Android快叉手機電力先決

Samsung Galaxy A9 大芒中階

Samsung上年發布Galaxy A中階系列，大玩金屬簡約設計，結果大受歡迎，今年添食加推6吋大芒嘅A9。機身前後都覆蓋2.5D Gorilla Glass強化玻璃，加上金屬邊框，令到整體手感貼近同廠機王Galaxy S6。

HTC One A9 台廠翻生作

台廠HTC上年尾發布全新One A系列，頭炮為中階機A9。雖然外形帶有iPhone影子，但憑着軟硬件嘅平均表現取勝，廠商更不時推出新色搶客，剛剛引進寶石金和石榴紅色，迎合女性用家需要。

Motorola Moto G Turbo 生活防水

Motorola近期頻頻發布新產品，除咗有第二代Moto 360智能手錶，手機亦有Moto G Turbo，最大賣點係有TurboPower「快叉」功能，另支援IP67防水防塵標準，1米水深浸佢30分鐘都冇問題，用得粗魯都頂得住。

Galaxy A9的Home掣支援指紋辨識功能，不過要着芒先用得到。	One A9僅提供單卡版，經常公幹或外遊人士未必啱用。	Moto G Turbo機背加入防滑坑紋，並有1,300萬像素鏡頭。

第一回合：鬥充電速度

3部手機均支援快速充電功能，Galaxy A9跟機火牛標明Adaptive Fast Charging。One A9嘅快叉火牛要畀$338另購，支援Quick Charge 2.0快速充電技術，手機更可透過軟件升級至Quick Charge 3.0。Moto G Turbo嘅火牛則加入Turbo Power，廠商表示只需15分鐘便可充回6小時電量。機Gor先玩到3部機冇電熄機，然後同步「快叉」15分鐘，Galaxy A9、One A9及Moto G Turbo分別回至21%、24%及25%電量，若果新年期間趕住出街拜年，確實頂到幾粒鐘。待充電1小時後，機Gor發覺三機分別回至63%、64%及81%，Moto G Turbo跑出；至於三機由0%至100%所需時間由1.5小時至近2小時不等。相比傳統手機用5V/1A~1.5A的火牛，充上1小時才回到40%左右電源，充滿電隨時要等3小時，快叉手機確實方便好多。

Samsung機專用嘅Adaptive Fast Charging火牛，輸出為9V/1.67A。	HTC機採用Quick Charge 2.0火牛，輸出為9V/1.67A及12V/1.25A，不過需以$338另購。	Win Moto G Turbo附送嘅Turbo Power火牛，輸出為9V/1.6A及12V/1.2A。

第二回合：鬥電量長氣

三機嘅充電速度雖然比一般手機快，但如果電量用到好似倒水咁款，就叉幾快都冇用！Galaxy A9、One A9及Moto G Turbo嘅電池容量分別有4,000mAh、2,150mAh及2,470mAh，鬥電量當然前者勝出。機Gor嚟個模擬測試，先串流播放15分鐘YouTube短片，發覺Galaxy A9耗掉3%電量、One A9下跌2%電量，Moto G Turbo就跌咗4%電量；再將三機嘅屏幕亮度及音量調高，透過Wi-Fi試播1小時劇集，Galaxy A9電量下跌11%、One A9電量驟降18%、Moto G Turbo電量則降低13%。而Galaxy A9和One A9均內置省電模式，必要時可以關閉上網、限制屏幕亮度而令電池續航力提升。

Win Galaxy A9提供電池最佳化及省電模式等，仲有預計剩餘使用時間。	One A9設有電池最佳化及省電模式，設定齊全。	Moto G Turbo原生電量設定介面只有耗電圖表。

第三回合：鬥軟硬規格

手機的耗電速度很多時取決於軟硬件，單係唔同廠嘅處理器、製程、線路設計，便對效能和耗電有很大影響，機Gor以《AnTuTu》測試，發現One A9及Moto G Turbo分別獲得48,313分及38,206分，而Galaxy A9以68,140分大幅拋離對手。軟件方面，Galaxy A9預載熟口熟面嘅TouchWiz介面，並特別為6吋大芒而引入縮小畫面功能。至於HTC One A9則加入動態縮時攝影，可將影片以2倍至12倍加速播放，玩味十足。而Moto G Turbo介面似足原生Android，但加入智慧手勢操作，例如揈兩下可開啟電筒、扭動兩下手機啟動鏡頭。

Win 長按三下Home鍵，Galaxy A9可將屏幕縮小以便單手使用。	One A9內置動態縮時攝影，可將影片以2倍至12倍加速播放。	備有多個手勢操作功能，在Android手機中較為少見。

香港資訊科技商會榮譽會長方保僑：「記得用原廠火牛及USB線！」

「建議充電時使用原廠火牛及USB線，因為唔少人試過用副廠USB線，令快叉功能無法啟動，充電速度減慢咗都唔知。另要留意火牛的電流輸出，舊款火牛輸出大多是1A，當數值愈大如達致2A，充電速度會大大提升。用家亦毋須擔心快速充電會令電池壽命縮短，皆因此功能由手機晶片予以支援，大可放心使用。」

機Gor Report：Galaxy A9大芒「智」Buy

今次測試3部快叉手機，表現都有極高水準，當中尤以Galaxy A9的電池容量最大、運算效能較佳，加上有6吋大芒及雙卡雙待兼中港4G制式，鍾意大芒嘅機Gor最Buy；但要考慮機身重達200g，加上佢只用上Android 5.1系統，其餘兩部對手已預載Android 6.0平台，唔使等廠商慢慢更新，即時玩盡Apps權限、SD卡轉內存等功能。

Samsung Galaxy A9 規格表

制式：GSM、WCDMA、LTE

處理器：1.8GHz八核心

記憶體：3GB RAM、32GB ROM、支援microSD

屏幕：6吋（1,920×1,080解像度）

鏡頭：（前置）800萬像素、（後置）1,300萬像素

電池容量：4,000mAh

作業系統：Android 5.1

體積：161.7×80.9×7.4mm

重量：200g

HTC One A9 規格表

制式：GSM、WCDMA、LTE

處理器：Qualcomm Snapdragon 617八核心

記憶體：2GB RAM配16GB ROM、3GB RAM配32GB ROM、支援microSD

屏幕：5吋（1,920×1,080解像度）

鏡頭：（前置）UltraPixel、（後置）1,300萬像素

電池容量：2,150mAh

作業系統：Android 6.0

體積：145.75×70.8×7.26mm

重量：143g

Motorola Moto G Turbo 規格表

制式：GSM、WCDMA、LTE

處理器：Qualcomm Snapdragon 615 1.5GHz八核心

記憶體：2GB RAM、16GB內存、支援microSD

屏幕：5吋（1,280×720解像度）

鏡頭：（前置）500萬像素、（後置）1,300萬像素

電池容量：2,470mAh

作業系統：Android 6.0

體積：142.1×72.4×6.1~11.6mm

重量：155g

機Gor Profile

機不離身，不信Spec只信測試，不扮高深，懶理低俗，貪新不忘舊。

查詢電話：（a）3698 4698、（b）3077 5588、（c）8118 0800

撰文：機Gor