赫爾辛基認住呢隻雞

暑假就到，大台播出節目《反斗紅星冇暑假》，翠如BB飛甩洪永城，單拖走到北歐打工，在臭魚工廠做女工，在樹屋酒店執床，做聖誕老人助手……聽落好似好貼地，偏偏我去到芬蘭首都赫爾辛基，食好住好，同芬蘭潮人於新餐廳The Cock一同「叫雞」，食到舔舔脷，住埋最新酒店Lilla Roberts，感覺夠晒離地，因為去歐洲旅遊本應輕鬆寫意，強行去北歐表演捱世界嗰啲，叫虛偽。

餐廳開業一年已迅即成為熱話，Lunch時間都坐滿人。

雞鳴提你食早餐

如果英國有個節目叫《地獄廚房》，計我話，也許芬蘭可以舉辦一個更激的，叫《冥界廚房》，因為北歐菜賣清新、零添加，有時毫無味覺衝擊之餘甚至會嚇親人，我記得剛抵埗時，就試了個味道Raw到如食樹皮一樣的雪糕，好味與否，見仁見智，但又不代表這個北歐小國口味奇特，因為芬蘭向以名餐廳多而著名，首都赫爾辛基過去一年新開了近10間有名氣的餐廳，有的賣傳統北歐菜，有的是輕食Cafe，米芝蓮級數當然唔少得，而最為潮人心動的必定是去年年中開業的餐廳The Cock。餐廳大廚Richard McCormick，年紀輕輕原來已在飲食界身經百戰。到過西班牙、日本、俄羅斯等地的餐廳、酒店打工，16歲已在丹麥開設第一家餐廳，更曾在挪威謝伊區（Skei）的酒店作行政總廚，至今已在赫爾辛基開設了3間餐廳，北歐國度原來大家都認識這位「童顏廚神」。

單看餐廳名字以為只賣雞，原來名字只是「呼喚你光臨的噱頭」，話說芬蘭餐廳好少早上8時前營業，The Cock是其中一間，叫得「公雞」，是想用「雞啼聲」話你知，晨雞咁早得呢度開門營業，歡迎光臨呀喂！早餐有牛油果多士、奇亞籽粥配藜麥蜜糖等，午餐主要是沙律自助餐，繼續北歐人的小清新。晚餐才見大廚真章，自家設計菜式如西蘭花天婦羅配牛油果及芥辣汁，肉汁豐富的慢煮牛扒，法國諾曼第生蠔，有機牛肉他他等，每道菜都好惹味，同清淡的北歐菜系有極大反差。The Cock的飲食宗旨為「Family Style」同「Sharing」，因此食物分量都相當大，一班Friend來聚餐，開心Share最適合不過。

餐廳設Open Kitchen，開生蠔、切麵包、烤雞等都在此表演給你看。	盛夏時分，芬蘭晚上10時都仲有個美麗藍天，可在餐廳室外吃一頓「陽光晚餐」。	見公雞如見美食，我愛北歐夏日長，所以公雞不用報時，只提你食嘢。
餐廳裝修全部用二手家具，像這個玻璃天花，利用浴室玻璃改頭換面而成。	餐廳共有2層，好有型的地窖主要用來開Party之用。	以生雞蛋同海鹽配牛肉他他，3種食材的Raw味表露無遺，€22（約HK$189）。
招牌菜照燒雞翼，味道甜中帶辣，仲配少許泰式香料，配啤酒一流，€16（約HK$138）。	帶有白酒香的蜆肉意粉，€24（約HK$206）。	公雞同母雞的分別，我認，我真係入錯廁所。

The Cock

地址：Fabianinkatu 17, 00130 Helsinki, Finland

營業時間：7:30am~3:00pm、4:00pm~2:00pm；12:00nn~2:00am（周六）；逢周日休息

網址：http://thecock.fi/

暗黑天使沒有光環

從The Cock轉個彎，來到同樣是去年開業的Hotel Lilla Roberts，開業一年已成為「Small Luxury Hotels of the World」其中一員。酒店建築已有過百年歷史，4層建築曾被用作發電廠、警局等用途。2012年警局搬遷後，舊建築被投閒置散，芬蘭酒店集團Kamp決定將其改建成Art Deco系列酒店。由舊建築改成的酒店，總覺得同前世有點藕斷絲連。出乎意料地，Lilla Roberts沒有保留發電廠的工業風，也沒有警局元素，改走暗黑華麗風。客房主打深色系，設計簡約有型，偶爾有些動物元素點綴。大堂同餐廳則以多個著名設計品牌產品，如Front的Horse Lamp野馬燈，Ron Gilad的Dear Ingo大吊燈等穿插其中。不在發電廠同警局的光環下成長，Lilla Roberts還是做自己最舒服。

餐廳Krog Roba除了為住客提供早餐，亦歡迎外來食客享受午及晚餐。	酒店共分Comfort、Style及Lux 3個房種，Style及Lux房均有仿動物紋絨毛梳化，原始又華麗。	赫爾辛基市中心區不算大，只有3條主要大街，而且平地居多，向酒店租架單車周圍遊仲方便過搭電車。
由瑞典品牌Front聯同荷蘭公司Moooi設計的「馬燈」，不過唔識走嘅。	「Lilla e.」既是大堂也是酒吧，唔係住客都歡迎隨時入來摸下杯底。