BRABUS 850 6.0 Biturbo Cabrio「飛」一般開篷

激改S 63馬力增45%

掛上全球最快四座開篷車之名，發布會豈能馬虎？甚麼地方才適合作為BRABUS 850 6.0 Biturbo Cabrio的首演場地？國際車展、私人派對抑或車廠大本營？對不起，以上皆非，但相信冇人會估到，竟然在舉世知名的Le Mans 24小時耐力賽中舉行處女秀，認真夠「卡士」！來自德國的BRABUS，應該無車迷不識，其改裝技術唔止係專家級數，簡直達到神級水平，一部車榨多三、四成馬力何等閒事，經BRABUS操刀的S 63 Cabriolet，馬力由585hp爆升至BRABUS 850 6.0 Biturbo Cabrio的850hp，增幅達45%！唔畀個「Like」都要畀個「Wow」啦，係咪？不過咁，想試一下850hp火力全開的威力，記得閂篷，後果你懂的。

350km/h極速未到頂

BRABUS 850 6.0 Biturbo Cabrio搭載的八汽缸雙渦輪增壓引擎在BRABUS的Bottrop工廠製造，透過擴缸的方法把容積由S 63 Cabriolet的5,461c.c.增加至5,912c.c.，並改良了曲軸、活塞及進/排氣系統，再換上2個大Turbo及新編的引擎程式，速度獸從此便誕生於世，扭力達到異常驚人的1,450Nm/2,500~4,500rpm，有點誇張？不是啦，應該是好好好好好誇張呀，咁形容不是更貼切嗎？850hp馬力及1,450Nm扭力的威力有幾大？BRABUS表示，搭配七前速波箱及4MATIC四驅的BRABUS 850 6.0 Biturbo Cabrio，只需3.5秒便可由靜止加速至100km/h，時間仲快過車身輕一大截的C 63 S 0.5秒，電子限制極速為350km/h。

車廂布局維持原來的豪華格調，不會過於跑車化。	軚環後方設有大型換檔撥片，轉波盡在彈指間。	車身較S 63開篷再降低了15mm，過唔過到停車場減速壆都成問題。

或者你會話，350km/h有甚麼大不了，有好多跑車都做得到啦！但別忘記Supercar的尾胎通常都呎幾闊，BRABUS 850 6.0 Biturbo Cabrio只是建基於S-Class開篷車改裝，現時裝配的（前）255/35 ZR21及（後）295/30 ZR21輪胎闊度基本上已是極限，受制於輪胎的限制，最高時速才設定在350km/h，引擎潛能還有進一步發揮的空間。

排氣尾管以左右四出設計，車底還裝上導流板。	引擎經過大幅度改裝，馬力爆升至850hp。	引擎上方加上「850 BITURBO」名牌，一睇便知唔好惹。

大量碳纖堅硬且輕

引擎經過大幅度改裝，性能無疑有很大幅度的提升，但能否保持原來的耐用度也非常值得關注。事實上，這副850hp的怪獸級引擎至今只生產了極小量，耐唔耐用冇人知，亦冇人可以答，日日落Track轟20個圈唔保養就肯定「蛇都死」，好在BRABUS都幾照顧車主，無論同佢哋買Complete Car定「帶機上台」用自己車改裝，都會提供3年10萬公里保用，部車有乜病痛都唔使愁冇人識醫，擔心要下下寄返德國整好過。

車尾設有小尾翼，有助增加高速行車時的下壓力。	門檻加上金屬飾條，上方的「BRABUS」字樣還會發出紫色光。	車身換上運動化擾流套件，顯得別具跑格。

除了動力系統有所升級外，車身套件亦經過精密空氣動力學考量，所有套件都在風洞（Wind Tunnel）由設計師及工程人員開發，並大量應用了碳纖維物料，因而具備高強度及輕量化的特性，並且適合安裝於S 63及S 65的Coupe或Cabriolet版本。內籠方面，BRABUS可按客人要求進行個人化設定，不但可加入BRABUS Logo及變更車廂氣氛燈顏色，甚至可用碳纖組件取代原來的木飾，配合可顯示400km/h的錶板、BRABUS RACE的轉波撥片及腳踏，令原本斯斯文文的開篷車都惡起來。唔想成車碳纖咁熱血？得，BRABUS還有大量皮革及配飾畀你揀，有錢萬事通，又金又紅乜都得，只怕你冇品味。

SPEC.

車型：雙門四座位開篷車

引擎：V8 Twin Turbo

容積：5,912c.c.

最大馬力：850hp/5,400rpm

最大扭力：1,450Nm/2,500~4,500rpm

傳動：七前速自動波

驅動：前置引擎、四輪驅動

0~100km/h：3.5秒

極速：350km/h（電子限制）

撰文：鄭浩文