紐約直擊！Galaxy Note 7虹膜識別1秒解鎖

名字引人無限聯想嘅Samsung機王Galaxy Note 7，日前終於在美國紐約發布。一如傳聞，防水、曲芒、HDR串流影片等新功能統統有齊，最估唔到係S Pen都有得「升呢」，一筆便可翻譯兼放大畫面。還加入虹膜識別技術，睩大對眼就能秒速解鎖，破格又實用。

售價︰待定

手感正過上代

新機跳過Note 6，直接叫Note 7，官方解釋是希望與S7系列同步發展，以免產生混淆。答案小記接受，起碼Note 7這名字都幾易記，未嘗不是好事。外形上它猶如Note 5及S7 edge的混合體，前後採用了雙曲面玻璃設計，手感比只有背面彎曲的Note 5好；而且其側屏造得比S7 edge窄，冇咁易誤觸。至於屏幕沿用5.7吋2K Super AMOLED面板，並支援HDR串流電影，有助提升畫面對比度。今代顏色有鉑金、鉑銀、瑪瑙黑，並追加一隻珊瑚藍，4色都咁靚，美中不足係幾易沾上指紋，要扣少少分。

望1秒即登入

型號跳了一級，功能亦跳了一個世代！最突破是加入虹膜識別技術，小記現場試玩時，望實機面的虹膜感應器，約3秒左右便完成登記，比登記指紋更快速。解鎖時，基本上揚起手機望1秒即成功登入，快得驚人。但使用時一定要正面看，三七面多數唔成功，戴眼鏡的話亦要避免鏡片反光；同時每部機只能登記一組虹膜，一機多戶的話未必用得着。解鎖以外，虹膜辨識還能用於解密文件、相片或影片，並可作為Samsung Pay付款的身份認證，功能全面。

虹膜技術下，揚起手機望1秒即成功解鎖。官方建議距離在10吋範圍內。

Note 7（右）與上代Note 5（左）外形有九成相似，不過前者手感更佳。

提供鉑金、鉑銀、瑪瑙黑及珊瑚藍4色，燈光下有光影變化效果。

筆尖即時翻譯

身為Note系列，招牌S Pen當然唔少得，今代裏裏外外都大躍進。首先，筆尖由1.6mm縮細至0.7mm，落筆時線條更精細，而且壓力感應提升一倍至4,096階，筆觸及色彩更自然。此外，筆身支援全新懸浮指令，筆尖浮在半空時可局部放大畫面，圈起動態畫面可製成GIF動畫，或在同一畫面快速觀看縮細了的應用程式等。但小記最欣賞是翻譯功能，將筆尖凌空指着字彙即會彈出翻譯字句，方便過查字典多多聲。較可惜是目前只支援英文或其他語言譯成中文，調轉中譯英就唔得，期望港版可以追加啦！

今代加回microSD卡槽，最高對應256GB容量。	後置1,200萬像素鏡頭，支援OIS光學防手震及F1.7大光圈。	改用USB Type-C介面，傳聞會免費送轉插，希望係真啦！
S Pen筆尖變細，並跟番機身用色，一個字︰「靚」！	實試S Pen功能局部放大以S Pen局部放大畫面時，可作不同比例調校，睇on.cc東網等網頁就最啱。	圈畫面變GIF 利用Smart Select功能圈起動態畫面，便可製成GIF動畫。
凌空翻譯凌空指着字彙就會彈出翻譯，又快又準，勝過字典。	水底篤芒機身同S Pen均支援IP68防水，手機放喺水底照樣可篤芒！	速寫便條支援Screen Off Memo功能，不用解鎖便可把便條寫在屏幕上。

反應快兼防水

新機其他硬件規格包括八核心處理器、4GB RAM及64GB ROM全屬機王級數，官方指CPU效能提升30.7%，GPU效能則提升了 58.5%。實測感覺快夾爽，最正係機身摸上手連微溫都冇，長時間打機熱量如何，就要留待日後詳測了。另一令人印象深刻的是加回microSD卡槽及IP68防水功能，可額外加多256GB容量，並可於1.5米水深下運作30分鐘。新機將於8月19日在指定地區推出，香港則定於8月17日搞發布會，屆時會否開賣自有分曉！

現場特設Gear VR 4D影院，讓傳媒坐在搖搖櫈上體驗虛擬實境影像。	發布會選址紐約Manhattan Center，內裏猶如歌劇院，讓傳媒見證新機誕生。	有機械人幫入場人士以Note 7繪製畫像。
一系列配件如S View Standing Cover保護套已準備就緒，只待開售一刻。	Sen TV主持Hannah Yang︰「南韓女仔好鍾意Gel甲，篤芒冇咁方便。依家Note 7用雙眼就解到鎖，而且又快又準，唔知男朋友會唔會買畀我呢？」