耐力格鬥會千元手機Fight！

ZenFone Max長氣變種

台灣大廠ASUS嘅ZenFone系列一向以性價比作招徠，近年仲加推好幾款變種手機，好似Sell自拍嘅ZenFone Selfie、玩光學變焦鏡頭嘅ZenFone Zoom，今次輪到主打電量嘅ZenFone Max。外形雖然與同系機款差唔多，用上5.5吋大芒及仿皮機背設計，但卻植入5,000mAh電池，續航力驚人。

ZenFone Max用上5.5吋1,280×720解像度屏幕。 售價：$1,490（a）

搭載1,300萬像素鏡頭及雙色溫LED閃光燈。

紅米Note 3金屬靚樣

提起平價手機，好多人即時諗起小米出品，不過以往入門嘅紅米手機或者大芒版紅米Note系列，為求降低成本都會用上塑膠機身，一望就知係Cheap機。嚟到紅米Note 3首次改用鋁合金機身，仲分為2GB RAM＋16GB ROM標準版和3GB RAM＋32GB ROM高配版，加上銀白、金、深灰3種配色，無論外形和手感都升咗幾個Level！

5.5吋屏幕的紅米Note 3，全高清解像度畫質細緻。 售價：$1,299（標準版）、$1,499（高配版）（b）

全金屬機身手感一流，唔似平價手機。

Y6 Pro 國產新寵

作為國產手機龍頭，Huawei（華為）近年主攻中高階手機，好似Phablet大芒嘅Mate 8、同Leica合作嘅P9等，品牌形象提升了不少。不過喺內地市場都有唔少平價機款，可惜好多都唔引入香港，Y6 Pro可說係少數嘅例外，機價$1,280夠晒競爭力，但機身嘅膠感幾重，幸好有個不易跣手嘅菱格紋機背，挽回不少分數。

Y6 Pro機身較為的骰，屏幕用上5吋Size。 售價：$1,280（c）

機背花紋相當突出，表面夠晒啜手。

第一回合：鬥電量Benchmark

3款手機都聲稱自己電量勁，單睇數字，擁有5,000mAh電池嘅ZenFone Max，比用上4,000mAh電池嘅紅米Note 3及Y6 Pro優勝，但續航力好多時要睇埋軟件設定和應用。機Gor以《Geekbench 3》嘅Battery Test進行測試，試吓手機由100%叉滿電，經過程式不斷運行至耗盡電量所需嘅時間，結果發現ZenFone Max可運行15小時12分鐘，紅米Note 3則用到10小時27分鐘，而Y6 Pro可捱到12小時16分鐘。另以《YouTube》App試播1小時短片，發現三機嘅電量分別下跌9%、11%、14%，續航力明顯是ZenFone Max佔優。

ZenFone Max有4個電源模式，用家可自訂省電模式內容。	紅米Note 3提供多個省電模式，仲可調校預設啟動時間。	Y6 Pro備有3個「省電計劃」，話埋畀用家聽各模式的續航力變化。
《Geekbench 3》Battery Test續航時間

第二回合：鬥特異功能

3部機嘅電池續航力都比起傳統手機強，當中兩者除咗可以「自保」，原來仲可以「救人」。皆因ZenFone Max及Y6 Pro都支援逆向充電功能，只要透過OTG線將手機與其他Gadgets連接，它就可化身成「尿袋」為對方解困，緊急時都可以幫人充電，夠晒方便。而紅米Note 3雖然不設呢項功能，但機背鏡頭下方竟然植入指紋辨識器，解鎖時以指頭印一印就完成，仲可為指定檔案上鎖，令保安性大幅提升！

ZenFone Max附送OTG線連接其他裝置作充電之用。	紅米Note 3配備指紋辨識器，靈敏度不俗。	Y6 Pro支援逆向充電，可為其他裝置充電。

第三回合：鬥網絡支援

相信好多人會當平價手機係旅行後備機使用，所以雙卡功能及網絡兼容性都好緊要。三機不約而同支援雙卡雙待，但講到網絡支援方面，紅米Note 3就贏番Round，皆因佢除咗支援香港3G（WCDMA）、4G（FDD-LTE）制式，亦兼容內地嘅3G（TD-SCDMA）、4G（TD-LTE）制式，北上旅行的話一機搞掂晒；而Y6 Pro就支援香港3G以及中港4G制式（TD-LTE及FDD-LTE）；ZenFone Max則僅支援香港嘅3G及4G（FDD-LTE）制式，不過食到全球8個頻譜，不少外國地方都用得着。

ZenFone Max可插入兩張microSIM卡，食到香港FDD-LTE 4G制式以及全球8個頻譜，兼容性不俗。	紅米Note 3支援雙卡雙待，不過SIM 2卡槽與microSD卡槽共用。網絡方面兼容中港3G及4G制式，啱晒經常往返內地人士使用。	Y6 Pro兼容兩張microSIM卡，同時支援microSD卡。另可用到TD-LTE及FDD-LTE中港4G制式。

香港資訊科技商會榮譽會長Francis：「留意充電時間！」

「用家買呢類大電量嘅平價手機未必追求硬件規格，主要係想狂睇片、狂上網都用到一整天，一般使用情況下甚至玩兩日都唔使充電，確實有噱頭。不過要留意，呢3部手機電量咁大，卻不支援快速充電技術，充電隨時要花上4、5個鐘，要預番相應時間替手機充電。」

機Gor Report：ZenFone Max電量最強

睇番3回合比併結果，不難發現ZenFone Max嘅電量最強，兼且支援逆向充電功能，當做後備手機帶去旅行，絕對攞到高分數。但若果想揀部長氣手機平時使用嘅話，機Gor就推介紅米Note 3，雖則電量續航力冇咁誇張，但用上效能較強的Snapdragon 650處理器，仲有高配版畀多個選擇大家。而Y6 Pro整體表現則較平均，但機價$1,280最平，5吋機身亦較的骰，Budget唔多的話都可揀佢。

ZenFone Max規格表

制式：GSM、WCDMA、LTE

處理器：Qualcomm Snapdragon 410四核心

記憶體：2GB RAM、16GB ROM、支援microSD

屏幕：5.5吋（1,280×720解像度）

鏡頭：（前置）500萬像素、（後置）1,300萬像素

電池容量：5,000mAh

作業系統：Android 5.0

體積：156×77.5×10.55mm

重量：202g

紅米Note 3規格表

制式：GSM、WCDMA、TD-SCDMA、FDD-LTE、TD-LTE

處理器：Qualcomm Snapdragon 650六核心

記憶體：2GB/3GB RAM、16GB/32GB ROM、支援microSD

屏幕：5.5吋（1,920×1,080解像度）

鏡頭：（前置）500萬像素、（後置）1,600萬像素

電池容量：4,000mAh

作業系統：Android 5.0

體積：150×76×8.65mm

重量：164g

Y6 Pro規格表

制式：GSM、WCDMA、TD-LTE、FDD-LTE

處理器：MediaTek MT6735P四核心

記憶體：2GB RAM、16GB ROM、支援microSD

屏幕：5吋（1,280×720解像度）

鏡頭：（前置）500萬像素、（後置）1,300萬像素

電池容量：4,000mAh

作業系統：Android 5.1

體積：143.1×71.8×9.7mm

重量：160g

Profile

機Gor：機不離身，不信Spec只信測試，不扮高深，懶理低俗，貪新不忘舊。

撰文：機Gor

查詢：（a）3582 4738、（b）http://www.mi.com/hk、（c）8128 8810