Porsche Macan GTS突破起跑線

保時捷（Porsche）Macan是一部強調On-road性能的SUV，操控基本上在同級中冇得輸，最近代理再為車系追加GTS版，唔止性能高於Macan S，離地距仲降低了15mm，劈起彎來更靈活穩定，想揸SUV都有跑車般享受？揀Macan冇錯（口架）喇（如果有錢的話……）！

Porsche Macan GTS
售價：$985,000起

加速爽快推背力強

連同Macan、Macan S及Macan Turbo在內，現時在本港有售的Macan有4個動力版本，Macan GTS的定位在S版及Turbo版之間，搭載的引擎為3.0公升V6 Twin Turbo，規格與現行的Macan S相同，經過調校後，馬力提升了20hp達到360hp/6,000rpm，波箱則別無他選，同為七前速PDK。廠方資料指，配備Sport Chrono Package的Macan GTS只需5秒便可完成0~100km/h，不比718 Cayman（PDK）的4.9秒慢多少，燈位鬥起步，好多高性能車款都唔係佢嗰皮。試過用「D」波以70km/h巡航時一下子盡油，波箱不用1秒已由七波拖低四波配合加速，身軀即時被強大的加速力推向椅背，多爽！

引擎配上雙渦輪增壓，高中低轉都力量充沛。

懸掛軟硬及排氣聲浪可藉波棍台後方兩邊按鍵進行調校，舒適與運動化操控悉隨尊便。

錶板中央為引擎轉數計，而且加上「GTS」字樣。

低離地距操控更穩

雖然Macan GTS只係多Macan S 20hp，直線加速沒有明顯分別，但操控性能就強得多，預載的PASM不但可按實際情況及駕駛風格持續調節四輪懸掛的反應，車身離地距降低了15mm，在山路上快跑，車身動態同一般SUV有點不同，搖晃幅度及傾側度都相對較少，車身回中比想像中快，若非駕駛視點較高，否則有理由相信自己正開着Coupe，而非SUV。同時，Macan GTS已將運動化排氣系統列為標準配置，按下波棍旁的「尾喉」圖案按鈕，排氣聲浪會變得跑車化，無論在引擎怠速或高轉的情況下都令人如置身跑車中，好像時刻都在引你畀油，定力差啲，15分好快無晒。

車廂布局運動化，軚環亦設有加減波撥片。

前座配上GTS跑櫈，並附有電動調校及位置記憶功能。

後排空間不錯，座椅承托也良好。

內外升級黑色風格

Macan GTS的車價較Macan S多$17.4萬，除了性能有所加強外，車身設計亦加入了黑色風格，當中包括頭尾燈組、排氣尾管及車尾的黑色「Porsche Macan GTS」字樣等，加上內籠裝配了GTS Leather Package、GTS跑櫈及繡上「GTS」字樣的頭枕，由內到外都得到升級，多十零萬都值。代理提供的測試車裝上環迴視像系統，稅前都要$11,300，但幾實用，車身的4個超廣角鏡頭可提供360度畫面，而且修正了影像變形，車身周邊景象睇得一清二楚，泊進超窄車位再沒難度。此外，20吋RS Spyder輪圈、三區恒溫冷氣及前六活塞制動卡鉗列為標準配備，車價不過$100萬，都算係咁啦，話晒「波子」喎！