激罕6GB RAM OnePlus 3快叉王

「天下武功，惟快不破！」原來功夫理論用喺手機都掂，國產新貴OnePlus 3以「快」為賣點，將Snapdragon 820四核心處理器和6GB RAM共冶一爐，並首創Dash Charge快叉技術，充電半粒鐘就夠一天使用。如此旗艦規格只賣$3,098，性價比超高，預算唔高都有得玩勁機！

OnePlus 3售價︰$3,098

最薄處僅4.9mm

OnePlus手機向來貴精不貴多，而且唔係有錢就買得到，例如上兩代要受邀人士才能擁有，似足限量名車咁具話題性。不過亦因為咁，旗下手機一直未能普及。來到第3代終於開放銷售門檻，而且香港國際版同步發售！新機上手，第一個感覺係比上代輕巧易拎，原來最薄處只有4.9mm；而且金屬機身做工紮實，打磨順滑唔刮手，配合Gorilla Glass 4高硬度玻璃及幼邊框設計，外形一改國產「娘」味。一如上代，此機可連特製背蓋購買，當中包括砂岩、竹質、南美酸枝、黑杏及芳綸纖維5款，可惜每款要$198，貴咗少少！

5.5吋芒睇片一流

時下國產手機愛用2K屏幕，雖然OnePlus 3嘅5.5吋屏幕只有1,080p解像度，但試睇影片一啲都唔輸蝕，既有AMOLED材質鮮艷顏色和高飽和度等優點，而且勁Sharp勁細緻，最正係有Dirac HD Sound音效系統加持，環迴音效唔錯！鏡頭方面，搭載Sony IMX298感光元件，支援1,600萬像素、F2.0大光圈、光學及電子防手震，並提供縮時、慢動作、4K短片及全景等拍攝模式，規格無可挑剔。實測所見，鏡頭對焦快、連拍速度高，相片亦見高清銳利，只嫌低光環境下雜訊偏多，而且自動美顏效果不明顯，Selfie可能要扣分。

多工處理唔窒

跟其他廠商喜愛提供多個容量版本不同，此機只有6GB RAM加64GB ROM配置。小記開機後發現背景系統只佔用1.3GB RAM左右，難怪同時打機、上網、睇片都唔窒。而且它在《AnTuTu》跑分有143,947分，遠遠拋離S7 edge等一眾對手！此機另一賣點是支援Dash Charge快速充電，只需插入專用5V/4A火牛及充電線，充30分鐘就有60%電量，廠商號稱打住機都一樣可以快叉，啱晒心急嘅香港人！

可另購砂岩、黑杏、芳綸纖維、南美酸枝及竹質5款背蓋，各售$198。	附設Dash Charge火牛及充電線，充30分鐘就有60%電量。由於測試機是內地版，故為兩腳火牛。	沿用USB Type-C插口，旁邊喇叭聲量夠響。
提供兩個nanoSIM卡槽，但卡槽插唔到microSD卡，冇得擴充容量！	設有夜間模式，畫面會稍稍變黃，減低雙眼疲勞感。	《AnTuTu》跑分高達143,947分，連S7 edge等機王都唔係佢對手。
提供15款濾鏡，以夏、暮、秋等作區分，營造不同氛圍。	影相時可開手動模式，自行調校白平衡、ISO感光值、快門及焦距。	試相區自然光下Snapshot的成像細緻，樹木層次分明，顏色飽和適中。