Volkswagen Beetle Cabriolet 1.4 TSI 160PS不朽潮流

潮流呢樣嘢有時好難理解，70年代的橡皮小鴨可以興完又興、小鳳姐可紅遍本地網絡世界，就連盧海鵬都重出拍「廣告」，仲要被網民激讚，應該點解讀？借網絡用語一用，「識條鐵」咩！復古是潮流的一種，若提到汽車的經典，甲蟲車就最具代表性，70多年來經過多次換代轉款，全球Fans仍不離不棄，名人車主更不計其數，有些潮流玩一季、甚至一個月就完，而甲蟲車就歷久不衰。最近，Volkswagen為Beetle Cabriolet配上更型格的19吋Tornado輪圈，並噴上Sharp爆橙色車身，玩味更濃。

Volkswagen Beetle Cabriolet 1.4 TSI 160PS 售價：$359,980起

歎後座宜關篷

香港人揀車較着重實用表現、加上「土地問題」，養兩部車（1部實用、1部玩樂）似乎不屬於廢青可負擔範圍，就算有咁多閒錢養多部車，做樓奴唔好過？平心而論，揸開篷車是一種生活態度，相信當中不少車主都是喜愛玩樂的一群，要實用直接買MPV算，再唔係五座位的Golf Sportsvan一樣好好用。別誤會，Beetle並非零實用，後座空間比市場上很多2+2座位的汽車好得多，只要不是高腳七，其實可以接受，不過記得叫駕駛者關篷，皆因後座非常吃風，無論幾肚餓都好，上Highway走轉保證會飽到乜都唔想食，若認為是難得的Free Lunch，那就隨便你。今代Beetle沿用上代的電動軟篷設計，按一個掣就可操作，就算駕駛者不願意關篷，做乘客也可強行控制，開或閂過程分別只需9.5秒及11秒，50km/h以下行車都可操作。強行不太好？不會吧，潮流興強行，好似強行填詞咁！

雙增壓力量充裕

今日的Beetle較元祖甲蟲車大部，車身加入大量現代化元素，頭燈整合了LED日間行車燈，但看上去仍是不折不扣的甲蟲車，不論是鍾意經典車款，抑或純粹愛型、愛潮，相信都會被這個得意可愛樣子吸引。廠方提供測試的Beetle Cabriolet配備1.4公升TSI引擎，並導入直噴及雙增壓（Turbo及Supercharge）技術，加速性能比一般1.5公升私家車強，最大馬力及扭力分別是160ps及240Nm，配合七前速雙離合器波箱，靜止加速至100km/h只需8.6秒，咪以為甲蟲車個樣咁Cute就快極有限，燈位起步隨時輸比佢。此外，標準配備先進的XDS電子差速鎖，攻彎穩定性獲得提升，減少推頭現象，雖然懸掛設定沒有同門的Scirocco咁Firm，但操控依然靈活，舒適性更佳。

錶板採用三圓形設計，行車資訊清晰易讀。

原廠設置了雙區恒溫冷氣，左右溫度可獨立調校。

中控台用上與車身同色的飾板作配襯，互相呼應。

配備足合年輕族

Beetle的軟篷結構較電動硬摺頂簡單，打開後所佔用的車尾空間不多，依然可擺放中小型行李篋，必要時更可翻平後座打通尾箱，擺放長形物件不成問題。車廂裝潢及配備非常合年輕人口味，中控台用上與車身同色的飾板作配襯，車身內外互相呼應，處於開篷的狀態，更能凸顯出型格的一面。

後排乘坐空間算不錯，大人坐都可接受。

側鏡整合了指揮燈，有助提升行車切線的安全性。

引擎容積只有1.4公升，馬力卻高達160ps。

另外，配備的Composition Media音響系統配置8個喇叭，可透過藍芽連接智能電話，播放音樂串流軟件的歌曲，開住篷聽真Coldplay、OneRepublic，多爽！目前，廠方已將Bi-xenon頭燈、後擾流、真皮多功能加減波軚環、定速巡航、無匙系統、Hill-hold Control及胎壓監測系統列為標準配置，豪華設備應有盡有，$359,980起的售價可擁有一部如此齊料的開篷車，有一定叫座力。