布吉Why So Serious？

旅行，從來是很個人的選擇，作為一名廢青，好自然就係為大家介紹點樣「食」同「瞓」，你睇到書店介紹飲飲食食行街瞓覺的指南愈賣愈多，就知廢青數量急劇上升。這次來到泰國布吉的Laguna區，搵到間Cassia Phuket，為該區唯一走型格摩登路線的酒店，價錢平民化之餘設計又夠晒調皮搞鬼，離酒店約40分鐘車程的Laem Hin碼頭，仲有魚排秘店畀人勁擦海鮮，然後返酒店繼續同「Friend子」Hea爆度日。你諗吓，敝報馬經非常出名，有哪位馬迷不曾拜讀過？但又有人話賭馬浪費金錢同時間喎，其實旅遊同賭馬仔有時只為輕鬆一下，何必隨隨便便就定義別人「廢青」/「廢中」？

霓虹燈每1分鐘變一次色，紅、綠、藍、黃變幻莫測，好迷幻。

迷幻變色龍

Cassia Phuket為Banyan Tree的姐妹副線酒店，於去年10月尾正式開幕，一抵埗即有尊員推住架貌似超級市場手推車的彩色行李車來迎接，調皮得來又不失Banyan Tree既有的細心同體貼。大堂貫穿6層的中空設計，帶點太空感，可望透天花板，每層更有變色霓虹燈裝飾，極之吸睛又不失氣勢。酒店四周擺滿了泰式風巨型掛畫，由當地藝術家TikkyWOW及Rukkit操刀，七彩鮮艷的風格跟霓虹燈是絕配。

食方面亦相當破格，大膽到連正式的餐廳也沒有，只有酒店內24小時開放的小型超級市場，提供三文治、麵包、壽司等輕食，買完可坐在泳池邊的Cafe吃個夠，啱晒隨意率性的年輕一族。酒店221間房均為公寓式，廚房、客廳到睡房都以鮮色為主，溫馨得來不失格調。加分位是廚房連微波爐、水煲、砧板、煎Pan等都有齊，如嫌酒店的食物不夠，自己煮番幾味一樣得。

大堂內有泰國藝術家TikkyWOW筆下的佛像，神怪得來色彩繽紛。	酒店設有Spa同美甲房，女士們玩之餘都要顧住個靚樣呀。	即使不是一班人，兩小無猜入住Cassia Phuket，其實都幾溫馨。
Suite With Loft客房無論是一家大細還是一班朋友來住，感覺都極之Cozy。	鋼管舞女郎影子後是洗衣房，估佢唔到。	酒店超級市場賣的貨品也夠晒玩味，那個Jutsin Bieber朱古力包裝（右）整得好神似！230 Baht（約HK$49）。
大堂旁設有玩樂區，照顧埋小朋友，好細心。	酒店不設餐廳，只有簡單的望湖休憩角落。	酒店連拖鞋都有心思過人，特製「Be Cool With Cassia」拖鞋。

Cassia Phuket

地址：64 Moo 4 Srisoonthorn Road, Tambon, Cherngtalay, Amphur, Thalang, Phuket, Thailand

房價：每晚5,900 Baht（約HK$1,263）起

網址：www.cassia.com

交通：由布吉機場乘坐的士前往約30分鐘

誰管你儀態

由Cassia酒店坐約40分鐘車，來到布吉荒蕪的Laem Hin碼頭，於碼頭乘坐約5分鐘快艇即來到Kruvit Raft餐廳。雖然隱身於魚排之上，但餐廳看起來十分企理整齊，極有漁家風味。已開業14年的Kruvit Raft，一直是本地人及西方遊客的熱門用餐之選，拿手菜當然以海鮮為主，鹽燒鮮魚、黑椒瀨尿蝦、生蝦刺身等都是必吃推介。於餐廳內的魚排中任揀生猛海鮮後，如沒有特別要求煮法，師傅會好樂意為你効勞炮製其自豪菜式。我們一口氣叫了虎蝦、青花蟹、蜆、龍蝦同生蠔。20分鐘過後，侍應開始端來一碟比手掌更長的瀨尿蝦，如湯匙般大的蜆，味道香濃的大蝦冬蔭功，光是看到飽滿肥美的海鮮，都覺得膽固醇直線飆升，不過一年沒有幾次，當然要用晒10隻手指大擦一餐！同行友人話：「女孩子要食得斯文點呀！」儀態，甚麼來的？食海鮮哪需要儀態呀！

餐廳的木地板不太隱陣，不時看到有鐵釘凸起，小心為妙。	生猛海鮮即叫即整，價錢比布吉市中心的芭東區平起碼三分一，絕對抵食！	鮮味無比的清蒸瀨尿蝦，每公斤4,000 Baht（約HK$856）。
香口又不失鮮味的薑葱炒花蟹，每公斤650 Baht（約HK$140）。	餐廳旁的魚排變成了遊客玩樂之地。	如斯美景，都忍不住要來張Profile Pic。