FIFA足球博物館 2月瑞士開幕

德國多蒙特早開了足球博物館，可惜只介紹德國足球史，「國際化」波友又點會夠喉？好在瑞士蘇黎世的「FIFA世界足球博物館」即將於2月28日開幕，波友們又多一個好去處！面積約3,000多方米的博物館內，展品超過1,000件，由1930年烏拉圭的首屆世界盃，到2年前的巴西世界盃，球賽紀錄、獎牌、官方照片都一一展出，最澎湃是國際足協209個成員國的國家隊波衫都有齊，真正大晒冷。場內的互動區亦甚有睇頭，唔識踢波，都可以對住巨Mon模仿球星入球一刻。唔好阻住我，我準備着住件阿根廷波衫，左穿右插，來個美斯級射波法！