4吋雙芒流武藏全摺觸

摺機於90年代盛極一時，StarTAC摺龜、V仔等部部都係經典，只係後來篤芒機面世，它們才走入歷史洪流。時移世易，摺機近年有翻生迹象，不少日系機都玩埋一份，最新有日本電訊商Freetel出嘅武藏，不僅擁有久違了的實體數字鍵，內外仲分別有4吋觸屏，睇吓引唔引到一眾機迷入手！

Freetel武藏售價：$2,780

揭蓋即聽電話

近年智能手機大多一式一樣，所以小記見到武藏時，恍如見回老朋友般，從前玩摺機嘅感覺返晒嚟！揭開手機，上方是觸屏，下方是十字掣及數字鍵，來電時揭蓋即可接聽，某程度上比篤芒手機更易用。小記實測所見，按鍵回彈力適中，並有背光燈輔助，若果機側能加埋彈蓋掣就更方便。顏色方面有金、銀、黑3色，機身帶有金屬拉絲花紋，當中尤以金色最搶眼討好。

源自日本劍豪

此機名叫武藏，設計靈感正是來自日本劍豪宮本武藏，昔日他以「雙刀流」橫行天下，故手機亦以「雙」為賣點，內外各有一個4吋800×480解像度觸屏，彼此並無主副之分，用戶毋須揭蓋也能玩盡手機全部功能。待機時更可透過Daydream模式觀看日期相片，夠晒實用。雖然論畫面質素，佢冇得同時下1,080p或2K靚芒相比，但文字放大後依然清晰，睇相睇片亦見銳利光猛，表現唔差。問題反而係雙芒設計令厚度增至17.6mm，仲厚過兩部iPhone 6s疊起來呢！

除了實體數字鍵，還備有訊息、相機、上網及工具快捷鍵。	全機不設3.5mm Audio插口，想駁耳機就要靠microUSB轉接線。	支援本地4G上網，而且放大網頁的文字仍見清晰。
機面設有4吋觸屏，支援800×480解像度。	試片區以4吋屏幕用來睇片，顏色和亮度表現都唔差。

雙卡槽夠大方

規格方面，它用上MediaTek MT6735M 1GHz四核心處理器及1GB RAM，配以Android 5.1系統，只屬入門級數，《AnTuTu》跑分僅得23,623分，用來玩複雜一點的遊戲都有點窒，背景程式太多甚至會彈Game，性能只屬一般。幸好它貨真價實地提供雙microSIM卡槽及一個microSD卡槽，兩者毋須共用，設計比市面好多旗艦機「大方」得多。而且800萬像素主鏡頭成像不俗，並支援HDR、美顏及手勢自拍功能，一般應用綽綽有餘。