唔怕阿媽煩！8盡手機疑難
據非正式統計，十個阿媽有九個都問過仔女有關手機難題，各位係咪都曾經被考起呢？母親大人最愁嘅唔係部機唔夠勁，而係唔識設定和畀啲突發情況嚇親，今次小記精選8大阿媽常問嘅Android手機疑難，讓各位趁住母親節做孝順仔女排難解紛！
設定篇：
有時阿媽問嘅手機難題真係千奇百趣，不過十居其九係錯誤操作所致，教佢哋簡單幾個設定就可迎刃而解。
難題1：手機啲字太細睇到眼花
拆解：雖然手機嘅芒愈嚟愈大，但預設字體通常好細，有老花嘅阿媽梗係睇得辛苦。其實大部分手機都有字體設定，可轉做大、超大都得。而最常用嘅WhatsApp亦可設定字體大小，只要進入「設定」內的「對話」，調校字體大小即可。
難題2：部手機好慢又彈Apps
拆解：要解釋畀阿媽聽手機變慢嘅原因，難度系數相當高，其實好大機會係阿媽每次用完Apps按Home鍵回主畫面，日積月累下有勁多Apps喺背景運行。想教阿媽Kill Apps的話，舊機只要長按Home鍵、新機則撳畫面底部嘅正方圖示，之後將Apps縮圖向左或右掃即可。
難題3：手機無啦啦上唔到網
拆解：撇除唔記得交電話費呢個原因，一旦上唔到網先要睇吓狀態欄右上角有冇網絡信號或Wi-Fi圖示，如果冇的話可能係誤按狀態欄入面嘅快捷功能鍵，錯手熄咗流動數據或無線網絡。另外，亦有機會誤開「飛行模式」，自然上唔到網啦！
難題4：唔識用輸入法又想打中文
拆解：好多手機都有預設中文輸入法，但鍵盤咁細媽子們識打都未必撳到；有些機款雖然預載手寫功能，但要預先自行設定；就算手機冇手寫中文都唔緊要，裝個《Google粵語輸入法》就可將屏幕變成手寫板，仲可以連續書寫中文，勁方便。
軟件篇：
想為阿媽部手機打造個人化介面，讓媽咪用得更就手，安裝實用的免費Apps必不可少，Set好之後就唔怕阿媽嘮叨。
難題5：介面好亂唔識用
拆解：不少手機初哥都覺得智能手機嘅介面混亂，作為仔女最好梗係畀啲耐性教吓媽咪基本操作。若果阿媽真係唔想學都唔使逼佢，安裝《智者桌面》便可將手機畫面簡化，無論功能圖示、聯絡人、撥號頁面以至通知欄嘅頁面都超大。
難題6：部機好易冇晒電
拆解：手機食電嘅主要原因係背景程式作怪，媽子唔識處理自然好易冇電。《Greenify》可將唔用嘅Apps自動轉為休眠狀態，將耗電量降低，毋須將Apps手動關閉，一裝即用，仔女裝完一次就冇手尾！
難題7：唔見咗啲Apps想搵番出嚟
拆解：Apps圖示左拉右拉的確好易唔見，不少手機都備有搜尋功能，如果冇的話可試吓安裝《Google Gesture Search》，一次過喺聯絡人、Apps、設定、音樂、瀏覽器書籤等進行搜尋，而且只需喺畫面畫上數字或字母即可，搜尋速度仲好快。
難題8：得閒過嚟幫手整機啦
拆解：平時返工忙到嘔，點可以分身幫阿媽整機？遙距操控就得！《TeamViewer》可遙距以電腦操作Android手機，只要事先喺阿媽部手機裝上此App，之後阿媽遇到乜嘢難題，你都可以隨時遙距控制解決，一天都光晒！
撰文：林子聰