創意Gadgets突圍集資是常識吧！

年輕人想靠創意突圍，一來無開發資金，二來捱唔起貴租，是否注定成為「廢青」？大家不妨放眼世界，結集網民力量一樣可以夢想成真！講緊嘅係近年大熱嘅Crowd Funding網上集資，不時有創意產品吸引到Backers真金白銀支持，部分新品甚至量產賣街，好似近日抵港嘅Mars懸浮喇叭和RestOn睡眠偵測器，這些創意Gadgets原來都上到大枱！

Mars懸浮喇叭
售價：$2,990

Mars懸浮喇叭內外兼備

由深圳crazybaby研發嘅Mars懸浮喇叭，去年於Indiegogo網站集資到近82萬美元，最煞食當然係其創意懸浮設計，機身分為上下兩部分，上半為飛碟形喇叭，下半為圓柱形低音底座。前者內置全音單元，可獨立拆開經藍芽連接手機、平板等播歌，更支援IPX7防水標準，帶去踩車、野餐都唔怕失魂雨整濕部機。返到屋企將飛碟形喇叭放回底座即可充電，當電量充至超過20%，底座便會啟動磁浮功能，將飛碟喇叭緩緩升起約2cm凌空運作，科幻感十足；底座內嘅低音炮還可提升音質，內外兼備。

集資研發抵港開賣

依家Mars除咗可以喺美國Amazon網購，最近仲畀代理商引入香港，換言之各位唔使再上網估估吓，可以親身睇完、試完再直接買返屋企。值得一提，開發商近期「食過翻尋味」，於另一大型集資網站Kickstarter，為便攜藍芽喇叭Luna集資，暫時目標金額已超過一半，仲有三十幾天時間，唔知最終會否成功呢？

Mars機身以金屬打造，上半部飛碟形喇叭播歌時會凌空升起約2cm。

Mars喇叭底部設有磁石，必須對準底座位置方可啟動懸浮功能。

配合機面兩組USB插口，Mars可為其他Gadgets充電。

crazybaby最近於集資網站Kickstarter「眾籌」開發Luna喇叭，詳情可瀏覽網址http://crazybaby.com/luna。

crazybaby最近於集資網站Kickstarter「眾籌」開發Luna喇叭，詳情可瀏覽網址http://crazybaby.com/luna。

RestOn 大牌聯乘

同樣於Indiegogo集資成功嘅RestOn睡眠偵測器（Sleep Tracker），只要將產品平放喺床墊上，即可記錄用家的心跳、呼吸率、身體動作及睡眠周期，於手機App內顯示睡眠質素和結果。產品由Sleepace開發，於其官網（http://www.mysleepace.com）當然可直接購買，不過細心嘅讀者可能會發現市面有一款同叫作RestOn的產品，卻由賣開床褥嘅Sinomax推出。其實兩廠上年簽訂合作協議，產品技術互相交流，有大牌撐住自然更有信心。