免炸超低脂脆薯角
減肥最難捱就是要忍口，忍忍吓，就會好想放棄，所以當初我減肥時，都會為自己做些低脂、香口、飽肚的小食，在適當時候滿足口腹。今次教大家做的免炸低脂脆薯角，見到「免炸」，大家應該幾開心啦！但我知好多人都覺得薯仔好肥，其實薯仔本身屬無脂肪、高營養、低卡路里食物，但吃小量已經好飽肚。肥是源於大家都習慣用油炸方法去煮，煮時又加入大量牛油、芝士、忌廉、含動物肥膏製作出來的醬汁等，只要減去這些材料，好似我這張食譜般，一人分量都不過是178卡路里。
做法方面，首先在焗盤鋪上錫紙，置焗爐，用220℃預熱。接着將焗薯切成6至9件，放入用袋盛載的麵粉中搖勻，然後落油搖勻，之後放入「調味料」拌勻。將焗盤取出，表面掃上一層油防黏，放上薯角，置於已預熱的220℃焗爐內，底面各焗20至25分鐘即成，可蘸茄汁來吃。想知詳細做法，立即上東網收看我為大家拍攝的視像教學啦！
分量（3人份）每份178卡路里
材料
焗薯（切成6至9件）2個
中筋麵粉 15克
淡味橄欖油 1湯匙
調味料
蒜頭粉 1茶匙
煙紅椒粉（Smoked Paprika） 1/2茶匙
意大利乾雜香草（Italian Mixed Herbs）1茶匙
海鹽 3/4至1茶匙 （3/4茶匙＝夠味；1茶匙＝清楚吃到鹹味）
黑胡椒 1/2茶匙
加仁里辣椒粉（Cayenne Pepper） 1/4茶匙（如不吃辣可不放）
靈山小貼士
1. 超市買到的焗薯，跟街市的新薯相比，質地較粉，更容易做到香脆效果。
2. 煙紅椒粉Smoked Paprika，帶煙熏味；而紅椒粉Paprika只有甜味，記得別買錯。
3. 若找不到加仁里辣椒粉Cayenne Pepper，可用普通辣椒粉代替。
4. 薯仔跟很多種香草都配合，例如迷迭香、牛至、百里香、蒔蘿、羅勒、番荽等，用你手頭上有的，毋須額外買。
Profile
周靈山，愛情及食譜專欄作家。後創辦網站lively.com.hk，推廣懂愛、懂吃、懂心靈快樂的人生。Facebook︰http://www.facebook.com/lively.com.hk/