《人中之龍 極》女優襲港 電玩誘惑
唔經唔覺《人中之龍》已推出十年，仲記得首集由日本小說家「馳星周」編劇，但以現代眼光來看，故事同畫面表現當然未臻完美。SEGA遂高清重製初代故事成《人中之龍 極》，加入新情節之外，亦新增有趣元素，讓玩家保持新鮮感。而遊戲總監督名越稔洋極之重視香港市場，日前仲帶埋在Game內現身的女優波多野結衣來港宣傳！
激發桐生鬥志
《人中之龍 極》的故事背景沿用初代設定，講述江湖人物桐生一馬，遇上100億少女遙之故事，今集主要填補初代遊戲嘅劇情，讓玩家更明白箇中來龍去脈。
《人中之龍》嘅粉絲應該知道後繼故事有另一主角真島吾朗，為了將兩大主角連結在一起，今集特別以有趣方式「無所不在的真島」來激發桐生鬥心，例如真島會喬裝騷擾桐生，幫佢練成各種絕技，最爆係真島會扮成公關小姐登場！畫面表現方面，由於今集於PS4平台推出，效能和畫質自然完勝初代PS2時代啦！
多種戰鬥風格
可能廠方見玩家相當受落上集《人中之龍0 誓約的場所》嘅戰鬥風格，故今次有樣學樣，真島可使出「幹架師風格」、「舞者風格」等，桐生亦可從中領悟「流氓風格」、「火爆浪子風格」、「快攻手風格」以至最強的「堂島之龍風格」，讓粉絲可感受煥然一新嘅戰鬥體驗。新作亦唔少得抵死嘅迷你遊戲，好似加入了四驅車比賽，以及將SEGA街機遊戲《昆蟲王者》改編而成的《昆蟲女王》，其他過癮玩意就等各位慢慢發掘。
波多野結衣：再瘦啲就好
遊戲中飾演公關小姐嘅波多野結衣日前訪港，她表示遊戲角色造型同佢真人幾似，仲講笑話如果再整得瘦啲會更好。由於遊戲早已設定好角色，波多野結衣後來才決定加入，所以遊戲中嘅「結衣」無論語氣同喜好，都跟真人有少少出入，難怪在香港發布會時，爆機達人達哥在舞台跟遊戲中嘅「結衣」談情，即使問埋身旁嘅波多野結衣意見，最終都溝女失敗收場。
製作人分享：最Buy《昆蟲女王》
《人中之龍 極》加入不少新章節，遊戲總監督名越稔洋話部分諗法開發初代時已經有，亦有部分是後期才諗到。至於新作中最吸引的元素是甚麼？執行製作人佐藤大輔認為是迷你遊戲《昆蟲女王》，經過重新包裝後非常好玩！而遊戲附上預定今年底推出的《人中之龍6》試玩版，1月28日可供下載，不過兩位製作人對新內容三緘其口，甚至連北野武所扮演嘅遊戲角色都話係最高機密！
DETAILS
開發：SEGA
類型：動作冒險
平台：PS4
售價：$378（繁體中文光碟版或下載版）
查詢電話：2341 2356
撰文、部分攝影：布偉倫