BMW 3系Gran Turismo看不出的辣
汽車種類過往冇依家咁多，主要都係得房車、旅行車及揭背車之類，不過近年車廠為開拓市場，SUV、MPV及四門Coupe都相繼推出，再加上林林總總的Crossover車款，多到10隻手指都數唔晒。說到創意，則不得不提寶馬（BMW）3及5系衍生出來的Gran Turismo（簡稱「GT」）版本，這兩款看似Sedan與Touring的混合體已推出好一陣子，銷量卻出乎意料地好。近日，廠方為3系GT進行小改款，當中340i的馬力更提升至326hp，實用得來仲相當跑得！
3GT改款着重性能
2009年，BMW為5系推出GT版本，走的是實用路線，擁有比房車更大的載物空間。或者有人會問，要載得多嘢點解唔直接買Touring，而去揀GT呢？筆者也想不透，也許要為一班覺得Sedan太斯文、Touring又過於運動化的消費者提供多個選擇吧。不管你點睇，5GT確有不少知音人，不俗銷情同時給予寶馬進一步擴大GT陣容的信心，5GT上市4年後（即2013年）再推出3GT，難道這不是食過翻尋味？去年，BMW為F30世代的3系進行小改款，外觀變化不大，全新的3GT Facelifted都是一樣，改款重點落在性能上，齋睇樣並唔係咁易認得出。
主銷中德美市場
廠方點形容3GT？就是集3系Sedan的運動屬性、Coupe的動感與Touring的實用於一身。即是點？看上去似一輛發脹了的Coupe，但有4隻車門，除賦予運動化外觀及高度實用性外，空間也較Sedan好使，行李都可以擺多啲，很適合喜愛駕車長途旅行的用家，但對於不會自駕穿州過省的港人而言，好處一樣有，就是可將更多的屋企雜物塞晒落架車度，會增加油耗都冇辦法，土地問題嘛。相對於Sedan，GT有更長的軸距，乘客的腿部空間也更大，加上原廠已將電動開閂尾門列為標準配置，使用方便度無疑勝一籌。3GT在本港不是主流，在德國、美國及內地卻相當有市場，在德國每售出6輛3系便有1輛是GT，當中絕大部分買家都是首次成為BMW車主，吸客力十分驚人。
340i馬力達到326hp
外觀上，全新設計的頭燈是焦點所在，線條經過重新勾畫，並改用全LED頭燈組，再配合LED霧燈，整部車當堂Sharp醒晒。動力方面，原廠為3GT提供3款汽油及5款柴油動力，前者有320i、330i及340i，並採用新世代的B58及B48引擎，當中取代328i及335i的330i及340i，馬力分別提升至252hp及326hp，車主可選配六前速手波或八前速自動波箱，旗艦的340i只需5.1秒便可完成0~100km/h加速，xDrive四驅版本可再快0.1秒，油耗卻反過來減少高達11%。全車系最節能的型號則落在318d上，150hp柴油引擎配合八前速自動波箱，百公里油耗僅4.3至4.5公升，若以本港車用柴油零售牌價$11/L計算，行每公里的燃油成本不用$0.5。
BMW 340i規格表
車型：五門五座位GT
引擎：直六BMW TwinPower Turbo
容積：2,998c.c.
最大馬力：326hp/5,500rpm
最大扭力：450Nm/1,380~5,000rpm
驅動：前置引擎、四輪驅動
傳動：八前速Steptronic自動波
車身體積：4,824×1,828×1,508mm（長×闊×高）
0~100km/h：5.1秒
綜合油耗：7.0~7.3L/100km
撰文：鄭浩文