北京直擊！小米5晒靚背鬥顏值

3個版本硬件超班

相隔年多時間，小米再次喺北京國家會議中心發布旗艦手機小米5。當中嘅硬件規格冇令「米粉」（小米粉絲）失望，搭載最新Qualcomm Snapdragon 820四核心處理器，並且提供3個版本，除了處理器時脈作微調外，標準版及高配版分別內置3GB RAM加32GB ROM以及3GB RAM加64GB ROM，若嫌唔夠勁的話，尊享版仲用上4GB RAM加128GB ROM。廠方表示處理器效能比上代旗艦處理器Snapdragon 810快100%，小記喺會場以尊享版跑《AnTuTu》測試，得分超過12萬分，證明效能絕唔嘢小！新機還支援全網通兼雙卡雙待，惟不設記憶卡槽要扣啲分。

精緻陶瓷機背

今次新機依舊採用金屬機框，不過設計和物料全面革新，5.15吋全高清屏幕嘅邊框僅得2.3mm闊，機面下方首次增設實體和觸控兩用Home鍵，並支援指紋辨識功能。最大變化是機背採用兩邊曲面設計，標準版及高配版提供黑、白、金3色，機背均用上玻璃物料，而尊享版更換上黑色陶瓷物料，官方表示此物料達8級摩氏硬度，堅硬程度比玻璃更高，不易碎裂及刮花。現場所見，兩款機背物料都幾反光，感覺典雅高貴，比較之下，陶瓷機背觸感冇咁冰涼，光線折射下更會帶出灰色層次，極其精緻。不過貪靚都要付出代價，因為陶瓷機背幾易黏上指紋，各位用家相信要抹布隨身了。

入場人數超過2,000人，當中包括各地「米粉」，場面墟冚。	發布會由小米創辦人雷軍唱獨腳戲，全程講足1個鐘。	想知邊個靚啲？開「顏值評測」就知。

四軸防震鏡頭

除咗效能和外形，鏡頭質素都係買機嘅先決條件，小米5將主鏡頭升級至1,600萬像素並支援4K拍片，更特別係引入四軸光學防震功能，可補償8個方向的震動，發布時仲播放小米5與iPhone 6s拍攝嘅示範片，明顯見到前者畫質更穩定。而前置400萬像素鏡頭亦有噱頭，支援實時美顏、自拍顯示年齡外，同時引入「顏值評測」，手機會自動為人面進行評分！系統方面則用上Android 6.0及MIUI 7介面，新功能包括「一鍵換機」及「視頻電話」，前者可將短訊、聯絡人、郵件、Apps、遊戲進度等由舊機轉到新機，換Android手機時大派用場；後者可以喺對話窗內加入即時美顏效果，並支援4人群組聊天。至於開賣日期，廠方表示內地3月1日正式開售，香港市場隨之短期內上市。

一般屏幕用上12至14枚背光燈，而小米5則用上16枚背光燈，並支援95% NTSC顯示效果。	機身重量介乎129g至139g，比同級機款更輕巧。	支援雙卡雙待及全網通，兩個卡槽均使用nanoSIM卡。
改用USB Type-C插口，並支援Quick Charge 3.0技術。	「一鍵換機」可將舊機資料傳到新機，方便換機一族。	「視頻電話」支援視頻美顏及4人群組聊天，好玩又實用。

規格表

制式：GSM、WCDMA、LTE

處理器：Qualcomm Snapdragon 820

記憶體：3GB RAM配32GB/64GB ROM（標準版/高配版）、4GB RAM配128GB ROM（尊享版）

屏幕：5.15吋（1,920×1,080解像度）

鏡頭：（前置）400萬像素、（後置）1,600萬像素

對外連接：USB Type-C、藍芽4.2、802.11ac

電池容量：3,000mAh

體積：144.55×69.2×7.25mm

重量：129g（標準版/高配版）、139g（尊享版）

同場加映：小米手機4S　淡紫迷人

同場另有小米手機4S登場，屬小米手機4的升級版，用上金屬邊框及雙面玻璃設計，提供黑、白、金色之外，同時有女生特別版淡紫色。硬件方面屬高階級數，採用Qualcomm Snapdragon 808處理器、3GB RAM、64GB ROM、5吋全高清屏幕及1,300萬像素主鏡頭，並於機背加設指紋辨識器，定價1,699人民幣，相當抵玩。

小米4S提供4款配色，設計與小米4相似。

機背加入斜紋設計，淡紫色實物唔算浮誇。

特派記者：林子聰

鳴謝：小米

網址：http://www.mi.com/mi5/