Spectre 13 1.04cm腦界最薄！

炎夏揀咩Notebook好？計小記話，買手提電腦最緊要輕薄，大熱天時拎出街都冇咁辛苦。提起輕同薄，好多人第一時間諗起MacBook Air，查實有一部剛打破咗「腦」界紀錄，就係HP新機Spectre 13，呢部號稱全球最薄筆電，厚度只有1.04cm，淨重1.11kg，配以黑金色設計，靚仔到連果粉都想轉會！

HP Spectre 13 售價：$11,999（Core i5配256GB SSD）、$13,999（Core i7配512GB SSD）

黑撞金設計

HP打破傳統筆電的老套形象，為Spectre 13換上黑撞金色設計，最特別是連舊有「hp」標誌，都以金色線條Logo取代，加上鋁合金CNC工序精煉切割，以及碳纖維混合物料製造，令Notebook輕盈與堅固兼備。另一獨特之處是電池經過重新鋪排，將4顆聚合物電池分布於不同位置來偷薄機身，令筆電合埋時只有1.04cm咁薄，同一枚AAA電池嘅厚度差唔多，成功鍊贏1.7cm厚度嘅13吋MacBook Air，稱得上是Windows用家新寵。

13.3吋屏幕用上Corning Gorilla Glass提升保護性。

合埋機身僅厚1.04cm，同一枚AAA電池差唔多。

筆電後方以一條銅金色邊框點綴，相當搶眼。

隱藏式鉸位

為了令Notebook線條更添美感，Spectre 13採用隱藏式鉸位設計，揭開屏幕才會發現左右兩邊的鉸位，感覺時尚。廠方指出，新轉軸通過不同開合測試，可靠耐用。不過機身造得咁薄，會否令擴充端子和散熱效能降低？原來新機將3組USB Type-C插口移至背部，大大節省空間。另選用Intel高壓冷卻技術，利用整合於CPU和GPU的風扇取代傳統導熱管和散熱片來降溫，就算運行Core i5或i7高負載狀態時，仍有寧靜的散熱效果，大熱天時都唔驚部電腦（興）到Hang機。

隱藏式鉸位設計，揭開筆電才會外露。

細看鍵盤有金邊加持，同時具備LED背光效果。

用家可利用《HP Recovery Manager》製作備份。

B&O Play調音

規格方面，新機提供Core i7-6500U配512GB SSD，以及Core i5-6200U配256GB SSD版本選擇，後者便宜$2,000，迎合預算不多的用家。機底後方及鍵盤區兩側均設有B&O喇叭，除了可透過HP Audio Boost增強聲效，用家還可利用全新B&O Play控制介面，揀選Output設定場景及調校低音等；亦可選擇Input設定收音咪減噪，操作比舊版完善。唯一缺點是13.3屏幕的解像度僅1,920×1,080全高清質素，若換成2K畫質來睇片就Perfect！