曼谷屎都好玩？

究竟屎係咪一定無聊同污穢？這條極為哲學性的問題，早在電影《回魂夜》中就曾經討論過，估唔到在曼谷，當真有人對屎感興趣，仲特登走去食添！「喂，好核突啫！」但如果所謂的「屎」其實係朱古力味的甜品，咁順眼咗，會唔會畀「屎味朱古力」易哽先？成日話「黑起上嚟，屎都飛入口」，計我話，連屎甜品都夠膽擺入口的人，仲有乜能夠成為「黑仔」的事件？敢食屎，世界再冇黑仔啦！

問題猛男Roger在《Do姐有問題》介紹的屎甜品，就嚇到一眾主持面容扭曲。

臥虎藏龍設計師

如果大家有收看大台節目《Do姐有問題》，相信對問題猛男胡慧沖（Roger）介紹的泰國小店不會陌生，當中論最騎呢、核突，嚇到一眾主持面容扭曲的推介，非屎甜品莫屬。令人聞風喪膽的屎甜品原來出自雪糕店Icedea老闆娘Prima手筆，最令人意想不到的是，Prima出身自書香世家，她畢業於泰國最有威望的朱拉隆功大學（Chulalongkorn University），修讀設計，畢業後從事文具、產品等設計工作，不過佢認為設計不應只局限於家品、文具、時裝等，其實細微如軟雪糕都可以是設計師天馬行空的畫布，於是她在09年，就開設自家雪糕店，更實現了小時候的志願──雪糕設計師。

藉着雪糕說道理

《回魂夜》經典對白：「因為你懶係受過高等教育，出入又懶係上流社會，係你嘅懶係學識認為屎就係無聊同污穢嘅。」唔知Prima係咪睇過《回魂夜》，接受高等教育的她，早已放下世俗對屎的偏見，精心設計這款屎甜品，她先設計好屎的模具，並用朱古力布朗尼及木糠布甸製作維肖維妙的屎甜品，外形跟街上的「黃金」無異，並非首次食「屎」的Roger，每次都要閉起雙眼才能大啖大啖擺入口，當Roger嗒真點，又發覺布朗尼香口美味，實驗證明放低偏見非常重要！這裏的搞笑甜品還有由果汁及梳打水打造的假牙冰、鐵板牛扒雪糕、流沙菠蘿包雪糕等等，像真度達99%！除了搞笑系列，Prima亦希望藉雪糕表達對環保的關注，她又設計了一款名為Global Warming的雪糕，雪糕賣相跟地球相似，惟隨溫度上升，地球跟雪糕都會受到嚴重破壞，藉雪糕表達對地球的關注，光是這份創意就值得大家支持！

用朱古力布朗尼及木糠布甸製作維肖維妙的屎甜品，外形跟街上的「黃金」無異！185 Baht（約HK$41）。	為表達對環保的關注，Prima設計了一款名為Global Warming的雪糕。	修讀設計出身的Prima，認為創作不應帶有前設，細微如軟雪糕都可以是畫布，看似核突的屎都可以是甜品。
紅莓冰加梳打水製成的假牙冰及洗牙水，單是外形已叫人打冷震！99 Baht（約HK$22）。	鐵板牛扒造型雪糕，仲有分Well Done同Medium Rare，勁搞笑！159 Baht（約HK$35）。	鐵板牛扒的薯仔原來用香蕉製成，好抵死！
店員即製的厚多士，落了勁多牛油，超邪惡。	店內提供的雪糕口味創意爆棚，芝士、Wasbi味又試過未？