腕上超級英雄

邊個唔想做超級英雄？有型有錢仲可以拯救世界，但現實生活中又有幾多個Batman？一眾超級英雄除了定時定候現身大銀幕跟大家見面外，閒時亦樂於客串一角走入潮界。今回本地腕錶品牌MW（www.momentwatches.com）特別與DC Comics及Warner Bros. Entertainment攜手合作，以快將上映的新一集超級英雄電影《Batman v Superman：Dawn of Justice》為主題，打造出一系列聯乘腕錶。合共5款的設計，包括有兩款Batman、兩款Superman及一款Wonder Woman，而每款錶盒設計亦採用對應的超級英雄圖案，極盡精美。與此同時，是次系列更同步推出限量版款式，每個錶款設計頭50位顧客都可以於真皮錶帶（普通版為膠錶帶）上刻上個人名字，變成更獨一無二的專屬腕錶，所費無幾就可以扮吓超級英雄，呢啲錢真係點都要畀！