實物原大！蝙蝠俠對超人　Batmobile全球首展

蝙蝠車係唔少人嘅Dream Car，想一睹其真身？近日正式開幕嘅《蝙蝠俠對超人︰正義曙光》× 又一城 powered by Hot Toys展覽，就能讓各位圓夢，皆因1:1嘅新版Batmobile竟然駛入場中作全球首展，由裝甲到機關都可睇清睇楚。必睇位還有各款真人雕像、1:6戰鬥場景及期間限定商品，蝙蝠俠鬥超人邊個好揪我就唔知，但最後贏嘅一定係入場觀眾！

實物原大的新Batmobile，長20呎、闊10呎，有成架巴士咁長！

1:1新版蝙蝠車

Hot Toys嘅珍藏人偶展過往舉辦過唔少，但大多與Marvel Studios合作，與DC Comics聯乘可謂首次。為搞搞新意思，今次Figure展特別移師又一城舉行，並首度將電影中的重型載具Batmobile以實物原大姿態展出。小記甫入展覽中庭，已被此車嚇親，皆因全車長20呎、闊10呎，十足巴士咁巨型，而且重達1噸，氣勢贏晒！最難得係佢連裝甲、輪胎、車門開關、車頭機關炮等全部造齊，配合全車舊化效果，基本上同電影道具一樣。

植髮「神女」有仙氣

蝙蝠車以外，戲內三大主角：蝙蝠俠、超人及神奇女俠亦有真人雕像展出，全部取材自電影公司官方圖樣，並經人手精雕細琢，最後交由大師JC Hong塗裝上色才大功告成。實物所見，根本是同廠1:6 Figure嘅放大版，頭雕輪廓、膚色表情幾可亂真，一洗以往雕像嘅「膠味」。當中神奇女俠嘅一頭黑髮更以高仿真髮料，由人手植入而成，難怪如此飄逸有層次，「神女」仙氣十足！另一邊廂更有原大裝甲蝙蝠俠及蝙蝠信號燈，前者內置LED雙眼，後者則可如實發光，氣氛一流！

真人原大超人雕像，表情輪廓像真，似足演員Henry Cavill。

神奇女俠雕像一洗「膠味」，一頭秀髮更用植髮製成！

展出嘅當然唔少得1:6 Figure，部分仲以對決姿態亮相。

買滿$300可玩遊戲

場中當然唔少得一系列1:6珍藏Figure，蝙蝠俠、超人、裝甲蝙蝠俠及沙漠版蝙蝠俠全部粉墨登場，部分更以對決姿態亮相，而與潮牌:CHOCOOLATE合作嘅亮鉑電鍍黑色版裝甲蝙蝠俠，更於場內率先收訂，粉絲記得帶定銀彈入場。場內另一「跌錢位」係期間限定店，備有Cosbaby Q版人偶、布偶、童裝風褸、貼紙及襟章等別注精品發售。滿足完購物欲後記得咪走住，事關買滿港幣$300或以上，即可參加互動遊戲，例如透過動作感應器掟蝙蝠鏢等，更有機會贏取限量禮品，等小記試吓身手先！

購物滿$300即可參加互動遊戲，圖中一款可透過動作感應器掟出蝙蝠鏢！	1:1裝甲蝙蝠俠及信號燈位於UG層，發光後別具氣氛。	展覽場地嘅頂部原來係電影Logo，充滿心思。
場內備有大量電影相關1:6 Figure發售，即買即玩。	3款特別塗裝裝甲蝙蝠俠Cosbaby只限場內發售，各售$138。	導演郭子健入場朝聖後表示︰「最震撼係架蝙蝠車，套戲都未必有全相睇，依家成架擺喺你面前，唔係唔睇清楚呀？」
Cosbaby迷你蝙蝠車將不日於場內發售，售價待定，依家讓各位先睹為快。	由即日起至3月9日，亮鉑電鍍黑色版裝甲蝙蝠俠於場內接受預訂，預訂價$1,780。	期間限定店將發售多款Cosbaby Q版人偶、布偶、童裝風褸、貼紙及襟章等。