Acer年度新品 紐約搶先列陣

Liquid系列多向發展

今次發布會喺紐約舉行，由Acer執行長陳俊聖親自主持，率先登場嘅係Liquid Zest Plus及Liquid Jade Primo兩部智能手機，前者屬5.5吋大芒Android機，1,300萬像素鏡頭支援3種對焦技術，最煞食係內置5,000mAh電池，令續航力大大提升；後者則為5.5吋Win 10手機，廠商特別推出專用鍵盤、屏幕及滑鼠等Liquid Extend配件，以手機連接後即可變身成迷你電腦，靈活性贏晒。

智能手帶方面，今年力谷1吋OLED芒的Liquid Leap Fit，除了可監測卡路里消耗及心跳率等功能，仲可記錄兼定時提示進食藥物、飲水等。另一驚喜係旗下品牌Xplova嘅X5單車記錄儀，可顯示單車速度、行走距離，加上其他配件便可量度用家心跳、踏頻等，還可下載離線地圖和路線，甚至能拍下行車片段，功能超齊全。

Alpha 12二合一筆電

筆電系列當然亦有新品登場，Aspire S 13機身僅重1.3kg、厚14.58mm，屬全球最薄兼支援杜比音效的13.3吋Notebook機款。機面則用上鋁合金納米壓印技術，立體紋理無論手感和耐用性都唔錯，預計售價由699美元起（折約5,452港元），性價比吸引。

Liquid系列新機提供黑、白兩色，走5.5吋大芒路線。	Liquid Zest Plus備有1,300萬像素鏡頭，另支援杜比音效。	Liquid Jade Primo大玩Continuum功能，可接駁鍵盤、滑鼠等配件。
Liquid Leap Fit可拆開機芯換手帶，襯衫冇難度。	智能手帶設有1吋OLED篤芒，操作反應都算靈敏。	Xplova X5支援IPX7防水標準，配合實體按鍵方便操作。

近年二合一機款成為筆電主流，上年Acer有Switch系列應戰，今年再加推Alpha 12。平板部分用上12吋2,160×1,440解像度觸控屏幕，配以高規格Core i7處理器、8GB RAM及SSD硬碟，還改用LiquidLoop冷卻系統，無風扇設計操作寧靜之餘，同時達到良好散熱效果。機背仲有165度可動支架，加上易拆易裝嘅鍵盤保護套，帶出街做嘢都掂！

可自訂不同拍攝設定，並透過《Xplova Moment》App上傳分享。	Aspire S 13機身僅厚14.58mm，仲有黑、白兩色選擇。	Alpha 12提供165度可動支架，座枱使用更方便。
市面上常見嘅VR產品，可配以Predator系列電腦試玩。	Predator 17X與上代外形接近一樣，但硬件有所提升，後方備有雙風扇設計。	Predator G1用上盔甲機箱，霸氣十足，還備有專用行李箱。

Predator虛擬實境打機

電競界發展愈趨成熟，Predator系列可說食正條水，今年再有兩名成員加入陣營，分別係Predator 17X筆電及Predator G1主機。前者沿用上代Predator 17嘅黑色機身及紅色LED設計，但GPU改用GeForce GTX 980，配以支援超頻嘅Core i7處理器及最高64GB RAM，打機效能媲美桌面電腦。此外，機身正前方加設進氣口，配以後方兩組散熱扇，大大提升散熱效率。

Predator G1電腦主機更有突破，盔甲機箱Size約16公升容量，廠方特別為它炮製手提行李箱，讓Gamer可連機帶篋周圍走，出國比賽時大派用場。另支援市場上4大VR裝置，包括Oculus、HTC Vive、OSVR及StarVR，虛擬實境打機冇難度。

特派記者：林子聰

鳴謝：Acer