BMW 320d Saloon有柴自然慳

寶馬（BMW）三年前引進了柴油320d，推出初期仲要以$40萬頭的車價開售，市場反應好到車都交唔切，無他嘅，四五毫子行一公里的油耗表現，點會唔吸引？最近，代理帶來2016小改款車型，馬力多27匹、油耗更少，重點是首批320d Saloon（F30）LCI僅以$415,000起發售，仲要延長原廠保用至36個月，好考車迷定力！

BMW 320d Saloon

新款引擎碳排放更低

柴油私家車近一兩年在港多咗好多，寶馬可說是當中的大戶，不論是SUV或3、5、7系都有柴油車供應，以前就話稀有品種，現在已普及多了。一直以來，政府對柴油私家車的發牌從未放鬆過，對排放的要求尤其嚴格，今時今日有咁多柴油車過到關，正反映柴油引擎的技術已不可同日而語，高噪音及污染的時期已成過去。今次BMW引進的Facelifted版320d，並唔係求其換條泵把或頭燈就算，不但換上新式BMW TwinPower Turbo四缸柴油引擎，還結合了多方面「BMW EfficientDynamics」的高效動力科技，二氧化碳排放僅106g/km，較改款前降低了9%，比以往更加潔淨！

新引擎的性能更勝上代，馬力提升27匹。

車廂布局一貫BMW特色，豪華中帶運動氣息。

全車座椅皆用上皮革包裹，後排還有獨立冷氣送風口。

馬力微升　隔音出色

小改款320d的引擎同為2.0公升Turbo，但性能及燃油效率都有所提升，當中原因是引擎換上新一代可變進氣幾何渦輪增壓器及最新的高壓柴油共軌直噴技術，最大噴注壓力達2,000bar，扭力由過往的380Nm提升至400Nm，動力輸出更加充沛。雖然升幅只有5.3%左右，實際駕駛時未必可分辨得出，但從官方的數據來看，0~100km/h快了0.7秒，只需7.2秒，時間已可與320i看齊。既然加速力再沒輸蝕、慳油，車價又平$1萬，320d怎會不是好選擇？不過，柴油引擎的噪音相對地大，在怠速狀態下都唔見得好幾多，停車唔熄匙九成九會被人發現，唔使旨意偷到雞。不過，諗緊買320d的朋友又毋須咁快打退堂鼓，皆因3系的車廂隔音做得好好，關上門、窗後，噪音已隔得七七八八，如果真的不喜歡柴油引擎的獨特聲音，那沒辦法，平油唔到你享受。

軚環後方設有加減波撥片，轉波更輕鬆快捷。

錶板設計清晰易讀，行車資料豐富。

波箱為八前速自動波，換檔反應敏捷流暢。

智慧型車體高剛輕量

細容積引擎配Turbo的技術是提升性能及減低油耗的其中一個方法，若能同時減輕車重就更事半功倍，即使是區區幾公斤都有一定作用，從車廠每年投放大量資源開發輕量科技便可見其重要性。廠方稱，新一代320d融合BMW EfficientLightweight輕量化概念，採用的智慧型車體結構兼具高剛度及輕量的特性，重量只有1,525kg（EU Unladen），配合Auto Start/Stop及引擎動能回充系統（Brake Energy Regeneration），全新320d的綜合油耗僅4.0~4.4L/100km，以柴油價格$10.95/L來計算，行1公里只需四毫幾子！另一方面，BMW為全新320d配上LED頭燈，並有日間行車燈圍繞大燈兩旁，銳利的眼神不但看上去更具神氣，還散發着強烈的動感。新320d共提供16種車色選擇，當中包括首次在3系出現的Mediterranean Blue、Platinum Silver及Jatoba金屬色調。

320d配備Auto Start / Stop功能，引擎怠速時會自動熄火。

車尾加上小尾翼，運動形象得到進一步提升。

頭燈組不但換上LED，還整合日間行車燈。

Auto PDC屏幕顯示

為提升駕駛方便度，原廠為新一代3系提供Parking Assistant作選配，系統可協助駕駛者把汽車泊進「S」或「L」位，扭軚角度全由電腦控制，自問泊車低能可以考慮一下。最新的「Auto PDC」功能亦包含在該系統內，當汽車接近前方物體時，會自動啟動Park Distance Control，車身與阻礙物距離會在中控台屏幕顯示，於狹窄停車場駕駛都冇咁易刮花車身啦！現時，雙區恒溫冷氣已列為標準配置，首批更可免費升級電動天窗、後視鏡頭及車尾擾流尾翼，$41.5萬起就可以買部足料全新柴油3系，係咪好吸引先？