1:6最強葉問武得輸

戰鬥格 夠睇頭

Enterbay唔係第一次出葉問Figure，早於5年前第一集已同步推出人偶，時至今日再出能否吸引玩家入手呢？其實廠方今次由內到外，由頭雕到配件都大幅改動，齋講神似度已提升至另一層次，頭雕由SCUDERIA操刀、YJ塗裝指導，輪廓、鼻樑、面頰儼如真人；同時髮型細緻，眼袋皺紋亦深化了，比舊版更年邁更風霜。同時「宇宙最強」眉頭深鎖眼神堅定，擺出一副戰鬥格，架式自然入戲得多。美中不足係頭雕只得一個，雙眼又沒有轉動系統，若能好似同廠NBA Figure咁送多個頭雕就Perfect！

配件齊 送刀棍

今集葉師傅要同「拳王」泰臣同飾演張天志的張晉過招，動作笨拙少少都畀人KO。呢方面Figure提供30個關節，小記試玩後發覺它比上代靈活，手腳更易往內靠，符合詠春拳的中線理論。配件方面，今次送足10隻造型手，仿照詠春套路來設計，攤手、黐手、小念頭、標指等全部擺到，仲賣大包送巨型木人樁，並附有金屬製八斬刀、木製六點半棍等武器；不過最正還是地台，有齊「葉問家」及「張天志武館」兩大場景，加上「詠春正宗」立體牌匾，彷彿將片場搬出來一樣，逼真成咁，請受徒兒一拜！

八斬刀的刀身以金屬打造，形神俱似，而且沒有開鋒唔怕整親。	10隻造型手跟足詠春拳設計，小念頭、標指等一一有齊。	頭雕儼如真人，表情亦交足戲，實物比影相更神似！
木人樁配以武館場景，並加入舊化效果，製作一絲不苟。	額外送多件灰色唐裝長衫，可惜鈕扣太細，改為啪鈕會更好。	包裝盒印有《葉問3》Logo及丹爺大相，咁鬼精美直頭可做家居擺設。

撰文：陳志滔

攝影：胡振文

查詢電話：2332 3615