珠海直擊 BAC MONO 一人的浪漫

駕駛方程式賽車是不少車迷的夢想，就算花費得起、又有技術，都唔係成日玩得到，近極都要去珠海國際賽車場先有得玩。不過，日後要喺香港合法揸Formula Feel的單座跑車並唔係完全冇可能，好似英國車廠Briggs Automotive Company Ltd（下稱「BAC」），早排就引進了一款名為「MONO」的跑車到港，唔止望落去成部方程式咁款，性能仲勁過唔少Supercar。BAC稱MONO有機會在港出牌，不過成功與否還要待運輸署批准，拭目以待！

儘管MONO只得280bhp馬力，但輕盈車身，0~96km/h加速只需2.8秒。

上車同方程式一樣

MONO能唔能夠喺香港出牌仲未知，但肯定的是在英、美等國家已獲批在當地馬路上合法使用，希望總是有的。若有一天MONO可以在香港行駛，不管你係靚佬湯定八両金，揸出街都肯肯定型到核爆。論養眼度，拉利同林寶都要企埋一邊。MONO是按方程式賽車規格及技術設計，無分左軚車或右軚車，駕駛席設於正中間，上車步驟同方程式一樣，先戴頭盔、再拆走軚盤，才可跨過車體進入駕駛艙，煩係煩啲，但幾個動作就可以令途人向你行注目禮，係咪值得先？不過上車時要瀟灑啲，千祈唔好「Kick親」或卡住，被人拍低咗放上YouTube被強烈恥笑就無謂啦。

驚人戰績輕身取勝

MONO的實力有幾強？先唔講動力配置，不如睇下戰績先，根據官方紀錄，MONO以1分14秒3的極佳圈速完成Top Gear專用賽道，在眾多Street-Legal的汽車中第二快，廠方試車手Oliver Webb最近在匈牙利Hungaroring賽道，更造出1分55秒的驚人圈速，比起Porsche 911 GT3及McLaren P1分別快上9.5秒及4.5秒，夠說服力未？MONO究竟配甚麼引擎咁堅揪？登登登櫈……答案就係Cosworth 2.3公升直四自然吸氣引擎。咩話？2.3公升直四NA？係呀，絕對冇呃鬼食豆腐，雖然馬力只有280匹，睇數字好似唔係好勁，但0~96km/h的加速卻只需2.8秒，足以鍊低Supercar啦！原因係MONO的車體結構以超輕碳纖維打造，全車僅重580kg，較一般1.5公升級私家車輕一半以上，同時配上方程式規格的Hewland六前速Sequential波箱，想唔快都幾難。

廠方稱MONO的性能可媲美DTM賽車，足以應付賽道駕駛。

因應道路駕駛需要，MONO已裝上大燈、高燈、指揮燈等設備。

所有按鍵都放在軚盤上，並整合了GEMS LDS4彩色顯示系統。

開車入波講步驟

MONO啟動引擎程序十分簡單，踩住Clutch按個掣便可以，但入波就相對複雜，先要踩住Clutch，同時按下N波鍵及升檔撥片先入到一波，如果冇廠方職員講解，相信研究一日都未開到車，也許這就是最佳防盜！BAC為MONO配上的序列式波箱設有六前速，屬於方程式規格，離合器只在着車、由N波轉1波或R波，以及起步才用得着，行車期間只需按下軚盤後方的加減波撥片便可轉檔，唔使踩Clutch，Paddle Shift只需0.035秒，快到離譜。不過要注意是駕駛艙只能提供有限的腳部空間，油門、制動及離合器的位置非常貼近，駕駛時要小心迫力當油門，還要選擇合適的鞋履，穿厚底鬆糕鞋就死得。此外，MONO沒有ABS、沒有Traction Control，揸唔揸得掂完全取決於個人技術，推頭甩尾失控唔好賴地硬。

駕駛艙只能提供有限的腳部空間，油門、制動及離合器的位置非常貼近。

車身的空氣動力學套件由BAC及斯圖加特大學合作開發，有助減低亂流及空氣阻力。

駕駛席可為每位客戶、車手訂製，並配上5或6點式安全帶。

訂製座艙調節懸掛

揸MONO同揸Supercar有乜唔同？BAC Hong Kong董事總經理Duncan Lee表示，Supercar的駕駛席通常設於左邊或右邊，車子的左右重量會有所不同。若駕駛席如MONO般設於正中間，便可減低重量分布不均的問題，入彎速度可以更快，車手視野更平衡，這些都是中置座位跑車的優勢，而且有駕駛方程式的感覺，與傳統Supercar有很大分別。與此同時，BAC可為每位客戶、車手訂製駕駛席，懸掛亦可進行針對性調校，譬如在平坦賽道駕駛可Set硬一點，以應付激烈駕駛需要，另可選擇街胎或賽車用Slick胎，甚至為車身加上名字、公司Logo等，非常個人化，基本上每部MONO都可做到獨一無二。

BAC Hong Kong董事總經理Duncan Lee表示，MONO有機會在本港道路合法使用。

BAC Hong Kong董事總經理Duncan Lee表示，MONO有機會在本港道路合法使用。

Neill Briggs是BAC的創辦人兼工程及項目總監，負責業務管理及MONO開發工作。

Neill Briggs是BAC的創辦人兼工程及項目總監，負責業務管理及MONO開發工作。

懸掛用上SACHS出品，軟硬度可以進行針對性調校。

型仔代價零實用度

或者有人會憂慮安全性，其實咁講，英、美等國家都容許MONO在道路上合法行駛，照理危險極有限。廠方稱，MONO的方程式賽車底盤以極堅固的碳纖維夾層結構及精鋼打造，除採用FIA規格防滾保護架外，還擴大車側撞擊防護碳纖結構，整體安全性相當高。不過，MONO的實用性可以話係零，載客量（不計駕駛者）是零、頭冚下的儲物空間基本上都是零，因放下頭盔及手套後已冇晒位，連公事包都放不下。過收費隧道時，又要頭痕點攞錢，亦唔知零錢、銀仔可以放喺邊。用Autotoll？架車冇擋風玻璃喎，如果唔想黐盒仔喺車身，莫非要黐喺頭盔？好在，這些問題唔使我諗，咁貴既車筆者買唔起，呢啲煩惱都係留番畀有錢人。咁架車即是幾錢？BAC開出的稅前售價為17萬英鎊（約200萬港元）起，如果喺香港出到牌，打埋稅估計要$400萬以上。想揸部性能可媲美DTM賽車的單座跑車招積遊街？得，口袋夠實力咪得囉！