東京大搜尋櫻之限定

Le Creuset鑄鐵鍋 手斷照搶

法國鑄鐵鍋Le Creuset為咗湊櫻花熱，推出日本限定的「Flower Collection」，粉紅、粉紫的櫻花形狀產品，由招牌鑄鐵鍋到不同尺寸的瓷器碗碟都有，最平的5件裝花瓣小碟就索價￥6,480（約HK$442），而將於3月16日正式發售、全場最「真．貴」的25周年限量版櫻花鍋則要￥51,840（約HK$3,533），店員話已經有唔少人落單預訂！

House Of Rose 一身香晒

個人護理品牌House Of Rose今年推出期間限定「Sakura Kaoru」系列，發售期至3月31日，粉紅色包裝的香薰、香梘、潤膚乳等，全部散發淡淡的櫻花香氣，好似無時無刻都漫步於櫻花樹下一樣。

買唔到限量版的話，不妨買呢個¥35,640（約HK$2,429）的櫻花形狀鍋補數。	25周年限量版櫻花鍋退稅後只需¥48,000（約HK$3,279），唔係唔買呀？	配上假櫻花的室內香薰，營造晝夜無間賞花的效果，¥1,080（約HK$73）。

食品系列 魚目混珠

放得入口的食品最容易魚目混珠，Asahi的罐換了櫻花包裝，但罐內啤酒味道依舊。好彩，調味料生產商夕香亭的食鹽同果醋等櫻花系列產品，全部都真係加咗櫻花成分，是次櫻花產品大搜尋的任務，才稱得上圓滿結束。

散發淡淡櫻花味的香梘，連賣相都仔細到跟櫻花一模一樣，￥216（約HK$14）。	夕香亭出產的櫻花食鹽，成分中有如假包換的櫻花花瓣。	是換罐不換酒的Asahi春季特別包裝，搞錯。

Starbucks櫻花杯 海底撈月

唔使多介紹，Starbucks杯出極都有，永遠有人收藏，但唔知係咪「隔籬飯香」，日本推出嘅限定版好似點睇都靚啲，今年仲要打孖上，2月15日先賣走水彩粉色優雅效果的「Serene」系列，3月1日再推出主打活力鮮艷的「Cherry」系列，雖然販賣時間至4月中，但3月頭記者發現已冇乜貨，如果閣下去找到一間隱世Starbucks仲有貨，就真係執到尾彩了！

撰文：吳倩瑩

部分相片：互聯網