SUGAR C7奉指閃耀

Bling Bling產品一向受女士歡迎，服飾要爆，Gel甲要閃，日日用嘅手機當然唔例外！來自法國嘅SUGAR以寶石手機打響名堂，日前在香港推出全新型號C7，繼續以瑩彩寶石做賣點，舉機影相一刻閃耀全場；加埋指紋識別、三指Capture畫面等嶄新功能，由外靚到內！

SUGAR C7 售價︰$2,298

機背成焦點

SUGAR自2013年於法國成立後，產品一向貴精不貴多。雖然今次C7受中價定位所限，全機瑩彩寶石冇SUGAR 2過百顆咁誇張，但依然有22顆，全部鑲嵌於主鏡頭旁邊，令平時較少Show Off的手機鏡頭部分，頓成大眾焦點。留意每一顆寶石均刻有「ZIRCONIA」雷射標籤，矜貴程度絕非一般貼石手機可比。鏡頭經過粉飾，機身亦夠靚，提供金白及咖啡金兩色，並採用女士最Buy嘅5吋屏幕，厚度僅8.5mm，單手就操控得到，美中不足係解像度只有720p，若玩埋全高清更Perfect！

三指Capture芒

家陣幾乎部部手機都有指紋識別，新機當然有，不過佢嘅玩法更全面，除支援秒速解鎖，還可用作App Lock或在待機時快速開啟應用程式。用戶更可設定不同手指所對應嘅程式，例如食指開facebook、尾指開Instagram，彈指之間就開心Share！指紋以外，手指在此機還有其他用途，例如三指擷取畫面功能，只需以3隻手指向下掃芒，即可擷取多頁內容；最正係Capture完仲可以打格，並有不同圖案選擇，至啱大家將內容分享前遮蔽私隱。

C7內置5吋720p屏幕，惟留意Home掣兼備返回功能，用家或許要時間適應。

附送智能皮套，可透過圓形窗口控制鬧鐘同播歌。

主鏡頭旁鑲有22顆「ZIRCONIA」瑩彩寶石，閃爍高貴。

88度廣角鏡頭

Lady's Phone性能一向麻麻，此機內置MediaTek 1.3GHz四核心處理器、3GB RAM及32GB ROM，並支援中港4G雙卡網絡及最大128GB microSD卡；以中階機來說都算唔錯，一般上網實夠用，只係開得多Apps才有點窒。影相方面反而有驚喜，首先前置鏡頭支援88度廣角，四人合照都冇問題；後置鏡頭則有1,300萬像素，支援F2.2大光圈、連拍、HDR、全景及專業模式，美顏模式亦唔少得，美瞳、瘦臉、滑膚一應俱全，女士們又多一個入手理由。

三指Capture Screen的用法簡單，三指向下掃芒即可擷取內容。	備有金白及咖啡金兩色，後者機背有石磨質感，較為罕見。	支援雙卡雙待及microSD卡，卡槽毋須共用，設計唔孤寒。
影相時Volume Up可充當快門掣，自拍更方便。	內置復古、黑白、正片負沖等9款濾鏡，影相多玩法。	可指定唔同指紋開Apps，用法幾破格，但前提係Set完要記得番。
試相區前置鏡頭支援88度廣角拍攝，四人群拍冇難度！