Volkswagen Polo 180 TSI Krypton Edition經濟型限量升呢

要數慳油好力的歐洲經濟小車，相信好多人都會諗到Volkswagen Polo。毫無疑問，160Nm的扭力輸出、10.8秒便可完成0~100km/h的性能，試問有幾多1.2公升的Hatchback做得到？更何況今次測試的Polo為Krypton Edition，唔止車身噴上特別的灰色及升級至17吋輪圈，重點是車價較早前推出的1.2 Trendline更平，惟Krypton Edition限量20部，手快有手慢冇呀！

頭燈為Halogen款式，而且可作手動調校。

扭力命名反映性能

今時今日想搵部$20萬以下的新車已經唔多，$16萬以下更少之又少，全新Polo 180 TSI Krypton Edition就係其中一部，仲要係德國車，都真係幾吸引。德國車出名好「鋼水」，雖然Polo的車長4米也不到，早前在澳洲進行的一個撞擊測試中，獲得的評分並不比豪華房車低，而且預載了二次碰撞預煞系統（Multi-Collision Brake），為乘員帶來充分的安全保障。現時，Volkswagen正陸續為旗下多款車型轉用全新的命名方法，即使Polo Krypton Edition搭載的1.2公升TSI引擎與Polo Trendline相同，但車名不再使用「1.2 TSI」，而改用「180 TSI」。廠方解釋，用扭力輸出為法則的命名方法，更能反映車輛的駕駛性能及表現，引擎扭力將以每50Nm為一級，分為多個「扭力級數」（如：180、230、280、330、380等），擁有160Nm扭力的Polo，就落在180的級別上，因而命名為Polo 180 TSI。

油耗低動力充足

Polo的1.2公升Turbo引擎噪音較Golf的1.4公升TSI大，在車外聽都幾明顯，停車冇熄匙一定會被人發覺，基本上係唔會有成功「偷雞」的機會。不過當你坐進車廂，引擎聲已隔得七七八八，噪音不是冇，但起碼不是那種會令人煩躁的一類，若以入門的小車而言，車廂有如此隔音功力已相當抵讚。Volkswagen的Turbo引擎技術向來都有保證，性能及環保表現都兼顧得到，就如Polo的1.2公升TSI引擎，不但起步加速凌厲，上斜亦毋須猛踩油門已有充足動力，於本港路面行駛，實際駕駛表現不比2.0公升NA車差多少，但油耗就低得多了，每百公里僅耗4.7公升油（EU Combined），行1km都唔使$0.7，完全符合追求實用、經濟的消費者要求，日日要開長途車都唔使愁油貴，開車自在過人。

Volkswagen指用扭力輸出為法則的命名方法，更能反映車輛的駕駛性能及表現。	配上Turbo的1.2公升引擎，可輸出160Nm的強大扭力。	車廂布局以簡約為主，按鍵鋪排就手易用。
全車皮椅屬選配設備，連稅價值$8,980。	後排空間稱不上闊落，但坐上2名成年人亦覺輕鬆。	波箱設有七前速，有助減低巡航時的油耗。
車長不足4米的Polo，穿梭於鬧市尤其輕鬆。	雙圓形儀錶中間設有電子顯示屏，能提供豐富的行車資訊。

比Trendline版更豪更平

連同Trendline及Comfortline在內，Polo在本港有3個版本，全新的Krypton Edition是由Trendline版升級而成，合金輪圈升級至17吋Mirabeau，唔止看上去少了點平價車感覺，最實際的地方是較Trendline便宜$4,000，車價更平、設備更正，雙贏！娛樂系統方面，Polo 180 TSI Krypton Edition標準配備了Composition Colour觸控式面板，支援CD、SD Card及AUX-IN輸入，並設有6個喇叭，音質就中規中矩，不過不失啦。原廠為進一步提升Polo的節能表現，Krypton Edition同樣配備「Engine Start-stop」，停定車並踩着迫力不放，引擎便會自動熄火來減少不必要的燃油消耗。若要重新啟動引擎，不必按任何掣，只要鬆開制動腳掣便可。目前，Polo 180 TSI Krypton Edition的標準配備已包括連指揮燈側鏡、皮革軚環、胎壓偵測系統等，車主另可以$8,980選配全車皮椅。

車尾裝上頂置尾翼更顯動感，而且整合了煞車燈。	車側貼上「KRYPTON」字樣，標示特別版的身份。	Park Distance Control屬標準配置，車身與障礙物距離一目了然。
Volkswagen Polo 180 TSI Krypton Edition車身體積為3,972×1,901×1,453mm。	德國車出名好「鋼水」，早前在澳洲進行的一個撞擊測試中，獲得的評分並不比豪華房車低。	後座可向前翻下增加載物空間，惟不能完全放平。