Pentax K-1 3,640萬像素出戰全片幅

要玩全片幅數碼相機，來來去去都係C、N、S、L呢幾間大廠，不過Pentax早前正式加入戰團，推出旗下首部全片幅單反相機K-1，雖然相對其他廠較遲起步，但規格緊貼市場需求，最重要係可以令「三公主」（FA 31mm、FA 43mm及FA 77mm）呢類菲林年代嘅銘鏡復活，唔使再收埋喺防潮櫃。

Pentax首部全片幅單反相機K-1面世，令菲林年代嘅舊鏡重生，例如為人熟悉嘅「三公主」（FA 31mm、FA 43mm及FA 77mm）。

支援五軸五級防震

今次K-1最大賣點當然係內置3,640萬超高像素嘅全片幅感光元件，配合PRIME IV影像處理器，令感光度高達ISO 204,800，成像畫質精細銳利之餘，亦有利在低光環境下拍攝。加上K-1是首部備有五軸五級防震系統嘅全片幅單反，有效修正手震問題，即使用上一些菲林年代的舊鏡，使用慢快門拍攝的畫面依然穩定，而且相機亦提供裁剪模式，會因應鏡頭型號自動切換為全片幅或APS-C片幅嘅影像區域。

四合一超解像技術

3,640萬像素對於一般用家嚟講已經好夠用，不過若果大家鍾意「聞相」的話，K-1特別新增Pixel Shift（像素偏移解析度）功能，佢係一種超解像技術，原理在於同一個畫面連拍4張，然後合成為1張相，像素不變卻有效提升細緻度和色彩還原度。Pixel Shift唔單止可以影靜態影像，連動態主體都影得到，相機在連拍時會探測動態目標，當然最好就埋落腳架拍攝。

Pentax K-1 售價：$16,500（淨機身）

3.2吋屏幕以四軸支撐，取景角度變化夠大，垂直傾斜或水平傾斜都做得到。

擁有33點對焦點，當中25點屬於十字形，不過數目上略嫌偏少。

四軸支撐扭擰屏幕

新機嘅鎂合金機身具有防塵防水滴效能，就算落雨影相都冇問題，最特別係背面配備3.2吋多角度屏幕，佢跟一般翻揭式或側揭式屏幕好唔同，主要以四軸支撐，咁就可以任意扭出唔同角度。而機頂特設功能轉盤，可選擇Wi-Fi、HDR、曝光補償等功能，旁邊更具備GPS開關，能夠為影像記錄位置、高度等。值得一提，首100名買家將會得到限量嘅金屬Hotshoe Cover，刻有「Pentax K-1」、「2016」嘅字樣，相當有紀念價值。

支援最高感光度ISO 204,800，就算夜晚影相都冇問題。	Pixel Shift功能會一口氣連拍4張，然後合成為1張影像，拍攝動態主體都啱用。	機側備有收音咪和耳筒插口，收音和監聽做到足，還有HDMI接口以便接駁大電視。
首100名買家會得到由金屬打造嘅限量Hotshoe Cover，上面刻有「Pentax K-1」、「2016」字樣。	採用雙SD記憶卡插槽，可以揀同時記錄備份，又或者分別儲存JPEG和RAW格式影像。	試相區使用Pixel Shift功能拍攝，即使放大畫面，都可以見到大廈和樹木嘅細節，而且色彩還原度高，顏色表現跟現實環境一致。