Casio Vs LG智能錶文武決

Casio WSD-F10 名廠頭炮

作為Casio首隻Android Wear智能錶，WSD-F10就算冇G-Shock或Baby-G牌頭，今年初在CES亮相時已令全球錶迷引頸以待。輾轉數月終於在部分地區上市，仲要指定喺網上銷售，想買都唔係咁易。而首批來港的以Made in Japan日版為主，有齊橙、軍綠、黑及紅4色選擇，當地定價要近70,000日圓，比美版標價500美元貴唔少，不過都算係「早買早享受」良機！

WSD-F10用上磁吸式充電線，一吸即叉電，但接觸點太細容易脫落。

WSD-F10錶身備有3顆按鍵，分別用來開啟監測工具、主頁及常用程式。

規格表

處理器：廠方未有提供

記憶體：512MB RAM、4GB ROM

屏幕：1.32吋TFT（320×300解像度）

對外連接：藍芽4.1、802.11b/g/n

作業系統：Android Wear

續航時間：1至3.5天（智能模式）、1個月（手錶模式）

體積：61.7×56.4×15.7mm

重量：約93g

LG Watch Urbane 2nd Edition LTE 改良再生

LG開發Android Wear好有經驗，前年有頭炮G Watch，上年有圓形錶盤嘅Watch Urbane。偏偏到上年底推出嘅第2代Watch Urbane 2nd Edition LTE，因硬件問題上市6天即「夭折」，一度令機Gor以為它是史上最短命嘅智能錶。意外的是，復活節過後它真的「復活」，軟硬件完全修正，並挾着全球首款支援LTE的Android Wear名號，拎上手煲粥，話題十足！

Urbane專用充電線以磁力抓緊錶底，不易鬆脫。

Urbane的錶冠是Home掣，另外設有通訊錄及LG Health按鍵。

規格表

處理器：四核心1.2GHz

記憶體：768MB RAM、4GB ROM

屏幕：1.38吋P-­OLED（480×480解像度）

對外連接：FDD-LTE、藍芽4.1、802.11b/g/n

作業系統：Android Wear

續航時間：120分鐘（3G/4G通話）、35至40小時（待命模式）

體積：44.5×51.2×14.2mm

重量：約92.8g

第一回合：鬥賣相舒適 DRAW

手錶日日戴，賣相真係好重要。WSD-F10用上Casio經典嘅圓形運動錶造型，雖然大大隻厚度有15.7mm，配以膠錶帶頗為累贅，但機Gor呢啲粗獷型男最Buy。Urbane則沿用上代不銹鋼錶殼設計，而且矽膠錶帶不黏皮膚，夏天戴都唔焗汗。屏幕方面，Urbane大少少，解像度又高少少，但WSD-F10嘅亮度比對手佳，只是細心一看會發覺芒底畫面有些少虛位，設計有啲怪喎！

WSD-F10的字體都算清晰，但芒底嘅虛位就有啲怪。

沿用Casio一貫膠錶帶，只係材質有點偏硬。

Urbane字體較銳利，畫面縮細後依然清晰。

Urbane的矽膠錶帶較柔軟，長時間戴上手都唔焗汗。

第二回合：鬥運動監測 Casio WSD-F10 WIN

機Gor向來鍾意運動，WSD-F10支援MIL-STD-810美國軍用標準，點撞點跌都唔怕，並內置氣壓計、高度儀、加速計、陀螺儀、指南針等感測器，配合潮汐漲退及日出日落時間，戴去極地都冇問題。另一賣點是可於單一屏幕顯示多項資料，唔使撳來撳去咁麻煩，同時又有遠足、釣魚及單車等運動模式；唯一缺點係不設心率計，有埋就Perfect啦！Urbane則支援LG Health體檢功能，可量度步數、步行距離、心跳及卡路里消耗量等數值，只係機Gor測試時發覺心率計要好貼肉先用到，實際用途不大。

WSD-F10內置高度儀，仲可於畫面看到上落變化，行山必備！

可透過專用App開啟遠足、釣魚及單車模式，功能專業。

Urbane可同步計算時間及心跳率，適合跑步時使用。

Urbane錶底備有心率計，可惜要好貼肉先用到。

第三回合：鬥特異功能 DRAW

幾千蚊買隻智能錶，冇番啲獨家功能機Gor點會收貨。WSD-F10加入雙層屏幕設計，可用單色芒取代彩色芒，令續航力增至1個月，唔使日日充電咁麻煩！另加入50米防水功能，莫講話落雨水濺，戴住佢去潛水都冇問題，將Urbane嘅IP67防水標準完全比下去。Urbane則首次加入4G LTE功能，只要打開錶底插入nanoSIM卡，即能獨立撥號通話及上網收短訊，而且聲音夠響接收靈敏，唔似WSD-F10要無線連接手機嚟玩。

WSD-F10支援50米防水功能，實試掉落水都掂！

換成單色屏幕後，畫面跟G-Shock相若。

Urbane錶底設有nanoSIM卡槽。

可直接以Urbane煲粥，收音靈敏！

香港資訊科技商會榮譽會長 方保僑（Francis）：「首要留意續航力！」

「依家Android Wear面對兩大難題，一係續航力低，二係功能大同小異，令各廠的智能錶難以突圍。建議大家選購時，先留意智能錶的電池續航力，最好是揀選能運行一個星期左右、充電又方便的型號，否則日日充電都幾麻煩。另要留意它有否高度計、防水等附加功能，以提高智能錶應付不同環境的可能性。」

機Gor Report：WSD-F10專攻運動 Urbane男女合用

Casio WSD-F10將智能系統與固有錶形結合，成功為市場掟下一枚震撼彈，不過其外形大隻又粗獷，只啱機Gor這類型男佩戴，而且定位太着重運動，部分功能如50米防水、潮汐漲退時間等，甚至媲美專業運動錶。而LG研發Android Wear智能錶相當有經驗，加上Urbane具備4G通話及偵測心跳等運動功能，足以應付日常需要，男女合用。

機Gor Profile

機不離身，不信Spec只信測試，不扮高深，懶理低俗，貪新不忘舊。

查詢電話：（A）2374 0618、（B）3543 7777

撰文：機Gor