吉時出門旺足全年
龍馬精神、萬事勝意！
踏入猴年大年初一，當然要同大家拜年，寓意新年行好運，事事順境。至於今日應該喺咩吉時出門？並朝邊個方向最旺？有請奇門遁甲大師雲文子、玄學家龍震天為大家講解邊個時辰及方位最大吉大利，開開心心慶新春！
黃金出門時間
所謂「一元復始，萬象更新」，大年初一是猴年迎接好運的最好時機，雲師傅以「奇門遁甲」推算三吉門所降臨的三個方位，想年頭行運到年尾，今日出門要做足準備先得！
若然係求事業運，喺卯時（即上午5時至7時）向正東方向行一個圈，喺職業上就得心應手，而求桃花運及人緣運記住喺巳時出門（即上午9時至11時），向東南方向行個圈，就算異性緣冇明顯提升，都可防口角是非及小人埋身呀！最後大家最關心嘅財運，喺午時（即上午11時至下午1時）出門向南方行個圈，咁就財運亨通啦！記得行大運一圈時，內心要默默為所求許願咁先有效，同時行一個圈就夠，貪心多行幾個係無用o架！另外，雲師傅提醒各位，黃金出門時間過咗就冇，記得睇時間做人喇！如果冇打算出外拜年，喺呢段時間出外走走，沾沾吉祥之氣都唔錯o架！
拜年行運Package
雖則拜年出門時間及方位好重要，但個人衣着服飾都唔好忽略，否則行運變霉運呀！雲師傅話初一最旺顏色係白色，衫或褲以白色為主都有幫助，而髮式女生曲髮最好，因五行屬水，能助旺正桃花；男生短髮見額最旺，因五行屬火，能旺貴人。
女生拜年忌着尖頭高踭鞋，有破財之意。男生就千萬咪着綠色或者黃色鞋，否則是非纏身。而內衣都有助提升運勢喎，女士們可多穿桃紅或白色內衣，可全年行好運；男生着紅色底褲拜年，一定會旺足成年。
新正頭10大禁忌
新正頭零舍多禁忌，雖然有啲煩，但玄學家龍震天表示宜忌兩者都要做足先有運行，因此各位千祈咪做啲唔做啲呀！
1. 直呼其名
天光前忌大聲說話，忌呼喚姓名又或催人早起床，極其量用鬧鐘或其他聲音叫醒對方。
2. 說不吉利話
吉利說話多講無妨，但不吉利如「破」、「壞」、「死」、「慘」、「悲」、「殺」、「病」、「痛」、「輸」、「窮」等千祈咪講，否則對來年運程不利！
3. 床前拜年
大年初一若受拜者臥床未起，是為不吉利，年內必多病多災，忌呀！
4. 打掃洗頭
初一日忌掃地拖地、倒垃圾或洗廁所等，免把財星掃走。個人方面亦忌洗頭，會洗走旺氣！
5. 舞刀弄剪
凡刀、剪、針之物件視為破壞性用具，故嚴禁使用，否則易招口舌是非，或有破財之災。
6. 追債放數
新正頭作為債主再急都好，追債對你及債仔雙方不利，同樣亦忌借錢畀人，免錢財一去不返。
7. 問人借火
是日不宜借火，火有開飯之意，借火等於自己冇飯開，就算去人屋企拜年都唔好用人哋個爐頭呀！
8. 單數壓歲錢
凡長輩給晚輩壓歲錢，金額必須雙數。
9. 午睡
有假放瞓覺是常識吧！但大年初一日午睡有不吉利之意，另外，早上切忌打噴嚏或咳嗽，有不祥之兆。
10. 大魚大肉
初一食素，功德無量，仲好過一年逢初一十五食素呀！
猴年整體運程 天災橫禍多
預測猴年整體運勢，雲師傅表示，猴年香港運勢動盪無力，整體格局虛而不實，雖未至於體無完膚，但長期處於內憂外患狀態，短期內難有明顯改善！
「傷門」主攻擊、追擊、進攻，但現臨「門迫」，代表動必有損，不論政治及民生，必遭抗議、推翻，惟所造成變動只會招來更大損失。人心對社會諸多不滿，整體風氣偏向更加激進矛盾。示威、譴責，傷人案有增無減。「傷門」逢「九天」，猴年天災橫禍多，特別道路、交通意外頻繁。
虛火為主 後繼無力
經濟環境會明顯走下坡之勢。臨「朱雀」，整體表象持觀望態度，前景逐步明朗化。實象「騰蛇」逢「擊刑」，猶如一條「內傷」龍在休養生息，臨格局「太白退位，如金化水流」，運勢此起彼落，看似好轉，另一面又開始淪陷，首當其衝是屬水行業零售業、旅遊業及運輸業。
在猴年運勢輸小當贏，主因內地人士對高消費產品購買意欲大降，吉舖湧現，舖租下調，但仍難挽留大客戶。
相反屬火行業興旺，如電子商貿、科技產品、互聯網及娛樂事業等有更佳業績。慎防當中多以虛火為主，後繼無力。
屬木行業如印刷、紙媒業運勢薄弱，難以在短期蓬勃。
整體樓市有向下調整之勢，但幅度不太大，特別豪宅價格、一手物業仍有一定升幅。屬土行業如地產在猴年平滯，表現未見突出。金融市場經歷上年極大波幅，投資者仍然沒有卻步，總體氣象比往年興旺，但存在不少暗湧，特別在農曆三月、四月、九月、
十月，會有較大起伏。雖有股民虧損甚大，惟「有危自有機」，得失不是一面倒仍有不少投資都能從波幅中獲利。屬金行業在猴年運勢提升。
12星座開運有法
大年初一去拜年就肯定啦！但原來不論送禮收禮，食乜玩乜，甚或乎出入過嘅地方都可以順勢增運，跟住嚟做豈不是好事成雙？有請星相師夢妮妲為12星座逐一講解！
水瓶座（21/1~19/2）
新春仍處於水瓶時代，對人影響力超強，趁放假又好天氣去行山既有益身心，也可以與朋友家人好好相處。但由於個人影響力太強，團拜就唔好搞，否則易得罪人，單獨拜年反而對整年健康及事業運都有提升！
幸運日：2月8日
黑仔日：2月11日
幸運物：火的符號及揮春
雙魚座（20/2~20/3）
不宜新嘗試，最好避開一切挑戰活動，咁所以去拜年係摯愛好友先好去，其餘可免則免，否則有衝突傷感情。送禮選擇金色物件提升運氣，同時留意對任何人講話要清楚，免生誤會。坐飛機或也可能有延誤，稍安毋躁。
幸運日：2月12及13日
黑仔日：2月14日
幸運物：蝴蝶結
白羊座（21/3~20/4）
新春繼續忙個不停，但都要抽時間着得靚靚去見吓人，佩戴綠色飾物，或到郊外，特別係西貢及大埔行大運，必能增加人緣及愛情運。送禮要揀唔使拆即時用嘅最啱，如鮮花或請人食飯都得！
幸運日：2月10日
黑仔日：2月13日
幸運物：手鏈及圍巾
金牛座（21/4~21/5）
過年開心指數一般，創意行業朋友待在家中會靈感湧現，由於身處凶月中，手提電話盡量少用，否則會跌爛、遺失甚或同對方吵架，總之必有損失，咁所以拜年要預早約好，買銀器或水晶送禮可驅走霉運。
幸運日：2月15及16日
黑仔日：2月11日
幸運物：戒指
雙子座（22/5~21/6）
「春」風得意，心花怒放，新春係你大日子，只要意願夠強再配合積極行動，即使求婚生B也必成事！拜年好，旅行好都圓滿到震，送有紅色禮品，如紅酒或桃花，對方今年會好好報答你。
幸運日：2月9日
黑仔日：2月11日
幸運物：紅色物品
巨蟹座（22/6~22/7）
過年凡事得心應手，最好同人分享，拜年之餘做埋義工，關心流浪者及小動物，小如捐血都有益。拜年可多考慮到訪有小動物朋友家中，同動物玩多啲，整體運都旺啲，送禮可隨心，但記得入面放兩封金色利是，帶旺埋對方！
幸運日：2月12日
黑仔日：2月22日
幸運物：金色利是封
獅子座（23/7~23/8）
初一至初四不宜獨留家中休息，反而多見人運氣會轉強，如果唔使年拜，不妨多做有益身心運動，建議向東行有助提升健康運，送禮則要選健康產品，亦可買架健身單車、按摩椅等送畀自己。
幸運日：2月10日
黑仔日：2月11及12日
幸運物：杧果
處女座（24/8~23/9）
有家庭朋友本年度開年非常重要，初二務必約齊家人食開年飯，可保各人平平安安，以住家菜最佳，拜年可送電子產品如平板電腦，可增加對方更多正能量，有助心想事成。過年可以喺家中向西邊燃燒鼠尾草，有助長輩健康。
幸運日：2月13日
黑仔日：2月9及12日
幸運物：山系物品、金魚
天秤座（24/9~23/10）
過年日子有苦有甜，情侶宜多忍讓否則吵鑊勁，拜年日揀雙數，仲要叫一班親戚朋友熱熱鬧鬧去，可將負能量分散，個人都開心啲，送禮最啱揀大大件食品兼一齊食，如曲奇餅、蘿蔔糕等都可增強健康運！
幸運日：2月16日
黑仔日：2月13日
幸運物：波鞋
天蠍座（24/10~22/11）
天蠍朋友有機會和伴侶鬧分手或感情有變，要小心處理！最好以不變應萬變，過年唔好太多大搞作，寧靜地度過可化解衝突。不宜外遊，否則白白浪費旅程。送保暖物品如頸巾或朱古力最啱！
幸運日：2月11及12日
黑仔日：2月9及10日
幸運物：頸巾
人馬座（23/11~22/12）
過年最適宜外遊，最好拍住白羊座及金牛座朋友一齊去，有助增加人緣運，但行程唔好排得太密，否則有損健康運兼傷和氣，如不打算到外地，由初一至初七都要搵朋友食飯團拜，送禮應揀實用為主，可增人緣運！
幸運日：2月14日
黑仔日：2月11及16日
幸運物：長襪
山羊座（23/12~20/1）
勁黑仔，過年要自求多福，要有將黑氣轉化正能量心態。揸車要特別小心，千祈咪亂泊位。小做小錯，謹記慎思慎言，去人屋企拜年咪亂講嘢，否則得罪人多。有伴侶嘅亦盡量避免一齊前往拜年，送禮交人代辦為佳！
幸運日：2月8日
黑仔日：2月14日
幸運物：銀器
撰文：祖
攝影：陳世昌
模特兒：Youco、Rhonda、Wingkie@Inflate
鳴謝：奇門遁甲大師雲文子、玄學家龍震天、星相師夢妮妲