服的Ryan公仔等屬搶手貨外，Kakao Friends仲同人氣韓牌8IGHT SECONDS及Bean Pole合作，推出聯乘服裝及銀包，所以連時裝精都可以痛快血拼一番。

不過旗艦店最正係任影唔嬲，就算唔買，淨係影相打卡都夠你玩足1個鐘，邊行邊影，發現8個Kakao角色公仔擺設在店內老是常出現，例如有迷人桃小姐Apeach、Hip-Hop友打扮的Jay-G、扁嘴鴨Tube等，大家都爭住要先「影」為快。而最受歡迎角色是新成員Ryan，高峰時期竟然有20多位顧客等候影相，紅過宋仲基咁款！除了以上提及的4個角色，該家族還有4位成員，包括扮兔仔的蘿蔔Muzi、有錢狗Frodo、老實貓Neo同鱷魚Con。每隻造型趣怪又盞鬼，難怪7月中親身到訪時，人潮依然爆滿，不過好在3樓設有Ryan Cafe，提供多款造型得意的Macaron、Cupcake等甜品，排到攰或者買到手軟都有休息Hea位。

周末到訪的話，無論入場還是畀錢，都要等成20分鐘，建議預定時間排隊。	水泡、露營櫈、Golf球等運動用品都有Kakao Friends嘜頭。	各款陶瓷杯為旗艦店限定產品，W9,900（約HK$69.7）/隻。
蜜糖（中）及咖啡味花生，各W1,000（約HK$7）。	汽車專用的空氣清新棒，每盒W12,900（約HK$90.8）。	Kakao Friends旅行套裝，W14,900（約HK$104.9）。
Neo（左）及Frodo原子筆，各W3,500（約HK$24.6）。	Yo Yo哋的Jay-G，外表剛強，但內心脆弱。	於開幕日賣斷市的特別版Hoodie Ryan，貨已返，Fans們可以繼續掃喇！
韓式杯緣子，手抱鱷魚Con的Muzi（左）及Apeach。	2樓有多張Kakao Friends掛畫，繼續晒萌。	位於3樓的Ryan Cafe，血拼完上去歎杯咖啡食件Cake，繼續打卡。
Ryan造型的朱古力味Cupcake，W6,500（約HK$45.8）。	（由上至下）Ryan、Apeach及Neo介指，各W19,000（約HK$133.8）。	連K-Pop紅人Jimin（上圖）及泰妍（下圖）都是Kakao Friends的粉絲。

Kakao Friends Flagship Store

地址：首爾瑞草區江南大路429號

營業時間：10:30am ~ 10:00pm

網址：https://store.kakaofriends.com

韓劇發現花花Cafe

首爾的弘大區，擁有一股青春活力，是年輕人的聚腳點。不妨偏離一貫的旅遊航道，出走壁畫街一帶，從弘大站6號出口行5分鐘來到其住宅區，會找到臥虎藏龍的Florte Flower Cafe。這間去年開業的Cafe，旋即被韓妹們熱煲，皆因除了賣咖啡、甜品、三文治外，仲有好多「花臣」，裝修花天花地，霎眼間以為自己去了花舖，特色是提供大量花花頭飾，畀你帶住來留倩影之外，食物方面亦離不開一個花字，甜品、特飲、雞尾酒等都有鮮花陪襯，雖然味道只屬不過不失，但用來呃Like一流，就連韓劇《戲子》都曾在這裏取景，可見無得輸。