沉迷玩Apps？家長監控必殺技

設定篇：Android孩童模式 限制功能

手機功能咁多，網上更充斥着色情暴力內容，真係擔心小朋友會接觸到不良資訊。想子女玩得安心，家長大可搵吓手機有冇內置「兒童模式」或「孩童模式」。小記試過ASUS、HTC、Samsung嘅Android新機都予以支援，以Samsung Galaxy S7 edge嘅「孩童模式」為例，內有一個專屬嘅繽紛介面，家長可設定允許使用嘅聯絡人資料和應用程式，並設定每日使用時間上限，仲可記錄小朋友每日玩過嘅程式等。而且「孩童模式」需要密碼開關，小朋友想破解都好難！

iOS指導模式 一舉兩得

各位用開iPhone或iPad嘅話，其實iOS亦內置「指導模式」，家長只需開啟想畀小朋友玩嘅App之後，連按三下Home鍵，指導模式隨即啟動。用家可將實體按鍵好似Home、電源、音量暫時停用，這樣小朋友就淨係可以用到呢隻App，一來玩唔到其他功能，二來唔驚佢撳錯掣彈咗去其他頁面，一舉兩得。同時可加入時間限制等選項，時間一到畫面就會即時停頓，咁就唔怕小朋友沉迷喺電子世界。

Samsung嘅「孩童模式」介面和圖示勁可愛，相信小朋友會鍾意。

iOS的「指導模式」可以隨時開關，連按三下Home鍵即可設定。

工具篇：監控Apps過濾網頁

監管小朋友當然唔少得網頁過濾，Play Store及App Store均備有大量相關Apps，Android方面推介《ESET Parental Control》，它內置「Web守門員」攔截有害或不當網站，小記嘗試以瀏覽器開啟香港賽馬會網頁，畫面隨即顯示「此網站不適合我們」。而iOS本身嘅《Safari》已內置網頁過濾功能，可限制瀏覽成人網頁，由系統自行過濾不當內容；亦可封鎖特定網站等，瀏覽這些網頁時會彈出「你無法瀏覽下列網頁：因為連線受到限制」。

《ESET Parental Control》備有「Web守門員」，可為網頁進行過濾。售價：$199（1人授權）（Android）	《ESET Parental Control》可設定不當或適當嘅網頁類別，因應小朋友情況而決定。	iOS嘅《Safari》已內置網頁過濾功能，連Apps都唔使下載。

絕招！遙距禁玩

有時小朋友講極都唔聽話，咁就要使出必殺技——禁玩！《Screen Time Parental Control》兼容Android及iOS裝置，喺家長和小朋友嘅智能裝置分別安裝此App並進行配對，家長便可實時監控小朋友嘅使用狀況。App內仲有「Pause & Play」功能，家長可遙距下令禁玩，一旦進入Pause狀態，小朋友嘅裝置開任何Apps或撳任何功能都會彈去受限頁面，小朋友肯定嗌晒救命，睇佢下次仲敢唔敢咁沉迷！

《Screen Time Parental Control》可遙距啟動Pause功能，並對應多部裝置。售價：免費（Android、iOS）	家長的App主介面可記錄小朋友智能裝置的使用情況。	被暫停之後，裝置無論撳乜功能都會彈去呢個頁面。

撰文：林子聰

部分攝影：方偉堅