FAR CRY PRIMAL石器時代搏鬥長毛象

《Far Cry》系列向來將遊戲背景設定於蠻荒極地，譬如熱帶雨林、喜馬拉雅山等，今日開賣嘅新一集《Far Cry Primal》玩得更大，將遊戲時間軸推前一萬年到石器時代，玩家要拎住長矛、弓箭跟野獸搏命，同平時玩開揸刀揸槍嘅動作射擊遊戲好大分別！

用家可製作不同道具和武器，作狩獵和攻擊之用。

抵禦其他部族入侵

石器時代係點？相信你同我都唔太清楚，所以《Far Cry Primal》創製出開放式遊戲世界「歐羅斯」，內容講玩家所屬嘅狩獵族群，被其他族群攻擊，玩家要從生活中學識點樣用火、以野獸骨頭製作武器和工具等，既要防禦當時的猛獸，又要抵擋其他部族的攻擊，原來一萬年前嘅生活都唔易過，一唔小心就會成為其他敵人或猛獸嘅點心。

製作道具狩獵巨獸

遊戲背景是長毛象同劍齒虎橫行的世界，對於只擁有原始工具和武器的玩家，要避開牠們的長牙利爪攻擊絕非易事。好在人類懂得用腦，透過不斷採集資源，如狩獵動物取得毛皮及骨頭來製造道具，甚至可馴服各種野獸作為自己幫手，小記試玩時發覺遊戲初期較易馴服野狼，帶牠一同外出狩獵，可更易獵得大型動物；到後期還可馴服劍齒虎，當然玩家要循序漸進慢慢領悟方法。