美國CES直擊！Nikon單反×運動相機 4K三連發

D5破格328萬感光度

國際消費電子產品展覽（CES）每年都人頭湧湧，不過今年Nikon展區特別多人，事關期待已久嘅全片幅機王D5正式登場，小記都要排長龍先有得試玩，排隊時四處都可聽到機關槍般的快門聲，原來其連拍速度達12fps，將反光鏡升起後仲可去到每秒14張咁快，難怪個個都撳住快門唔肯放手，淨係聽聲都已經夠爽。D5用上2,080萬像素感光元件和EXPEED 5影像處理器，最勁係感光度可提升至Hi 5，相等於ISO 3,280,000，仲可拍埋4K（3,840×2,160@30p）影片，可惜現場唔畀人插卡試相，冇得即刻睇成像質素。而新機備有兩個版本，其一是用上雙XQD卡槽，另一款則是雙CF卡槽，當然雙XQD版本嘅讀寫速度快啲，連拍RAW相片都冇問題。

D5機身線條較以往圓渾，而且具有雙XQD及雙CF兩個版本。

感光度支援Hi 5（相等於ISO 3,280,000），環境幾黑都影到靚相。

新一代旗艦機王正式支援4K（3,840×2,160@30p）拍片畫質。

基本連拍有12fps，若升起反光鏡更擁有14fps，惟觀景器會變成全黑畫面。

D500每秒10張連拍

至於APS-C規格嘅新機亦喺CES現身，不過型號唔係坊間所傳嘅D400，而係叫做D500。小記拎上手時唔單止覺得機身紮實，機背仲加入上下翻芒設計，並支援篤芒功能，能夠輕觸縮放畫面和影相，小記實試時反應都幾快，加上佢嘅連拍速度有10fps，對於中階機款來說相當吸引。最估唔到新機加入埋4K拍片功能，另支援Wi-Fi同藍芽，現場工作人員表示，用家可透過藍芽以《SnapBridge》App配對手機，能夠做到遙控拍攝和過相，實用性相當高。

影友等咗咁多年，終於等到D300s嘅後繼機D500。	D500機背加入上下翻揭式設計，並支援篤芒操控。	除了Wi-Fi之外，另引入藍芽功能以便配對《SnapBridge》手機App。

KeyMission 360大玩VR

另一好玩之作係Nikon首部Action Cam，命名為KeyMission 360，機身前後都有180度魚眼鏡頭，夾埋可拍到360度球形全景影像。不過現場呢款新機被玻璃箱罩住，換言之得個睇字，只見到機身印有4K、Wi-Fi、NFC和藍芽標誌，仲支援30米防水和2米防撞，功能咁齊擺明向GoPro挑機。雖然冇得拎上手試玩，不過現場有個VR專區，可以畀大家戴上VR眼罩瀏覽由KeyMission 360所拍嘅影片，讓人投入畫面之中，所以在場個個人都擔天望地、左擰右扭，小記試玩後都覺得好神奇，皆因影片四周嘅接駁位幾乎全無破綻，期待度滿分。

KeyMission 360前後都有180度魚眼鏡頭，並支援30米防水及2米防撞。

設有VR專區，用家戴住VR眼罩便可睇到KeyMission 360所拍嘅球形虛擬實境影像。

同場加映：SB-5000無線電控制「飛燈」

廠方除咗主打3款4K新機外，現場亦擺放了新一代SB-5000閃光燈供試玩，新燈主要特點係支援無線電控制技術，接收距離可以去到30米咁遠，比起以往用光脈衝技術，出街「飛燈」更方便，閃燈仲內置冷卻系統，連續閃近100次都唔怕過熱。

SB-5000是廠方首支加設無線電控制技術的閃光燈，接收範圍達30米。	用上多部單反玩360度拍攝，大約排15分鐘先玩到。	放大圖片
現場設有大量相機和鏡頭供在場人士「試炮」。	Nikon School Theater有專業攝影師講Talk，經常座無虛席。	新機試玩區要排隊先有得玩，還有專業人員講解。

特派記者：黎子豪　

鳴謝：Nikon