開工大吉有望升職加薪

說話有福氣

常師傅指喺丙申猴年，天干為丙火，地支為申金，五行納音為山下火，故此今年為火猴年，而犯太歲嘅生肖則為猴、虎、豬及蛇。雖然今年火氣頗旺，但明天開工最好就係收吓火，皆因喺開工第一日都希望攞番個好意頭，從年頭好到年尾，自然全年都順利大吉、和諧歡欣、增運添財。

大家最好講多啲祝福性嘅吉祥說話，例如：身體健康、事事順境、工作順利等。當然，新正頭梗係要避免講一啲唔吉利嘅說話，尤其係一啲關於死亡、嘆氣、侮辱、病痛、哭泣、詛咒等嘅語句，不但可以起到趨吉避凶嘅作用，同時又可以散發正能量，猴年自然能夠做到身心康泰，工作上亦可事事順心啦！

切忌打爛嘢

開工首日大家要注意一啲避忌，就係千祈唔好打爛嘢，當中尤忌打爛碗。常師傅解釋碗有工作財源嘅意思，如果開工首日打爛碗嘅話，即係工作被破壞，咁係相當唔吉利。大家可選用一啲塑膠或不銹鋼所製，而避免使用瓷或玻璃製成嘅碗，自然可避免打爛碗，影響工作運。

此外，大家亦要謹記唔好往門外潑水或掃地，因為會將屋內嘅好運同財運掃走，亦會影響到大家嘅工作運及財運。常師傅又提到，喺猴年忌用白色嘅物品，最好選用紅色或紫色呢啲同吉慶有關嘅顏色，自然可以積聚運氣，令工作順境。

衣「色」配搭得宜

喺好多人心目中，既然係開工首日加上仍喺新正頭關係，衣服理所當然着得有咁紅得紅，既應景又有吉祥喜慶嘅意思。不過常師傅指，如果想令工作運暢旺嘅話，其實唔係每個生肖都要着紅色嘅衣服，應該挑選最適合自己顏色服飾，先至可以起到催動工作運及財運嘅作用。既然係咁，究竟對唔同生肖嘅人士嚟講，應該着邊種顏色嘅服飾先至最為得宜呢？大家唔使心急，常師傅就為大家列出12生肖嘅催運服「色」，大家只需配搭得宜，工作自然特別醒神。

鼠：金、銀色

牛：紫色

虎：藍色

兔：黑色

龍：紅色

蛇：青綠色

馬：綠色

羊：粉紅色

猴：黃色

雞：啡色

狗：火紅、橙紅色

豬：白色

飾物要戴啱

男士開工要執得企企理理，女士喺開工時亦會悉心打扮一番，務求喺猴年能夠有新氣象嘅同時，又能夠表現得更加精神，從而令工作順順利利。為咗提升個人魅力，梗係唔少得佩戴飾物，令外表變得更吸引同醒神！不過想既能令外觀變得迷人，同時又可提升工作運嘅話，最一舉兩得嘅方法係佩戴一啲適合自己所屬生肖形狀嘅飾物。

鼠：圓形

牛：星形

虎：波浪形

兔：水滴形

龍：火燄形

蛇：長條形

馬：長方形

羊：多角形

猴：正方形

雞：正方形

狗：太陽形

豬：圓形

晶石增運勢

唔少人都鍾意喺屋企及辦公室擺放各種晶石，根據坊間嘅講法，銀髮晶、綠幽靈、黃晶等都具有幫助事業運嘅作用，唔通真係要擺齊晒先至有效？常師傅表示其實唔使擺放咁多，只要揀選一啲適合自己所屬嘅生肖晶石，自然可以起到催谷工作及財運嘅功用。

鼠：金髮晶

牛：紫水晶

虎：藍瑪瑙

兔：黑瑪瑙

龍：紅石榴石

蛇：綠幽靈

馬：綠髮晶

羊：粉紅晶

猴：琥珀

雞：虎眼石

狗：太陽晶

豬：白髮晶

枱頭擺設添動力

對打工仔嚟講，對住張辦公枱嘅時間，有機會比對住屋企張床仲要長。既然工作時間佔據咗生活嘅一大部分，而辦公枱又係一個咁重要嘅工作地方，自然要放啲擺設，既可提升工作嘅動力，又可以令工作變得更有樂趣，仲可以顯示出個人品味，真係一舉三得呀！

鼠：鳥形（鳳凰）

牛：馬形

虎：豬形

兔：鼠形

龍：火燄或太陽

蛇：樹木

馬：長柱形

羊：鳥形（孔雀）

猴：正方形陶瓷

雞：正方形裝沙的樽

狗：太陽形或向日葵

豬：圓形鏡子

催旺吉星更上一層樓

每年「九宮飛星」嘅吉凶星都會飛臨唔同嘅宮位，如果想催旺吉星力量，並且減弱凶星所帶嚟嘅影響，可以透過風水擺設，從而達到理想效果。

西南方 八白正財星

顧名思義，正財星掌催動事業及正財，如果想升職加薪嘅話，可以催旺呢個方位。不過有一點要留意，因為今年太歲星亦同時喺呢個方位緣故，凡事宜靜不宜動，所以大家可以擺放一盞枱燈，由於枱燈係靜中帶動嘅物件，既具有催旺作用而又唔犯到太歲

正南方 六白偏財星

今年嘅偏財星飛入正南方，如果想發小橫財嘅話，就要好好催旺呢個方位。呢顆星屬金，催旺方法就要利用五行中嘅土，可以放置屬土嘅物件，例如一個正方形嘅陶瓷，或者一個正方形嘅玻璃樽中放滿沙子亦可。

正東方 九紫喜慶星

喜慶星除咗主結婚、壽宴等嘅喜慶事外，亦主人緣同貴人。不論工作定做生意，出外都要靠朋友，尤其係做生意嘅人士，更希望得到貴人相助。呢顆星屬火，可以擺放木製嘅物件，例如木製相架、竹製筆筒等。

東南方 一白桃花星

桃花星唔只係主男女姻緣運勢，佢主人緣之餘，同時亦主小偏財，尤其係對做生意及經常要接觸其他人嘅工作，例如銷售、客戶服務、管理等工作嘅人，只要擺放一面圓形鏡子，或者電腦喇叭，便可以催旺呢顆桃花星。

正西方 四綠文昌星

文昌星並唔係只對讀書嘅學生有影響，其實呢顆主思想同腦筋嘅星，對於從事文職、創作、管理等工作嘅人士，同樣會有影響性。文昌星喺五行中屬木，放置水種植物，不但可增強文昌星嘅作用，更能綠化居室同埋辦公室添！

正北方 七赤破軍星

破軍星屬凶星之一，呢顆星主破財，要化解的話，千祈唔好催動呢個方位，唔好擺放動態或屬土同金嘅物件，只需擺放一杯水便可洩減佢嘅凶氣。

西北方 三碧祿存星

祿存星主是非爭執，不但會影響人際關係，對於工作上亦容易出現爭拗，擺放一啲有關火嘅物件，例如紅色嘅太陽形掛飾，記得要將佢固定黐實，唔好有擺動，咁先至有洩其氣之效。

正中央 二黑巨門星

巨門星主疾病，如果喺辦公室坐正中央位置嘅話就要小心，因為會影響健康。化解方法係喺辦公枱鋪上一張圓形嘅白色布，可洩減黑星嘅力量，令人身體健康，工作自然更醒神。

東北方 五黃廉貞星

主災厄同禍害嘅廉貞星飛臨東北方位，呢顆星五行屬土，最忌擺放屬火嘅物件，反而要用金嚟洩其凶煞，例如放置一個金屬製嘅盆或杯便可。

撰文：林國豪

攝影：陳世昌

模特兒：Rhonda @ Inflate

鳴謝：梅花易數專家常歡